ନୂଆଦିଲ୍ଲୀ, ୧୧।୬: ତାମିଲନାଡୁ ଏନ୍ଇଇଟି ରିଜର୍ଭେଶନ ମାମଲାରେ ସୁପ୍ରିମ୍କୋର୍ଟ(ଏସ୍ସି) ଗୁରୁବାର କହିଛନ୍ତି ଯେ, ସଂରକ୍ଷଣ ଏକ ମୌଳିକ ଅଧିକାର ନୁହେଁ। ଏନ୍ଇଇଟି ପୋଷ୍ଟ ଗ୍ରାଜୁଏଶନ୍ ମାମଲାର ଶୁଣାଣି ସମୟରେ ସୁପ୍ରିମ୍କୋର୍ଟ ଏଭଳି କହି କେତେକ ରାଜନୈତିକ ଦଳ ପକ୍ଷରୁ ଦାଖଲ କରାଯାଇଥିବା ଆବେଦନକୁ ସ୍ବୀକାର କରିବାକୁ ମନା କରିଦେଇଛନ୍ତି। ଡିଏମ୍କେ, ସିପିଆଇ, ଏଆଇଏଡିଏମ୍କେ ପକ୍ଷରୁ ରାଜ୍ୟର ଏନ୍ଇଇଟି ମେଡିକାଲ ପୋଷ୍ଟ ଗ୍ରାଜୁଏଶନ୍ ସିଟ୍ରେ ଓବିସିଙ୍କ ପାଇଁ ୫୦ ପ୍ରତିଶତ ସିଟ୍ ସଂରକ୍ଷଣ ପାଇଁ ଦାବି କରାଯାଇ ଏକ ଆବେଦନ ଦାଖଲ ହୋଇଥିଲା। ଏହାର ଶୁଣାଣି କରି ବିଚାରପତି ଏଲ୍. ନାଗେଶ୍ୱର ରାଓ, କ୍ରିଷ୍ଣା ମୁରାରି ଏବଂ ଏସ୍. ରବିନ୍ଦ୍ର ଭଟ୍ଟଙ୍କ ଦ୍ୱାରା ଗଠିତ ଖଣ୍ଡପୀଠ ଏଭଳି କହିଛନ୍ତି। ୨୦୨୦-୨୧ ଏନ୍ଇଇଟି ପୋଷ୍ଟଗ୍ରାଜୁଏଟ୍ ମେଡିକାଲ ଏବଂ ଡେଣ୍ଟାଲ ପାଠ୍ୟକ୍ରମରେ ସଂରକ୍ଷଣ ଦାବି ନେଇ ଡିଏମ୍କେ, ସିପିଆଇ ଏବଂ ଏଆଇଏଡିଏମ୍କେ ସୁପ୍ରିମ୍କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ପୂର୍ବରୁ ଏହି ସଂରକ୍ଷଣ ଦାବିକୁ କେନ୍ଦ୍ର ସରକାରଙ୍କ ପକ୍ଷରୁ ଅଗ୍ରାହ୍ୟ କରାଯାଇଥିଲା।
