ଓ୍ବାଶିଂଟନ,୧୦।୪ (ଏଏଫପି): କୋଭିଡ-୧୯ ମହାମାରୀ ସତ୍ତ୍ୱେ ଏନ୍ବିଏ ଖେଳାଳିମାନେ ଏପ୍ରିଲ ୧୫ ତାରିଖରେ ପୂରା ପାଉଣା ପାଇବେ ବୋଲି ଆମେରିକୀୟ ଗଣମାଧ୍ୟମଗୁଡିକ ସୂଚନା ଦେଇଛନ୍ତି। ତେବେ କରୋନା ଭାଇରସ୍ ସଂକ୍ରମଣ ପାଇଁ ଲିଗ୍ ଶଟ୍ ଡାଉନ ରହୁଥିବାରୁ ଭବିଷ୍ୟତରେ ପାଉଣା କଟାଯାଇପାରେ ବୋଲି କୁହାଯାଇଛି। ଖେଳାଳିମାନେ ପୂର୍ବଭଳି ଆସନ୍ତା ୧୫ ତାରିଖରେ ସେମାନଙ୍କର ପୂରା ଦରମା ପାଇବେ ବୋଲି ଇଏସ୍ପିଏନ୍ ଓ ଫିଲେଡେଲଫିଆ ଇନ୍କ୍ୱିରେର ଉଲ୍ଲେଖ କରିଛି।
ନ୍ୟାଶନାଲ ବାସ୍କେଟବଲ ପ୍ଲେୟାର୍ସ ଆସୋସିଏଶନ ଓ ଲିଗ୍ ମଧ୍ୟରେ ଦରାମା କମାଇବା ନେଇ ଆଲୋଚନା ଚାଲିଛି। ଯଦି ସେସନ ବାତିଲ ହୁଏ ତାହାଲେ ଖେଳାଳିଙ୍କ ବାକିଥିବା ପାଉଣାରେ ୨୫ ପ୍ରତିଶତ କମାଯାଇ ପାରେ ଆସୋସିଏଶନ ତରଫରୁ କୁହାଯାଇଛି। ଏନ୍ବିଏ କମିଶନର ଆଡାମ ସିଲଭର ଲିଗ୍ ଆରମ୍ଭ ହେବା ନେଇ ଏବେ କିଛି କହିହେବନି ବୋଲି କହିଛନ୍ତି। ଅତିକମ୍ରେ ମେ ପର୍ଯ୍ୟନ୍ତ ଖେଳ ସମ୍ଭବ ନୁହଁ ବୋଲି ସେ ସ୍ପଷ୍ଟ କରିଛନ୍ତି। ନିୟମିତ ଭାବେ ସେସନ ଏପ୍ରିଲ ୧୫ରେ ହିଁ ଶେଷ ହୋଇଥାଏ। ତେବେ ପ୍ଲେ ଅଫ୍ କାର୍ଯ୍ୟସୂଚୀ ୧୮ ତାରିଖରେ ଆରମ୍ଭ ହୋଇଥାଏ।