ବ୍ରହ୍ମପୁର ଅଫିସ,୧୯।୯: ଗଞ୍ଜାମ ଜିଲା ବ୍ରହ୍ମପୁର ସହରର ଆସିକା ରୋଡ଼ ଏଟିଏମ୍ ଏବଂ ମେଡିକାଲ ଏଟିଏମ୍ରେ ୪୦ଲକ୍ଷ ଟଙ୍କା ଭର୍ତ୍ତି କରିବାକୁ ନେଇ ସିକ୍ୟୁର ଭ୍ୟାଲି ସଂସ୍ଥାର କେତେଜଣ କର୍ମଚାରୀ ଉକ୍ତ ଟଙ୍କା ହେରଫେର କରିଥିବା ଅଭିଯୋଗରେ ଟାଉନ ଥାନା ପୋଲିସ ଗୁରୁବାର ୨ ଜଣଙ୍କୁ ଅଟକ ରଖିଛି। ସେମାନଙ୍କ ମଧ୍ୟରେ ଜଣେ ଗାଡ଼ି ଡ୍ରାଇଭର ଥିବା ବେଳେ ଅନ୍ୟ ଜଣେ କର୍ମଚାରୀ ରହିଥିବା ଜଣାପଡିଛି। ପୋଲିସ ସେମାନଙ୍କୁ ଜେରା ଚଳାଇଛି। ତଦନ୍ତରେ ବାଧା ଉପୁଜିବା ଦୃଷ୍ଟିରୁ ସେମାନଙ୍କ ପରିଚୟ ସ୍ପଷ୍ଟ କରିବାକୁ ପୋଲିସ ମନାକରିଛି। ବୟାନକୁ ଆଧାରକରି ଉକ୍ତ ସଂସ୍ଥାର ଫେରାର ଅନ୍ୟ ଜଣେ କର୍ମଚାରୀଙ୍କୁ ଧରିବା ପାଇଁ ପୋଲିସ ପ୍ରୟାସ ଜାରି ରଖିଥିବା କହିଛି।
ପ୍ରକାଶ ଯେ, ଗତ ୧୨ ତାରିଖରେ ଉକ୍ତ ସଂସ୍ଥାର ୩ କର୍ମଚାରୀ ୨ଟି ଏଟିଏମ୍ରେ ଟଙ୍କା ଭର୍ତ୍ତି କରିବା ପାଇଁ ଷ୍ଟେଟ୍ ବ୍ୟାଙ୍କ ମୁଖ୍ୟ ଶାଖାରୁ ୪୦ ଲକ୍ଷ ଟଙ୍କା ନେଇଥିଲେ। ମାତ୍ର ସେମାନେ ଉକ୍ତ ଟଙ୍କା ଏଟିଏମ୍ରେ ଭର୍ତ୍ତି କରି ନ ଥିବା ସଂସ୍ଥାର ଡେପୁଟି ମ୍ୟାନେଜର ତାପସ କୁମାର ମହାନ୍ତି ଜାଣିବାକୁ ପାଇଥିଲେ। ଉକ୍ତ ଟଙ୍କା ହେରଫେର ହୋଇଥିବା ନେଇ ସେ ଗତ ୧୨ତାରିଖରେ ଟାଉନ ଥାନାରେ ଅଭିଯୋଗ କରିଥିଲେ। ପୋଲିସ କେସ୍ ନଂ. ୧୮୬/୧୯ରେ ଏକ ମାମଲା ରୁଜୁକରି ତନାଘନା ଚଳାଇଥିଲା।