ନୂଆଦିଲ୍ଲୀ,୨୬ା୩(ପି.ଟି.) : ଦେଶରେ ୨୧ ଦିନିଆ ଲକ୍ଡାଉନ୍ ଯୋଗୁ ଜାତୀୟ ନାଗରିକ ପଞ୍ଜିକା (ଏନ୍ପିଆର୍) ଏବଂ ପ୍ରଥମ ପର୍ଯ୍ୟାୟ ଜନଗଣନା କାର୍ଯ୍ୟକୁ ସ୍ଥଗିତ ରଖାଯାଇଛି। ଏହି ଦୁଇ ପ୍ରକ୍ରିୟା ଏପ୍ରିଲ ୧ରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ଚାଲିବାକୁ ଥିଲା। ସେନ୍ସସ୍ ଏବଂ ଏନ୍ପିଆର୍ ପ୍ରକ୍ରିୟାରେ ଘର ଘର ବୁଲି ଲୋକଙ୍କୁ ଭେଟି ତଥ୍ୟ ସଂଗ୍ରହ ପାଇଁ ବହୁସଂଖ୍ୟକ ଜନଗଣନାକାରୀଙ୍କ ଆବଶ୍ୟକତା ଥିବାରୁ ବର୍ତ୍ତମାନ ସ୍ଥିତିରେ ଏହି କାର୍ଯ୍ୟ କରିବା ଅସମ୍ଭବ। ତେଣୁ ସରକାର ଏହାକୁ ସ୍ଥଗିତ କରିଥିବା ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ପ୍ରକାଶ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଦେଶବ୍ୟାପୀ ୨୧ ଦିନ ଧରି ଲକ୍ଡାଉନ୍ ଘୋଷଣା କରିଥିଲେ। ଏହା ଆସନ୍ତା ଏପ୍ରିଲ ୧୪ ପର୍ଯ୍ୟନ୍ତ ଜାରି ରହିବ। ଏହାକୁ ଦୃଷ୍ଟିରେ ରଖି ଏନ୍ପିଆର୍ ଏବଂ ଜନଗଣନା ୨୦୨୧କୁ ଅପ୍ଡେଟ୍ କରିବା କାର୍ଯ୍ୟକୁ ସ୍ଥଗିତ ରଖାଯାଇଥିବା ବୁଧବାର ସ୍ବରାଷ୍ଟ୍ର ମନ୍ତ୍ରଣାଳୟର ଅଧିକାରୀମାନେ ସୂଚନା ଦେଇଛନ୍ତି। ମନ୍ତ୍ରଣାଳୟ ପକ୍ଷରୁ ଜାରି ଏକ ବିବୃତିରେ କୁହାଯାଇଛି ଯେ, ସେନ୍ସସ୍-୨୦୨୧ ଦୁଇଟି ପର୍ଯ୍ୟାୟରେ ଶେଷ ହେବାର ଥିଲା। ହାଉସ୍ ଲିଷ୍ଟିଙ୍ଗ୍ ବା ଘରଗୁଡ଼ିକୁ ତାଲିକାଭୁକ୍ତ କରିବା ଏବଂ ହାଉସିଂ ସେନ୍ସସ୍ ବା ଘର ଘର ବୁଲି ଜନଗଣନା କାର୍ଯ୍ୟ ଏପ୍ରିଲ-ସେପ୍ଟେମ୍ବରରେ ହେବାର ଥିଲା। ସେହିପରି ଦ୍ୱିତୀୟ ପର୍ଯ୍ୟାୟରେ ଜନସଂଖ୍ୟା ଗଣନା ଆସନ୍ତା ବର୍ଷ ଫେବୃୟାରୀ ୯ରୁ ୨୮ରେ କରିବା ପାଇଁ ସ୍ଥିର ହୋଇଥିଲା।
ଅନୁରୂପ ଭାବେ ଏନ୍ପିଆର୍ ଅପ୍ଡେଟିଂ କାର୍ଯ୍ୟକୁ ଆସାମ ବ୍ୟତୀତ ଅନ୍ୟ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ପ୍ରଥମ ପର୍ଯ୍ୟାୟ ଜନଗଣନା ସହ ଏକସଙ୍ଗେ କରିବା ପାଇଁ ଧାର୍ଯ୍ୟ ହୋଇଥିଲା। କୋଭିଡ୍-୧୯ ଭୂତାଣୁ ସଂକ୍ରମଣ ଯୋଗୁ କେନ୍ଦ୍ର ଓ ରାଜ୍ୟ ସରକାରମାନଙ୍କ ପକ୍ଷରୁ ହାଇଆଲର୍ଟ ଜାରି କରାଯାଇଛି। ଏହାକୁ ଦୃଷ୍ଟିରେ ରଖି ପ୍ରଥମ ପର୍ଯ୍ୟାୟ ଜନଗଣନା ୨୦୨୧ ଏବଂ ଏନ୍ପିଆର୍ ଅପ୍ଡେଟିଂକୁ ସ୍ଥଗିତ ରଖାଯାଇଛି, ଯାହାକି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକର ସରକାରମାନଙ୍କ ନିଷ୍ପତ୍ତି ଅନୁଯାୟୀ ଏପ୍ରିଲ ୧ରେ ଆରମ୍ଭ ହେବାର ଥିଲା। ନୂଆ ନିର୍ଦ୍ଦେଶନାମା ଜାରି ହେବା ଯାଏ ଏହି କାର୍ଯ୍ୟକୁ ସ୍ଥଗିତ କରାଯାଇଥିବା ବିବୃତିରେ କୁହାଯାଇଛି।
ପ୍ରକାଶ ଯେ, ଏନ୍ପିଆର୍କୁ କେରଳ, ପଶ୍ଚିମବଙ୍ଗ, ପଞ୍ଜାବ, ରାଜସ୍ଥାନ, ଛତିଶଗଡ଼ ଓ ବିହାର ଭଳି ରାଜ୍ୟ ବିରୋଧ କରିଆସୁଛନ୍ତି। ତେବେ ଜନଗଣନାର ଘର ତାଲିକାଭୁକ୍ତ କରିବା ପର୍ଯ୍ୟାୟକୁ ସେମାନେ ସହଯୋଗ କରିବେ ବୋଲି କହିଛନ୍ତି। ଦେଶରେ ବସବାସ କରୁଥିବା ପ୍ରତ୍ୟେକ ସ୍ବାଭାବିକ ବାସିନ୍ଦାଙ୍କୁ ନେଇ ଏକ ବିସ୍ତୃତ ଡାଟାବେସ୍ ପ୍ରସ୍ତୁତ କରିବା ହେଉଛି ଏନ୍ପିଆର୍ର ଉଦ୍ଦେଶ୍ୟ।