ବରଗଡ଼ ଅଫିସ୍,୧୫।୮: ହାତରେ ଧରିଥିବା ଲାଲ ଗାମୁଛା ଦେଖାଇ ଟ୍ରେନକୁ ଅଟକାଇ ସମ୍ଭାବ୍ୟ ୩ଟି ଟ୍ରେନ ଦୁର୍ଘଟଣାରୁ ବହୁଲୋକଙ୍କ ଧନଜୀବନ ରକ୍ଷା କରିଥିବା ବରଗଡ଼ ଜିଲା ବରପାଲି ଥାନା ବାରଗୁଡ଼ା ଗ୍ରାମର ଭାଗୀରଥି ପ୍ରଧାନଙ୍କୁ ଗୁରୁବାର ଜିଲାସ୍ତରୀୟ ସ୍ବାଧୀନତା ଦିବସରେ ସମ୍ବର୍ଦ୍ଧିତ କରାଯାଇଛି। ମୁଖ୍ୟଅତିଥି ତଥା ବରଗଡ଼ ଜିଲାପାଳ ଇନ୍ଦ୍ରମଣି ତ୍ରିପାଠୀ ତାଙ୍କୁ ମାନପତ୍ର, ଟ୍ରଫି ପ୍ରଦାନକରି ସମ୍ବର୍ଦ୍ଧନା ଜ୍ଞାପନ କରିଥିଲେ। ଭାଗୀରଥି ଥରେ କିମ୍ବା ଦୁଇଥର ନୁହେଁ, ୧୯୯୨ ମସିହାରୁ ଏପର୍ଯ୍ୟନ୍ତ ବରପାଲି-ଡୁଙ୍ଗୁରିପାଲି ମଧ୍ୟରେ ଏକାଧିକ ଥର ସମ୍ଭାବ୍ୟ ରେଳ ଦୁର୍ଘଟଣାକୁ ଏଡ଼ାଇ ଦେଇଛନ୍ତି।
ଉଲ୍ଲେଖନୀୟ, ୧୯୯୨ ମାର୍ଚ୍ଚ ୩୧ ତାରିଖ ରେଳ ଧାରଣା ଉପରେ ଏକ ଗଛ ପଡ଼ିଥିବାବେଳେ ସେହି ରେଳପଥ ଦେଇ ଆସୁଥିବା ଏକ ଟ୍ରେନକୁ ଲାଲ ଗାମୁଛା ଦେଖାଇ ଅଟକାଇଥିଲେ। ଫଳରେ ଟ୍ରେନଟି ସମ୍ଭାବ୍ୟ ଦୁର୍ଘଟଣାରୁ ବର୍ତ୍ତି ଯାଇଥିଲା। ସେହିବର୍ଷ ଜୁଲାଇ ୨୮ତାରିଖ ହୀରାଖଣ୍ଡ ଏକ୍ସପ୍ରେସ ଆସୁଥିବାବେଳେ ସେହି ସମୟରେ ରାଣୀଜୋର (ଏକ ଛୋଟ ନଈ)ର ପୋଲ ଉପରେ ବନ୍ୟାଜଳ ପ୍ରବାହିତ ହେଉଥିବା ଦେଖି ଭାଗୀରଥି ଲାଲ ଗାମୁଛା ଦେଖାଇ ଉକ୍ତ ଟ୍ରେନକୁ ଅଟକାଇଥିଲେ। ଫଳରେ ବହୁ ଯାତ୍ରୀଙ୍କ ଜୀବନ ରକ୍ଷା ହୋଇଥିଲା। ସେହିପରି ଗତ ୧୯୯୪ ଫେବୃୟାରୀ ୨୮ତାରିଖରେ ଏକ ମାଲବାହୀ ଗାଡ଼ି ଆସୁଥିବାବେଳେ ରେଳ ଧାରଣା ଉପରେ ଏକ ଫାଟ ଥିବା ଦେଖି ସେ ଅଟକାଇଥିଲେ । ସେହିବର୍ଷ ଅନ୍ୟ ଏକ ଯାତ୍ରୀବାହୀ ଟ୍ରେନକୁ ଅନୁରୂପଭାବେ ସେ ଅଟକାଇଥିଲେ। ଭାଗୀରଥିଙ୍କ ଏଭଳି ପ୍ରୟାସକୁ ପ୍ରଶଂସାକରି ୧୯୯୨ ମସିହାରେ ରେଳ ସପ୍ତାହ ପାଳନ ଅବସରରେ ସମ୍ବଲପୁର ରେଳ ଡିଭିଜନ ପକ୍ଷରୁ ତାଙ୍କୁ ସାର୍ଟିଫିକେଟ୍ ଅଫ୍ ମେରିଟ୍ ପ୍ରଦାନ କରାଯାଇଥିବା ସେ କହିଛନ୍ତି । ତେବେ ଗୁରୁବାର ଜିଲାସ୍ତରୀୟ ସ୍ବାଧୀନତା ଦିବସରେ ତାଙ୍କୁ ସମ୍ବର୍ଦ୍ଧିତ କରାଯାଇଥିବାରୁ ଏପରି କାମ ପାଇଁ ତାଙ୍କୁ ଅଧିକ ଉତ୍ସାହ ଯୋଗାଇଦେଇଥିବା ସେ କରିଛନ୍ତି ।