ପୁରୀ ଅଫିସ, ୩୦ା୧: ଦେଶର ଭବିଷ୍ୟତ କୁହାଯାଉଥିବା ଯୁବଶକ୍ତିି ଆଜି ଦିଶାହୀନ ହୋଇ ବୁଲୁଛନ୍ତି। ଦେଶରେ ଶିକ୍ଷିତ ବେକାରୀଙ୍କ ସଂଖ୍ୟା ବଢି ଚାଲିଛି। ଗତ ୪୫ବର୍ଷ ତୁଳନାରେ ବେକାରୀ ହାର ସର୍ବାଧିକ ରହିଛି। ପ୍ରତିବର୍ଷ ୨ଲକ୍ଷ ଯୁବତୀ ଯୁବକଙ୍କୁ ନିଯୁକ୍ତି ଦିଆଯିବ ବୋଲି କେନ୍ଦ୍ର ସରକାର ପ୍ରତିଶ୍ରୁତି ଦେଇ ଯୁବସମାଜକୁ ପ୍ରତାରିତ କରିଛନ୍ତି। ନିଯୁକ୍ତି ହାର ହ୍ରାସ ପାଇବାରେ ଲାଗିଛି। କେନ୍ଦ୍ର ସରକାର ଯୁବ ସମାଜକୁ ରୋଜଗାର ଦେଇପାରୁ ନ ଥିବା ବେଳେ ଧର୍ମ ଆଳରେ ନ୍ୟାଶନାଲ ରେଜିଷ୍ଟ୍ରାର ଅଫ୍ ସିଟିଜେନଶିପ୍ (ଏନ୍ଆର୍ସି) ପଛରେ ପଡ଼ିିଛନ୍ତି। ନାଗରିକତା ସଂଶୋଧନ ଆଇନ (ସିଏଏ), ଏନ୍ଆର୍ସି ଆଳରେ ଅରାଜକତା ସୃଷ୍ଟି କରୁଛନ୍ତି। ଏହାକୁ ଯୁବ କଂଗ୍ରେସ ତୀବ୍ର ବିରୋଧ କରୁଛି। ଏ ନେଇ ଭାରତୀୟ ଯୁବ କଂଗ୍ରେସ ନ୍ୟାଶନାଲ ରେଜିଷ୍ଟ୍ରାର ଅଫ ଅନ୍ଏମ୍ପ୍ଲୋୟମେଣ୍ଟ (ଏନ୍ଆର୍ୟୁ) ପ୍ରଚାର ଅଭିଯାନ ଆରମ୍ଭ କରିଛି। ଦେଶରେ ଏନ୍ଆର୍ସି ନୁହେଁ ଏନ୍ଆର୍ୟୁ ଆବଶ୍ୟକ ବୋଲି ବୁଧବାର ପୁରୀ କଂଗ୍ରେସ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଏଆଇସିସି ସଦସ୍ୟ ସୁଜିତ ମହାପାତ୍ର କହିଛନ୍ତି।
ସେ କହିଛନ୍ତି, ଏକ ସର୍ଭେ ଅନୁସାରେ ଦେଶରେ ୪୧ ପ୍ରତିଶତ ଡିଗ୍ରୀଧାରୀ ଯୁବତୀ ଯୁବକ ବେକାର ଅଛନ୍ତି। ଶିକ୍ଷା ବ୍ୟବସ୍ଥା ଭୁଶୁୁଡ଼ିି ପଡ଼ିିଛି। ସିଏମ୍ଆଇଇ ସର୍ବେକ୍ଷଣ ଅନୁଯାୟୀ, ଦେଶରେ ଗତ ୫ବର୍ଷରେ ୫ କୋଟି ଯୁବତୀ ଯୁବକ ବେରୋଜଗାର ଅଟନ୍ତି। ନ୍ୟାଶନାଲ କ୍ରାଇମ ରେକର୍ଡ ବ୍ୟୁରୋ (ଏନ୍ସିଆର୍ବି) ରିପୋର୍ଟ ମୁତାବକ, ୨୦୧୭-୧୮ରେ ଦେଶରେ ବେରୋଜଗାରୀଙ୍କ ଆତ୍ମହତ୍ୟା କୃଷକଙ୍କ ଆତ୍ମହତ୍ୟାଠାରୁ ଅଧିକ। କେନ୍ଦ୍ର ସରକାରଙ୍କ ବିମୁଦ୍ରୀକରଣ ଯୋଗୁ ଲକ୍ଷାଧିକ ବ୍ୟକ୍ତି ରୋଜଗାର ହରାଇଛନ୍ତି। ସେହିପରି ଓଡ଼ିଶାରେ ମଧ୍ୟ ଶିକ୍ଷିତ ଯୁବକ କାମଧନ୍ଦା ନ ପାଇ ଦାଦନ ଖଟିବାକୁ ଅନ୍ୟ ରାଜ୍ୟକୁ ଚାଲିଯାଉଛନ୍ତି। ଯୁବ କଂଗ୍ରେସ ଏ ନେଇ ସଚେତନତା ପାଇଁ ଅଭିଯାନ ଆରମ୍ଭ କରିଛି। ଗ୍ରାମପଞ୍ଚାୟତରୁ ଜିଲାସ୍ତର ପର୍ଯ୍ୟନ୍ତ ବେକାର ଯୁବତୀ ଯୁବକଙ୍କ ମତାମତ ସଂଗ୍ରହ କରାଯିବ। ଯୁବ କଂଗ୍ରେସ ପକ୍ଷରୁ ଜାରି ଟୋଲ୍ ଫ୍ରି ନମ୍ବର ୮୧୫୧୯୯୪୪୧୧ରେ ମିସ୍କଲ୍ ଦେଇ ନିଜ ନାମ ପଞ୍ଜୀକରଣ କରାଯାଇପାରିବ। ଏହି ଖବରଦାତା ସମ୍ମିିଳନୀରେ ଲୋକ ସଭା ଯୁବ କଂଗ୍ରେସ ସଭାପତି ଇଂ. ଶେଖ ସଫିକ୍ଉଦ୍ଦିନ, ଲୋକସଭା ଯୁବ କଂଗ୍ରେସ କମିଟି ସାଧାରଣ ସମ୍ପାଦକ ବିଶ୍ୱନାଥ ଦାଶ, ପୁରୀ ବିଧାନସଭା କଂଗ୍ରେସ କମିଟି ସଭାପତି ପ୍ରେମଜିତ୍ ମହାନ୍ତି, ଲୋକସଭା ଯୁବ କଂଗ୍ରେସ କମିଟି ଉପସଭାପତି ସ୍ମୃତିରଞ୍ଜନ ପତି, ଅବିନାଶ ମିଶ୍ର, ଚନ୍ଦ୍ରଶେଖର କର, ଛାତ୍ର କଂଗ୍ରେସ ରାଜ୍ୟ ସଂଯୋଜକ ବିଶ୍ୱରଞ୍ଜନ ମହାପାତ୍ର ଏବଂ ସର୍ବେଶ୍ୱର ସ୍ବାଇଁ ପ୍ରମୁଖ ଉପସ୍ଥିତ ଥିଲେ।