ନୂଆଦିଲ୍ଲୀ,୧୪ା୯(ପି.ଟି.): ଭାରତରେ ଏକକ ଦେୱାନି ସଂହିତା (ୟୁସିସି) ପ୍ରସ୍ତୁତ କରିବା ସପକ୍ଷରେ ଶୁକ୍ରବାର ସୁପ୍ରିମକୋର୍ଟ ଗୁରୁତ୍ୱ ଦେଇଛନ୍ତି। ୧୯୮୨ରେ ଏନେଇ ପ୍ରୋତ୍ସାହନ ଦେବା ସତ୍ତ୍ୱେ ସେବେଠୁ ଲକ୍ଷ୍ୟ ହାସଲ ଦିଗରେ ଅଦ୍ୟାବଧି କିଛି ଉଦ୍ୟମ ହୋଇନାହିଁ ବୋଲି ସର୍ବୋଚ୍ଚ ଅଦାଲତ ଅସନ୍ତୋଷ ବ୍ୟକ୍ତ କରିଛନ୍ତି।
ଏକ ସମ୍ପତ୍ତି ବିବାଦ ମାମଲାର ୩୧ ପୃଷ୍ଠା ସମ୍ବଳିତ ରାୟ ଦେବାବେଳେ ଦୀପକ ଗୁପ୍ତା ଓ ଅନିରୁଦ୍ଧ ବୋଷଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, କେତେକ ନିର୍ଦ୍ଦିଷ୍ଟ ସୀମିତ ଅଧିକାରର ସୁରକ୍ଷାକୁ ବାଦ୍ ଦେଲେ ୟୁସିସି ସବୁ ରାଜ୍ୟରେ ଲାଗୁ କରାଯାଇପାରିବ। ଗୋଆ ହେଉଛି ଏହାର ଏକ ‘ଉଜ୍ଜ୍ୱଳ ଦୃଷ୍ଟାନ୍ତ’। ଦେଶର ଯେକୌଣସି ସ୍ଥାନରେ ରହିଲେ ମଧ୍ୟ ଗୋଆବାସୀଙ୍କ ସମ୍ପତ୍ତି ସମ୍ପର୍କିତ ଉତ୍ତରାଧିକାର ଓ ଦାୟ ଅଧିକାର ପର୍ତ୍ତୁଗୀଜ୍ ସିଭିଲ୍ କୋଡ୍, ୧୮୬୭ ଅନୁସାରେ ନିୟନ୍ତ୍ରିତ ହେବ। ମଜା କଥା ହେଉଛି, ଡିରେକ୍ଟିଭ୍ ପ୍ରିନ୍ସିପୁଲ ଅଫ୍ ଷ୍ଟେଟ୍ ପଲିସି ସହ ଜଡ଼ିତ ଅନୁଚ୍ଛେଦ ୪୪ର ଚତୁର୍ଥ ଭାଗରେ ସମ୍ବିଧାନ ପ୍ରଣେତାମାନେ ଆଶା କରିଥିଲେ ଯେ, ସାରା ଦେଶରେ ସମସ୍ତ ନାଗରିକଙ୍କ ପାଇଁ ଏକକ ଦଓ୍ବୋନି ସଂହିତା ଲାଗୁ କରିବା ସକାଶେ ଉଦ୍ୟମ ହେବ। କିନ୍ତୁ ଆଜି ଯାଏ ଏନେଇ କୌଣସି ପ୍ରକାର ପଦକ୍ଷେପ ନିଆଯାଇ ନାହିଁ। ହିନ୍ଦୁ ଆଇନଗୁଡ଼ିକ ୧୯୫୬ରେ ପ୍ରଣୟନ ହୋଇଥିଲେ ସୁଦ୍ଧା ସୁପ୍ରିମକୋର୍ଟଙ୍କ ପ୍ରୋତ୍ସାହନ ସତ୍ତ୍ୱେ ଏକକ ଦଓ୍ବୋନି ସଂହିତା ସମସ୍ତ ନାଗରିକଙ୍କ କ୍ଷେତ୍ରରେ ପ୍ରଯୁଜ୍ୟ କରିବା ପାଇଁ କିଛି ଉଦ୍ୟମ ହୋଇନାହିଁ ବୋଲି ଖଣ୍ଡପୀଠ ଅସନ୍ତୋଷ ବ୍ୟକ୍ତ କରିଛନ୍ତି।