କଟକ ଅଫିସ,୨୫ା୧: ଏସ୍ସିବି ମେଡିକାଲକୁ ବିଶ୍ୱସ୍ତରୀୟ କରିବା ନିମନ୍ତେ ତତ୍ପରତା ଜୋର ଧରିଛି। ବୁଧବାର ଭୋରରୁ ୫-ଟି ସଚିବ, ଗୁରୁବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଟକ ଗସ୍ତ କରି ସମୀକ୍ଷା କରିବା ପରେ ଶୁକ୍ରବାର ସ୍ବାସ୍ଥ୍ୟ ସଚିବ ନିକୁଞ୍ଜ ବିହାରୀ ଧଳ ଏସ୍ସିବି ମେଡିକାଲ ଆସିଥିଲେ। ମେଡିକାଲ କଲେଜ ପ୍ରିନ୍ସିପାଲଙ୍କ ସମ୍ମିଳନୀ କକ୍ଷରେ ସଚିବ ଧଳ ମେଡିକାଲର ସମସ୍ତ ବିଭାଗୀୟ ମୁଖ୍ୟ ପ୍ରଫେସରଙ୍କ ସହିତ ୧ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଆଲୋଚନା କରିଥିଲେ। ବୈଠକରେ ସ୍ବାସ୍ଥ୍ୟ ବିଭାଗର ଯୁଗ୍ମ ସଚିବ ଗୁହା ପୁନମ ତାପସ କୁମାର, ଡିଏମ୍ଇଟି ପ୍ରଫେସର ସିବିକେ ମହାନ୍ତି, ପ୍ରିନ୍ସିପାଲ ପ୍ରଫେସର ଜୟଶ୍ରୀ ମହାନ୍ତି, ଅଧୀକ୍ଷକ ପ୍ରଫେସର ସରୋଜ ସାହୁ ଓ ପ୍ରଶାସନିକ ଅଧିକାରୀ କଳ୍ପତରୁ ବେହେରା ପ୍ରମୁଖ ଉପସ୍ଥିତ ଥିଲେ। ବୈଠକରେ ନିର୍ଯାସ ଅନୁଯାୟୀ, ଏସ୍ସିବି ସମେତ ରାଜ୍ୟର ଅନ୍ୟ ମେଡିକାଲ କଲେଜ ଓ ହସ୍ପିଟାଲଗୁଡ଼ିକୁ ଏନ୍ଏବିଏଲ୍ (ନ୍ୟାଶନାଲ ଆକ୍ରିଡେଶନ ବୋର୍ଡ ଫର ଲାବରେଟୋରିଜ୍) ସହିତ ସହବନ୍ଧିତ କରାଯିବ। ମେଡିକାଲ କଲେଜଗୁଡ଼ିକରେ ହେଉଥିବା ବିଭିନ୍ନ ପରୀକ୍ଷା ନିରୀକ୍ଷାର ଗୁଣାତ୍ମକ ମାନ ଠିକ୍ ରହୁଛି କି ନାହିଁ ତା’ର ନିର୍ଦ୍ଧାରଣ ଉକ୍ତ ସଂସ୍ଥା କରିବ। ଏହାବାଦ କେତେଗୁଡ଼ିଏ ପରୀକ୍ଷା ନିମନ୍ତେ ଆବଶ୍ୟକ କରୁଥିବା ଯନ୍ତ୍ରପାତିର ଦାମ୍ ବହୁତ ଅଧିକ ରହୁଛି। ମାତ୍ର ଉକ୍ତ ପରୀକ୍ଷାର ଆବଶ୍ୟକତା ଯଥେଷ୍ଟ କମ୍ ରହୁଛି। ତେଣୁ ଏ କ୍ଷେତ୍ରରେ ସରକାର ଅଯଥା ଖର୍ଚ୍ଚାନ୍ତ ନ ହୋଇ ମେଡିକାଲଗୁଡ଼ିକରୁ ରୋଗୀଙ୍କଠାରୁ ସାମ୍ପୁଲ ସଂଗ୍ରହ କରି ଉକ୍ତ ସଂସ୍ଥା ଜରିଆରେ ପରୀକ୍ଷା କରାଇବେ ବୋଲି ନିଷ୍ପତ୍ତି ହୋଇଛି। ସେହିପରି ଏସ୍ସିବି ମେଡିକାଲର ବିଭାଗୀୟ ମୁଖ୍ୟମାନଙ୍କୁ ଆର୍ଥିକ କ୍ଷମତା ଦେବା ନିମନ୍ତେ ବୈଠକରେ ନିଷ୍ପତ୍ତି ହୋଇଥିଲା। ଏହାବାଦ ଗୋଟିଏ ଛାତ ତଳେ କିଭଳି ସମସ୍ତ ରୋଗର ଚିକିତ୍ସା ସମ୍ଭବ ହୋଇପାରିବ ସେ ନେଇ ବୈଠକରେ ବିସ୍ତୃତ ଆଲୋଚନା ହୋଇଥିଲା। ମେଡିକାଲର ମାନବ ସମ୍ବଳ ଉପରେ ମଧ୍ୟ ଆଲୋଚନା ହୋଇଥିଲା। ଏହି ଅନୁଯାୟୀ ବର୍ତ୍ତମାନର ରୋଗୀ ଭାର ଅନୁପାତରେ ନର୍ସିଂ ଷ୍ଟାଫଙ୍କ ଆବଶ୍ୟକତା ୨୩୫୩ ଥିବାବେଳେ ୮୯୪ ଜଣ ଥିବା ଜଣାପଡ଼ିଛି। ସେହିପରି ଗ୍ରୁପ ଡି’ କର୍ମଚାରୀଙ୍କ ଆବଶ୍ୟକତା ୩୯୨୧ ଥିବାବେଳେ ବର୍ତ୍ତମାନ ସ୍ଥିତିରେ ୯୬୬ ଥିବା ଜଣାପଡ଼ିଛି। ଏହାବାଦ ଅନେକ ଡାକ୍ତର ଓ ପାରା ମେଡିକାଲ ଷ୍ଟାଫ ପଦବୀ ଫାଙ୍କା ପଡ଼ିଥିବାବେଳେ ସେଗୁଡିକ ପୂରଣ ପାଇଁ ବୈଠକରେ ଆଲୋଚନା ହୋଇଥିଲା। ଏହି ଅବସରରେ ଶୁକ୍ରବାରଠାରୁ ମେଡିକାଲର କାଜୁଆଲ୍ଟି ସାମ୍ନା (ଆଞ୍ଚଳିକ ନିଦାନ କେନ୍ଦ୍ର ପରିସରରେ) ଏକ ବିଏସ୍କେୱାଇ କାଉଣ୍ଟର ଖୋଲିଛି। ଆଗାମୀ ଦିନରେ ମେଡିକାଲର ବିଭିନ୍ନ ସ୍ଥାନରେ ୨୦ରୁ ଊର୍ଦ୍ଧ୍ୱ କାଉଣ୍ଟର ଖୋଲିବ ବୋଲି ବ୍ୟବସ୍ଥା କରାଯାଇଛି। ରୋଗୀମାନେ ଏଣିକି ସରକାରୀ ସହବନ୍ଧିତ ଔଷଧ ଦୋକାନକୁ ନ ଯାଇ ୨୪ଘଣ୍ଟିଆ କାର୍ଯ୍ୟକ୍ଷମ ହେବାକୁ ଥିବା ଏହି କାଉଣ୍ଟରରୁ ସମସ୍ତ ପ୍ରକାର ଔଷଧ ଓ ଉପକରଣ ପାଇପାରିବେ।