ନିଶ୍ଚିନ୍ତକୋଇଲି,୨୪।୩(ସ୍ବ.ପ୍ର)- ଭାରତରେ କରୋନା ଭୂତାଣୁ ସଂକ୍ରମଣ ବଢିବାରେ ଲାଗିଛି। ରାଜ୍ୟ ସରକାରଙ୍କ ନିର୍ଦ୍ଦେଶ ପରେ ସାରା ରାଜ୍ୟକୁ ଲକ୍ଡାଉନ୍ କରିଦିଆଯାଇଛି। ଏହି ସମୟରେ ଜରୁରିକାଳୀନ ସେବା ହିସାବରେ ପରିବା ଦୋକାନ, ଔଷଧ ଦୋକନ, ବ୍ୟାଙ୍କ ଭଳି ଏଟିଏମ୍ ସେବା ଚାଲୁ ରଖିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ମାତ୍ର କଟକ ଜିଲା ନିଶ୍ଚନ୍ତକୋଇଲି ବ୍ଲକର ଅଧିକାଂଶ ଏଟିଏମ୍ରେ ସାନିଟାଇଜର ବ୍ୟବସ୍ଥା ନାହିଁ। ଫଳରେ କରୋନା ସଂକ୍ରମଣ ବ୍ୟାପିବା ଆଶଙ୍କା ସୃଷ୍ଟି ହୋଇଛି। ନିଶ୍ଚିନ୍ତକୋଇଲି ବଜାରରେ ୬ରୁ ଊର୍ଦ୍ଧ୍ୱ ବ୍ୟାଙ୍କ ଏଟିଏମ୍ ରହିଛି। ସେହିପରି ବ୍ଲକର କେନ୍ଦୁପାଟଣା, କଟିକଟା, ଶୁକରପଡା,ନେମାଳ ଓ ବିଲହାଟ ଆଦି ବ୍ୟବସାୟିକ ପେଣ୍ଠସ୍ଥଳରେ ଏକାଧିକ ଏଟିଏମ୍ ରହିଛି। ଲକ୍ଡାଉନ୍ ହେବା ପରେ ବାହାର ରାଜ୍ୟ ଓ ବିଦେଶରୁ ଆସିଥିବା ଲୋକେ ରାସ୍ତାକଡ଼ରେ ଥିବା ଏଟିଏମ୍ଗୁଡିକୁ ବ୍ୟବହାର କରୁଛନ୍ତି। ଏଥିସହ ସ୍ଥାନୀୟ ଲୋକେ ମଧ୍ୟ ଟଙ୍କା କାରବାର ନିମନ୍ତେ ଏସବୁ ଏଟିଏମ୍ ଉପରେ ନିର୍ଭର କରୁଛନ୍ତି। ମାତ୍ର ଅଧିକାଂଶ ଏଟିଏମ୍ କାଉଣ୍ଟରଗୁଡ଼ିକରେ ସାନିଟାଇଜର ବ୍ୟବସ୍ଥା ନ ଥିବା ବେଳେ ପୂର୍ବରୁ କାଉଣ୍ଟରଗୁଡିକୁ ଜଗି ରହୁଥିବା ସିକ୍ୟୁରିଟି ଗାର୍ଡମାନଙ୍କୁ ମଧ୍ୟ ହଟାଇ ଦିଆଯାଇଛି। ଏନେଇ କରୋନା ସଂକ୍ରମଣ ବ୍ୟାପିବା ଆଶଙ୍କାରେ ଲୋକେ ଭୟଭୀତ ହୋଇଯାଇଛନ୍ତି।
ଏ ସମ୍ପର୍କରେ ଏସ୍ବିଆଇ କେନ୍ଦୁପାଟଣା ଶାଖା ପରିଚାଳକ ସୁଶାନ୍ତ କୁମାର ସରାପ କୁହନ୍ତି, ଏସବିଆଇ ଏଟିଏମ୍କୁ ପରିଚାଳନା କରୁଥିବା ଅଧିକାରୀମାନଙ୍କୁ ଦୈନିକ ପ୍ରତି ଏଟିଏମ୍କୁ ସାନିଟାଇଜ୍ କରିବାକୁ ନିର୍ଦ୍ଦେଶ ଦିଆଯାଇଛି। ସେଠାରେ ସାନିଟାଇଜର ବ୍ୟବସ୍ଥା କରିବାକୁ କୁହାଯାଇଛି। ଏଥିସହ ବ୍ୟାଙ୍କ ଖୋଲା ରହୁଥିବାରୁ ପାଖରେ ଥିବା ଏଟିଏମ୍କୁ ବନ୍ଦ କରି ଦିଆଯାଇଛି।