ନୂଆଦିଲ୍ଲୀ,୨ା୬: ଏନ୍ସିଇଆର୍ଟି ଦଶମ ଶ୍ରେଣୀ ପାଠ୍ୟପୁସ୍ତକରୁ ଗୋଟିଏ ପରେ ଗୋଟିଏ ଗୁରୁତ୍ୱପୂର୍ଣ୍ଣ ବିଷୟ ବାଦ୍ ଦେଇ ଚାଲିଛି। ସରକାରୀ ପାଠ୍ୟପୁସ୍ତକରେ ଦଶମ ଶ୍ରେଣୀ ଛାତ୍ରୀଛାତ୍ର ପର୍ଯ୍ୟାୟ ସାରଣୀ, ଗଣତନ୍ତ୍ର ଓ ଶକ୍ତିର ଉତ୍ସ ବିଷୟ ଆଉ ପଢ଼ିବାକୁ ପାଇବେ ନାହିଁ। ପିଲାଙ୍କ ଉପରୁ ପାଠପଢ଼ା ବୋଝ କମାଇବା ନାଁରେ ସୁବ୍ୟବସ୍ଥୀକରଣର ଅଂଶ ସ୍ବରୂପ ଏହି ଅଧ୍ୟାୟଗୁଡ଼ିକୁ ସମ୍ପୂର୍ଣ୍ଣ ହଟାଇ ଦିଆଯାଇଛି। ପୂର୍ବରୁ ଦଶମ ଶ୍ରେଣୀ ପାଠ୍ୟକ୍ରମରୁ ଡାର୍ଓ୍ବିନ୍ଙ୍କ ବିବର୍ତ୍ତନ ତତ୍ତ୍ୱକୁ ବାଦ୍ ଦିଆଯିବା ନେଇ ବିବାଦ ସୃଷ୍ଟି ହୋଇଥିଲା। ନିକଟରେ ଏନ୍ସିଇଆର୍ଟି ପ୍ରକାଶ କରିଥିବା ପାଠ୍ୟପୁସ୍ତକରେ ପର୍ଯ୍ୟାୟ ସାରଣୀ (ପିରିଅଡିକ୍ ଟେବୁଲ) ସମେତ ବିଭିନ୍ନ ଅଧ୍ୟାୟ କାଟିଦିଆଯାଇଛି। ବିଜ୍ଞାନ ବିଷୟରୁ ବାଦ୍ ପଡ଼ିଥିବା ଅନ୍ୟ ଅଧ୍ୟାୟ ମଧ୍ୟରେ ରହିଛି ପରିବେଶୀୟ ସ୍ଥିରତା ଏବଂ ଶକ୍ତିର ଉତ୍ସ। ଗଣତନ୍ତ୍ର, ଗଣତନ୍ତ୍ର ପ୍ରତି ରହିଥିବା ବିଭିନ୍ନ ଚ୍ୟାଲେଞ୍ଜ ଏବଂ ରାଜନୈତିକ ଦଳ ଅଧ୍ୟାୟକୁ ଦଶମ ଶ୍ରେଣୀ ପାଠ୍ୟପୁସ୍ତକର ସଂଶୋଧିତ ସଂସ୍କରଣରୁ ବାଦ୍ ଦିଆଯାଇଛି।