ନୂଆଦିଲ୍ଲୀ: ଦୀର୍ଘ ୫ମାସ ହେଲା ପୃଥିବୀବାସୀଙ୍କୁ କଲବଲ କରୁଛି କରୋନା। ଏହାର ଭୟଙ୍କର ପ୍ରକୋପରେ ଆଣ୍ଠେଇବାକୁ ବାଧ୍ୟ ହୋଇଛନ୍ତି ଆମେରିକା, ରୁଷିଆ, ଜର୍ମାନୀ, ସ୍ପେନ୍, ବ୍ରିଟେନ୍ ଭଳି ମହାଶକ୍ତି। ଭୂତାଣୁର ପରିବର୍ତ୍ତନଶୀଳ ପ୍ରକୃତି ଲାଗି ଆଗାମୀ ଦିନରେ କରୋନା ପ୍ରତିଷେଧକ ବାହାରିବ କି ନାହଁ, ତାହାକୁ ନେଇ ଦ୍ୱନ୍ଦ୍ୱ ବଢ଼ିବାରେ ଲାଗିଛି। ଏପରି ସମୟରେ ଏଡ୍ସ ରୋଗୀଙ୍କୁ ନେଇ ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ନୂଆ ତଥ୍ୟ ଦେଇଛି। ନୋଭେଲ କରୋନା ଭାଇରସ୍ ଲାଗି ଆଫ୍ରିକୀୟ ଦେଶରେ ୫ ଲକ୍ଷ ଏଡ୍ସ ଆକ୍ରାନ୍ତଙ୍କ ଜୀବନ ଯାଇପାରେ ବୋଲି ଏକ ଷ୍ଟଡି ରିପୋର୍ଟରେ କୁହାଯାଇଛି।
ଡବ୍ଲ୍ୟଏଚ୍ଓ ଏବଂ ୟୁଏନ୍ଏଡ୍ସ ପକ୍ଷରୁ ପ୍ରସ୍ତୁତ ମଡେଲରେ ଅନୁମାନ କରାଯାଇଛି ଯେ, ଆସନ୍ତା ୬ମାସ ଭିତରେ ୪୬ ଆଫ୍ରିକୀୟ ଦେଶର ହାରାହାରି ୫ ଲକ୍ଷ ଏଡ୍ସ ଆକ୍ରାନ୍ତ ରୋଗୀ ମୃତ୍ୟୁମୁଖରେ ପଡ଼ିବେ। ଯଦି ଏହି ଅନୁମାନ ଠିକ୍ ହୁଏ, ତା’ହେଲେ ୨୦୦୮ର ଏଡ୍ସ ଆକ୍ରାନ୍ତଜନିତ ମୃତ୍ୟୁସଂଖ୍ୟା ରେକର୍ଡ ଭାଙ୍ଗିବ। ଏହାର କାରଣ ସମ୍ପର୍କରେ ରିପୋର୍ଟରେ ଦର୍ଶାଯାଇଛି, ୨୦୧୮ରେ ଦକ୍ଷିଣ ଆଫ୍ରିକୀୟ (ସବ୍-ସାହାରା) ଦେଶଗୁଡ଼ିକରେ ଆନୁମାନିକ ୨କୋଟି ୫୭ ଲକ୍ଷ ଲୋକ ଏଡ୍ସ ଆକ୍ରାନ୍ତ ହୋଇଥିଲେ। ସେମାନଙ୍କ ମଧ୍ୟରୁ ୬୪% ଲୋକ ଆଣ୍ଟିରେଟ୍ରୋ ଭାଇରାଲ୍ (ଏଆର୍ଭି) ଥେରାପି ନେଉଥିଲେ। ହେଲେ କରୋନା ଭାଇରସ୍ ପ୍ରକୋପ ଯୋଗୁ ଏବେ ଅଧିକାଂଶ ଏଚ୍ଆଇଭି କ୍ଲିନିକ୍ ବନ୍ଦ ହୋଇଯାଇଛି। ଫଳରେ ଏଡ୍ସ ଆକ୍ରାନ୍ତ ନିଜର ଥେରାପି ବନ୍ଦ କରିବାକୁ ବାଧ୍ୟ ହୋଇଛନ୍ତି। ଯଦି ଏପରି କିଛିଦିନ ଲାଗି ରହେ ତେବେ ରୋଗୀଙ୍କ ଶରୀରରେ ଭୂତାଣୁ ମାଡ଼ିଯିବେ। ଏହି ସମୟରେ ସଂକ୍ରମିତ ବ୍ୟକ୍ତି ଅନ୍ୟ କାହାର ସଂସ୍ପର୍ଶରେ ଆସିଲେ ସଂକ୍ରମଣ ମାମଲା ଭୟଙ୍କର ଭାବେ ବୃଦ୍ଧି ପାଇବ। ସଂଖ୍ୟାଧିକ ରୋଗୀ ଆବଶ୍ୟକ ଚିକିତ୍ସା ସୁବିଧା ନ ପାଇ ମୃତ୍ୟୁମୁଖରେ ପଡ଼ିବେ ବୋଲି ରିପୋର୍ଟରେ ଦର୍ଶାଯାଇଛି।
ଗତ ଦଶନ୍ଧି ମଧ୍ୟରେ ଆଫ୍ରିକୀୟ ଶିଶୁଙ୍କ ମଧ୍ୟରେ ଏଚ୍ଆଇଭି ସଂକ୍ରମଣ ହାର ୪୩ ପ୍ରତିଶତ ହ୍ରାସ ପାଇଛି। ଏହି ସଫଳତାର ଶ୍ରେୟ ଏଆର୍ଭିକୁ ଦିଆଯାଉଛି। ହେଲେ ଏଆର୍ଭି ଥେରାପି ନ ମିଳିଲେ ମୋଜାମ୍ବିକ୍ରେ ୩୭%, ମଲାଓ୍ବିରେ ୭୮%, ଜିମ୍ବାଓ୍ବେରେ ୭୮% ଏବଂ ଉଗାଣ୍ଡାରେ ୧୦୪% ଶିଶୁ ଏଚ୍ଆଇଭି ଆକ୍ରାନ୍ତ ହେବେ ବୋଲି ଆଶଙ୍କା କରାଯାଉଛି। ଏ ସମ୍ପର୍କରେ ୟୁଏନ୍ଏଡ୍ସର କାର୍ଯ୍ୟକାରୀ ନିର୍ଦ୍ଦେଶକ ବିନି ବୟାନିମା କୁହନ୍ତି, କୋଭିଡ୍-୧୯ ମହାମାରୀ ଲାଗି ଏଚ୍ଆଇଭିକୁ ଅଣଦେଖା କରାଯିବା ଅନୁଚିତ। ସେହିପରି ଡବ୍ଲ୍ୟଏଚ୍ଓ ପକ୍ଷରୁ କୁହାଯାଇଛି, ଏଡ୍ସ, ଯକ୍ଷ୍ମା, ମ୍ୟାଲେରିଆ ସମେତ ଅନ୍ୟ ଘାତକ ରୋଗରେ ପୀଡ଼ିତ ରୋଗୀଙ୍କ ଲାଗି କରୋନା ବିପଜ୍ଜନକ ସାବ୍ୟସ୍ତ ହୋଇପାରେ। ଜଟିଳ ରୋଗରେ ଆକ୍ରାନ୍ତ ରୋଗୀ କରୋନା ସଂକ୍ରମଣରୁ ହୁଏତ ବର୍ତ୍ତିଯାଇପାନ୍ତି, ହେଲେ ସେମାନେ ଊଣା ଅଧିକେ ନିଶ୍ଚିତ ଭାବେ ପ୍ରଭାବିତ ହେବେ।