ପୁରୀ ଅଫିସ,୧୩ା୫: ଜୁନ୍ ୨୩ରେ ରଥଯାତ୍ରା। ଏଥିପାଇଁ ଆରମ୍ଭ ହୋଇଗଲାଣି ପ୍ରଶାସନିକ ପ୍ରସ୍ତୁତି। ରଥଖଳାରେ ତିନିରଥ ନିର୍ମାଣ ଆଗେଇ ଚାଲିଥିବାବେଳେ ରଥ ଦଉଡ଼ି ପାଇଁ ଓଡ଼ିଶା କତା ନିଗମ ସହ ଆଲୋଚନା କରିଛି ଶ୍ରୀମନ୍ଦିର ପ୍ରଶାସନ। ମଙ୍ଗଳବାର ଓଡ଼ିଶା କତା ନିଗମର ଅଧିକାରୀ ଶ୍ରୀମନ୍ଦିର ନୀତି ପ୍ରଶାସକଙ୍କ ସହ ଆଲୋଚନା କରିଛନ୍ତି। ମନ୍ଦିର ପକ୍ଷରୁ ଏଥର ୧୨ଲକ୍ଷ ଟଙ୍କାରେ ୨୦ଟି ଦଉଡ଼ି ପାଇଁ ନିଗମକୁ ଅର୍ଡର ଦିଆଯାଇଛି। ଏଥିମଧ୍ୟରେ ୧୪ଟି ରଥ ଟଣା ଦଉଡ଼ି ଏବଂ ୬ଟି କର୍ଡ଼ନ (ଘେର) ଦଉଡ଼ି ରହିଥିବା ଜଣାପଡିଛି। ବୁଧବାରଠାରୁ ଚନ୍ଦନପୁର ନିକଟସ୍ଥ ବୀରପ୍ରତାପପୁରଠାରେ ଥିବା ଓଡ଼ିଶା କତା ନିଗମ ଫ୍ୟାକ୍ଟ୍ରିରେ ଏହି ଦଉଡ଼ି ତିଆରି ଆରମ୍ଭ ହେବ। ୧୫ଜଣ କର୍ମଚାରୀ ଶୁଦ୍ଧପୁତ ଭାବେ ମୁହଁରେ ମାସ୍କ ଏବଂ ସାନିଟାଇଜର ବ୍ୟବହାର କରି ଦଉଡ଼ି ତିଆରି କରିବେ। ସ୍ନାନ ପୂର୍ଣ୍ଣିମା ପୂର୍ବରୁ ଦଉଡ଼ିଗୁଡ଼ିକ ଶ୍ରୀମନ୍ଦିର ପ୍ରଶାସନକୁ ପ୍ରଦାନ କରାଯିବ ବୋଲି ନିଗମର ଅଧିକାରୀ କହିଛନ୍ତି।