ନୂଆଦିଲ୍ଲୀ, ୧୮।୪(ପି.ଟି.)- ଦେଶରେ ଥିବା ସବୁ ଜାତୀୟ କ୍ରୀଡ଼ା ଫେଡେରେଶନ (ଏନ୍ଏସ୍ଏଫ୍) ପରିଚାଳନାରେ ସରକାର ହସ୍ତକ୍ଷେପ କରିବାର ପ୍ରଶ୍ନ ଉଠୁନାହିଁ ବୋଲି କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ କହିଛନ୍ତି। ଏନ୍ଏସ୍ଏଫ୍ଗୁଡିକର ସ୍ବାୟତ୍ତତା ପୂର୍ବପରି ବଜାୟ ରହିବ ବୋଲି ସେ ସ୍ପଷ୍ଟ କରିଛନ୍ତି।
ଏନ୍ଏସ୍ଏଫ୍ଗୁଡିକର ପରିଚାଳନାରେ କ୍ରୀଡ଼ା ମନ୍ତ୍ରଣାଳୟ ଅଯଥାରେ ହସ୍ତକ୍ଷେପ ବା ପ୍ରଭାବିତ କରିବାକୁ ପ୍ରୟାସ କରୁଛି ବୋଲି ଭାରତୀୟ ଅଲିମ୍ପିକ୍ ଆସୋସିଏଶନ (ଆଇଓଏ) ଅଧ୍ୟକ୍ଷ ନରିନ୍ଦର ବାତ୍ରା ଅଭିଯୋଗ ଆଣିବା ପରେ ରିଜିଜୁ ଏହି କଥା କହିଛନ୍ତି। ଗଣମାଧ୍ୟମଗୁଡିକରେ ମଧ୍ୟ ଏ ନେଇ ଖବର ପ୍ରକାଶିତ ହୋଇଥିଲା ଓ ଏ ନେଇ ଅବଗତ ହୋଇଥିଲି। ଯେ କୌଣସି ପରିସ୍ଥିତି ଓ ମୂଲ୍ୟରେ ଏନ୍ଏସ୍ଏଫ୍ ଗୁଡ଼ିକର ପରିଚାଳନାରେ କୌଣସି ହସ୍ତକ୍ଷେପ କରାଯିବ ନାହିଁ। ଏନ୍ଏସ୍ଏଫ୍ଗୁଡିକରେ ନ୍ୟାଶନାଲ ସ୍ପୋଟର୍ସ କୋଡ ଓ ଗୁଡ୍ ଗଭରନାନ୍ସ ରହିଛି। ଏଥିରେ ମଧ୍ୟ ନିରପେକ୍ଷତା ଓ ପାରଦର୍ଶିତା ରହିଛି। ଏନ୍ଏସ୍ଏଫ୍ଗୁଡିକୁ ଆବଶ୍ୟକ ସାହାଯ୍ୟ ଓ ସହଯୋଗ କରିବାକୁ ସରକାର ବଦ୍ଧପରିକର ଅଛନ୍ତି। ତେବେ କ୍ରୀଡ଼ାର ପ୍ରଚାର ଓ ପ୍ରସାର ସହିତ ଆମ ଆଥ୍ଲେଟମାନଙ୍କ ହିତସାଧନରେ କୌଣସି ବୁଝାମଣା କରାଯିବ ନାହିଁ ବୋଲି ରିଜିଜୁ ସ୍ପଷ୍ଟ କରିଛନ୍ତି।
ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଦ୍ୱାରା ଏନ୍ଏସ୍ଏଫ୍ର ଟାର୍ଗେଟ ଅଲିମ୍ପିକ୍ ପୋଡିୟମ (ଟପ୍ସ) ସ୍କିମ୍ ପରିଚାଳନାରେ ମନ୍ତ୍ରଣାଳୟ ହସ୍ତକ୍ଷେପ କରିବା ନେଇ ବାତ୍ର ଅଭିଯୋଗ ଆଣିଥିଲେ ଓ ଏହା ବିବାଦ ସୃଷ୍ଟି କରିଥିଲା। ତେବେ ମନ୍ତ୍ରଣାଳୟ, ଆଇଓଏ ଓ ଏନ୍ଏସ୍ଏଫ୍ଗୁଡିକର ଏକ ସାଧାରଣ ଲକ୍ଷ୍ୟ ରହିଛି। ଦେଶରେ ଏକ ସୁସ୍ଥ ତଥା ଉନ୍ନତ କ୍ରୀଡ଼ା ପରମ୍ପରା ସ୍ଥାପନ କରିବା ଓ ସର୍ବୋପରି ଭାରତକୁ ଏକ କ୍ରୀଡ଼ା ମହାଶକ୍ତିରେ ପରିଣତ କରିବା ହେଉଛି ଆମର ମୂଳ ଲକ୍ଷ୍ୟ ବୋଲି ରିଜିଜୁ କହି ଏହି ବିବାଦକୁ ଟାଳିଛନ୍ତି। ତୃଣମୂଳସ୍ତରରେ କ୍ରୀଡ଼ା ପ୍ରତିଭା ସୃଷ୍ଟି କରିବା ଉପରେ କାର୍ଯ୍ୟକରିବାର ଆବଶ୍ୟକତା ଉପରେ ରିଜିଜୁ ଗୁରୁତ୍ୱାରୋପ କରିଛନ୍ତି। ତେବେ ଏଥିପାଇଁ ଭିତ୍ତିଭୂମି, ଖାଦ୍ୟପେୟ, ବଡ଼ବଡ଼ ପ୍ରତିଯୋଗିତାର ଆୟୋଜନ କରିବାର ଆବଶ୍ୟକତା ରହିଛି। ଏହା ହୋଇପାରିଲେ ୨୦୨୮ ଅଲିମ୍ପିକ୍ସରେ ଭାରତ ପଦକ ତାଲିକାର ଶ୍ରେଷ୍ଠ ୧୦ରେ ରହିପାରିବ ବୋଲି ରିଜିଜୁ କହିଛନ୍ତି।