ମୁମ୍ବାଇ, ୧୩ା୮ (ପି.ଟି.)-ନ୍ୟାଶନାଲ କ୍ରିକେଟ ଏକାଡେମୀ (ଏନସିଏ)ର ମୁଖ୍ୟ ଭାବେ ରାହୁଲ ଡ୍ରାଭିଡଙ୍କୁ ନିଯୁକ୍ତି ଦିଆଯିବାରେ କୌଣସି ତ୍ରୁଟି ନ ଥିବା ପ୍ରଶାସକ କମିଟି(ସିଓଏ) କହିଛି। ପୂର୍ବତନ ଭାରତ ଅଧିନାୟକ ସ୍ବାର୍ଥ ନିହିତ ଦ୍ୱନ୍ଦ୍ୱ (କନଫ୍ଲିକ୍ଟ ଅଫ୍ ଇଣ୍ଟରେଷ୍ଟ) ପରିଧିକୁ ଆସୁନାହାନ୍ତି। ତେବେ ବର୍ତ୍ତମାନ ଏ ସମ୍ପର୍କରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓମ୍ବୁଡ୍ସମ୍ୟାନ ତଥା ଏଥିକ୍ସ ଅଫିସର ଡି.କେ. ଜୈନ ଯାହା ନିଷ୍ପତ୍ତି ନେବେ ବୋଲି ସିଏଓର ନୂଆ ସଦସ୍ୟ ରବି ଥୋଗ୍ଡେ କହିଛନ୍ତି। ଡ୍ରାଭିଡ ହେଉଛନ୍ତି ଭରତୀୟ କ୍ରିକେଟର ଅନ୍ୟତମ ସମ୍ମାନଜନକ ବ୍ୟକ୍ତିବିଶେଷ। ସେ ଇଣ୍ଡିଆ ସିମେଣ୍ଟ୍ସର ଜଣେ କର୍ମଚାରୀ। ଏହି କମ୍ପାନୀ ଆଇପିଏଲ ଟିମ୍ ଚେନ୍ନାଇ ସୁପର କିଙ୍ଗ୍ସର ମାଲିକ। ତେଣୁ ଏନସିଏରେ ତାଙ୍କ ନିଯୁକ୍ତି ସ୍ବାଥର୍ବ ନିହିତ ଦ୍ୱନ୍ଦ୍ୱ ପରିସ୍ଥିତି ସୃଷ୍ଟି କରିଥିଲା। ମଙ୍ଗଳବର ସିଓଏ ବୈଠକ ପୂର୍ବରୁ ଡ୍ରାଭିଡ଼ ମୁମ୍ବାଇରେ ଥିଲେ। ସେ ଜୈନଙ୍କ ନିକଟକୁ ତାଙ୍କ ଜବାବ ପଠାଇଥିଲେ। କିନ୍ତୁ ସେ ତାଙ୍କ ପଦବୀରୁ ଇସ୍ତଫା ପ୍ରଦାନ କରିଛନ୍ତି କି ନା ତାହା ସ୍ବଷ୍ଟ ହୋଇନାହିଁ। ନିଯୁକ୍ତି ବେଳେ ପ୍ରଶାସକ କମିଟି ଡ୍ରାଭିଡଙ୍କୁ ସ୍ପଷ୍ଟ କରିଥିଲା ଯେ, ଏନ୍ସିଏରେ କାର୍ଯ୍ୟକାଳ ଶେଷ ନ ହେବା ପର୍ଯ୍ୟନ୍ତ ଡ୍ରାଭିଡଙ୍କୁ ଇଣ୍ଡିଆ ସିମେଣ୍ଟ୍ସର ଉପ ସଭାପତି ପଦବୀରୁ ଇସ୍ତଫା ଦେବକୁ ପଡ଼ିବ ନତୁବା ସେ ପର୍ଯ୍ୟନ୍ତ ଛୁଟିରେ ରହିବାକୁ ପଡ଼ିବ। ଡ୍ରାଭିଡ କିନ୍ତୁ ତାଙ୍କ ପଦବୀରୁ ଇସ୍ତଫା ପ୍ରଦାନ ନ କରି ଇଣ୍ଡିଆ ସିମେଣ୍ଟ୍ସରୁ ବିନା ବେତନରେ ଛୁଟି ଚାହିଁଥିଲେ। ଏହାକୁ ନେଇ ଏମପିସିଏ ଆଜୀବନ ସଦସ୍ୟ ସଞ୍ଜୀବ ଗୁପ୍ତା ଡ୍ରାଭିଡ଼ଙ୍କ ବିରୋଧରେ ସ୍ବାର୍ଥ ନିହିତ ଦ୍ୱନ୍ଦ୍ୱ ଅଭିଯୋଗ ଅଣିଥିଲେ।