କୋଲକାତା, ୧୩।୬(ପି.ଟି.): ସମ୍ପୂର୍ଣ୍ଣ ଭାରତୀୟ ଦଳକୁ ଆଉଟ କରିବା ପାଇଁ ଯେପରି ବୁଦ୍ଧି ଖଟାଇବା କଥା କେବଳ ଅଧିନାୟକ ବିରାଟ କୋହଲିଙ୍କ କ୍ଷେତ୍ରରେ ତାହା ପ୍ରୟୋଗ କର। ଏକା କୋହଲି ୧୧ ଜଣ ଖେଳାଳିଙ୍କ ସହିତ ସମାନ। ଇଂଲଣ୍ଡର ଦୁଇ ସ୍ପିନର ମୋଇନ ଅଲୀ ଓ ଆଡିଲ ରଶିଦଙ୍କୁ ଏହି ପରାମର୍ଶ ଦେଇ ଆସୁଛନ୍ତି ପାକିସ୍ତାନର ଗ୍ରେଟ୍ ସାକଲେନ ମୁସ୍ତାକ। ଗତବର୍ଷ ବିଶ୍ୱକପ ପର୍ଯ୍ୟନ୍ତ ସାକଲେନ ଇଂଲଣ୍ଡ ଦଳର ସ୍ପିନ ପରାମର୍ଶଦାତା ଥିଲେ। ଉଭୟ ମୋଇନ ଓ ରଶିଦ କୋହଲିଙ୍କୁ ୬ ଥର ଲେଖାଏ ଆଉଟ କରିଛନ୍ତି। ”ହଁ, ସେ ଜଣେ ନୁହନ୍ତି, ୧୧ ଜଣ। ଭାରତୀୟ ଦଳରେ କୋହଲିଙ୍କ ଉଇକେଟ ଗୁରୁତ୍ୱପୂର୍ଣ୍ଣ। ବିରାଟଙ୍କ ଉଇକେଟ ଅର୍ଥ ସମ୍ପୂର୍ଣ୍ଣ ଭାରତୀୟ ଦଳକୁ ଆଉଟ କରିବା। ସେ ଏକାକୀ ୧୧ ଖେଳାଳିଙ୍କ ସହିତ ସମାନ। ତାଙ୍କ ପ୍ରତି ସେଭଳି ମନୋଭାବ ପୋଷଣ କରାଯିବା ଉଚିତ ବୋଲି ଏକ ଇନ୍ଷ୍ଟାଗ୍ରାମ ଲାଇଭ୍ରେ ୪୩ ବର୍ଷୀୟ ସାକ୍ଲେନ କହିଛନ୍ତି।
୨୦୧୮ରେ ହେଡିଂଲେରେ ଅନୁଷ୍ଠିତ ଏକଦିବସୀୟ ମ୍ୟାଚରେ ରଶିଦଙ୍କ ଏକ ବଲ୍ରେ ଚକ୍ମା ଖାଇ ଯାଇଥିଲେ ବିରାଟ। ବଲ୍ଟି ପାଖାପାଖି ଲେଗ୍ରେ ପଡ଼ିଥିଲେ ହେଁ ଟର୍ନ ହୋଇ ଅଫ୍ଷ୍ଟମ୍ପରେ ବାଜିଥିଲା। ସାକ୍ଲେନ ଏହାକୁ ‘ବିରାଟ-ଓ୍ବାଲା ଡେଲିଭରି’ ବୋଲି କହିଥିଲେ। ନେଟ୍ସରେ ଏଭଳି ବୋଲିଂ ଜାରି ରଖିବାକୁ ଅଭ୍ୟାସ କରିବାକୁ ସେ ରଶିଦଙ୍କୁ ଉତ୍ସାହିତ କରିଥିଲେ। ବିଶ୍ୱର ନମ୍ବରଓ୍ବାନ ବ୍ୟାଟ୍ସମ୍ୟାନ ହୋଇଥିବାରୁ କୋହଲିଙ୍କର ଅହଂଭାବ ରହିବା ସ୍ବାଭାବିକ୍। ଯଦି ତୁମେ ଏକ ଡଟ୍(୦) ବଲ୍ ପକାଇବ ତେବେ ତାଙ୍କ ଅହଂ ଭାବରେ ଆଘାତ ଲାଗିବ। ତାଙ୍କୁ ଫାନ୍ଦରେ ପକାଇଲେ ଯାଇ ଆଉଟ କରି ପାରିବ। ଏ କ୍ଷେତ୍ରରେ ମନସ୍ତାତ୍ତ୍ୱିକ ଖେଳ ଖେଳିବାକୁ ହେବ ବୋଲି ଏହି ପୂର୍ବତନ ପାକିସ୍ତାନ ସ୍ପିନର କହିଛନ୍ତି। ଇଂଲଣ୍ଡ ଦଳ କୋହଲିଙ୍କ ବିପକ୍ଷରେ ଭଲଭାବେ ହୋମଓ୍ବାର୍କ କରିଥିଲା ଆମେ ତାଙ୍କର ବିଭିନ୍ନ ପର୍ଯ୍ୟାୟର ବ୍ୟାଟିଂକୁ ଅନୁଧ୍ୟାନ କରିଥିଲୁ। ସେ କିପରି ଆରମ୍ଭ କରୁଛନ୍ତି, ତାକୁ ବିଲ୍ଡଅପ୍ କରୁଛନ୍ତି ଏବଂ ଶେଷ କରୁଛନ୍ତି ଦେଖିବାପରେ ଯୋଜନା ପ୍ରସ୍ତୁତ କରିଥିଲୁ ବୋଲି ସମ୍ପ୍ରତି ପାକିସ୍ତାନ କ୍ରିକେଟର ଇଣ୍ଟରନ୍ୟାଶନାଲ ପ୍ଲେୟର ଡେଭଲପ୍ମେଣ୍ଟ ମୁଖ୍ୟ ଥିବା ସାକ୍ଲେନ ପ୍ରକାଶ କରିଛନ୍ତି।