ମେଲବୋର୍ନ,୧୫।୧- କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ଓ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ଏକାସଙ୍ଗେ ପୁଣି ଥରେ କ୍ରିକେଟ ପଡ଼ିଆରେ ନଜର ଆସିପାରନ୍ତି। ସଚିନ ଅବସର ନେଇସାରିଥିବାବେଳେ ଧୋନୀ ଦୀର୍ଘଦିନ ହେଲା କ୍ରିକେଟରୁ ଦୂରେଇ ରହିଛନ୍ତି। ଦୁହିଁଙ୍କ କମ୍ବିନେଶନ ପୁଣି ଥରେ ଦେଖିବା ପାଇଁ ପ୍ରଶଂସକମାନେ ବ୍ୟାକୁଳ। ମିଳିଥିବା ସୂଚନା ମୁତାବକ, ଅଷ୍ଟ୍ରେଲିଆ ଜଙ୍ଗଲରେ ଲାଗିଥିବା ନିଆଁ ଦ୍ୱାରା କ୍ଷତିଗ୍ରସ୍ତ ଜନସାଧାରଣଙ୍କୁ ସାହାଯ୍ୟ କରିବା ଲାଗି ଏକ ଚ୍ୟାରିଟି କ୍ରିକେଟ ମ୍ୟାଚ୍ ଆୟୋଜନ କରାଯିବ। ଏହି ମ୍ୟାଚ୍ ମେଲବୋର୍ନ ଗ୍ରାଉଣ୍ଡରେ ଫେବୃୟାରୀ ୮ ତାରିଖରେ ଖେଳାଯିବ ବୋଲି ନିଷ୍ପତ୍ତି ହୋଇଛି। ଗୋଟିଏ ଦଳର ନେତୃତ୍ୱ ରିକି ପଣ୍ଟି ଓ ଅନ୍ୟ ଦଳରେ ସେନ ଓ୍ବର୍ନ ଅଧିନାୟକ ରହିବେ। ମ୍ୟାଚ୍ର ନାମ ବଶଫାୟାର ରିଲିଫ ମ୍ୟାଚ୍ ବୋଲି ସ୍ପଷ୍ଟ କରାଯାଇଛି। ମ୍ୟାଚ୍ ଲାଗି ପ୍ରସ୍ତୁତି ଆରମ୍ଭ ହୋଇଯାଇଛି। ମ୍ୟାଚ୍ରେ ବିଶ୍ୱର କିମ୍ବଦନ୍ତୀ ଖେଳାଳିମାନେ ପ୍ରତିନିଧିତ୍ୱ କରିବା ପାଇଁ ଆମନ୍ତ୍ରଣ କରାଯାଇଛି। ଆଶା କରାଯାଉଛି, ଧୋନୀ ଓ ସଚିନ ଏହି ମ୍ୟାଚ୍ରେ ଖେଳିବେ। ମ୍ୟାଚ୍ ନିମନ୍ତେ ଦୁଇ ଖେଳାଳିଙ୍କ ପ୍ରଶଂସକମାନେ ଏବେଠାରୁ ଉତ୍ସାହିତ ଅଛନ୍ତି।