ନୂଆଦିଲ୍ଲୀ,୧। ୪: ମାସ ବଦଳିବା ସହ ପହିଲାରୁ କିଛି କିଛି ନୂଆ ନିୟମ ଏବଂ ସୁବିଧା କାର୍ଯ୍ୟକାରୀ ହୋଇଥାଏ। ସେହିଭଳି ଏପ୍ରିଲ ୧ରୁ ନୂଆ ଆର୍ଥତ୍କ ବର୍ଷ ଆରମ୍ଭ ହେଉଛି। ଏମିତି କିଛି ନିୟମ ରହିଛି ଯାହା ପହିଲାରୁ ପରିବର୍ତ୍ତନ ହେବା ସହ ନୂଆ ସୁବିଧା ମଧ୍ୟ ଏହି ଦିନ ଠାରୁ ଆରମ୍ଭ ହେବ।
୧୦ ବ୍ୟାଙ୍କ ମିଶ୍ରଣୁ ୪ ବଡ ବ୍ୟାଙ୍କ
ଏପ୍ରିଲ ପହିଲାରୁ ସାରା ଦେଶରେ ୧୦ ବ୍ୟାଙ୍କ ମିଶ୍ରଣ ଦ୍ୱାରା ୪ ବଡ ବ୍ୟାଙ୍କ କାର୍ଯ୍ୟକାରୀ ହେବ। ଏ ନେଇ ରିଜର୍ଭ ବ୍ୟାଙ୍କ ମଞ୍ଜୁରୀ ଦେଇ ସାରିଛି। ସେହିଭଳି ବ୍ୟାଙ୍କଗୁଡିକର ରାଜ୍ୟ ସ୍ତରୀୟ ବ୍ୟାଙ୍କର୍ସ କମିଟି କନଭେନର ମଧ୍ୟ ବଦଳିବେ ବୋଲି ରିଜର୍ଭ ବ୍ୟାଙ୍କ ପ୍ରସ୍ତାବ ଦେଇ ସାରିଛି। ବ୍ୟାଙ୍କ ମିଶ୍ରଣ ପଦକ୍ଷେପ ଅନ୍ତର୍ଗତ ଓରିଏଣ୍ଟାଲ ବ୍ୟାଙ୍କ ଅଫ୍ କମର୍ସ ଏବଂ ୟୁନାଇଟେଡ ବ୍ୟାଙ୍କ ଅଫ୍ ଇଣ୍ଡିଆ ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି)ରେ ମିଶିଯିବ। ସିଣ୍ଡିକେଟ ବ୍ୟାଙ୍କ କାନାରା ବ୍ୟାଙ୍କରେ ମିଶ୍ରଣ ହେଉଥିବା ବେଳେ ଆନ୍ଧ୍ର ଏବଂ କର୍ପୋରେଶନ ବ୍ୟାଙ୍କ ୟୁନିୟନ ବ୍ୟାଙ୍କ ସହ ମିଶିବ। ସେହିଭଳି ଆଲ୍ଲାହାବାଦ ବ୍ୟାଙ୍କ ଇଣ୍ଡିଆନ ବ୍ୟାଙ୍କ ସହ ବିଲୟ ହେବ।
ବିଏସ୍-୬ ଯାନ ବିକ୍ରି
ସାରା ଦେଶରେ ବିଏସ୍-୬ ମାନକକୁ ଏପ୍ରିଲ ପହିଲାରୁ ଲାଗୁ କରାଯିବାକୁ ନିଷ୍ପତ୍ତି ହୋଇଛି। ଏହି ସମୟରେ କେବଳ ବିଏସ୍-୬ ଯାନ ବିକ୍ରି କରାଯିବ। ଏବେ ଲକ୍ଡାଉନ ଥିବାରୁ ବଳକା ଥିବା ବିଏସ୍-୪ ଯାନ ବିକିବା ଲାଗି ୧୦ ଦିନ ସମୟ ଦିଆଯାଇଛି।
ଔଷଧ ବର୍ଗରେ ମେଡିକାଲ ଡିଭାଇସ
ସବୁ ପ୍ରକାରର ମେଡିକାଲ ଡିଭାଇସ ଡ୍ରଗ୍ସ ଶ୍ରେଣୀରେ ଆସିବ। ଡ୍ରଗସ୍ ଆଣ୍ଡ କମୋଡିଟି ଆକ୍ଟ ଧାରା ୩ ମୁତାବକ ଉଭୟ ମାନବ ଏବଂ ପଶୁଙ୍କ କ୍ଷେତ୍ରରେ ବ୍ୟବହାର ହେଉଥିବା ଉପକରଣ ଡ୍ରଗସ୍ ଶ୍ରେଣୀଭୁକ୍ତ ହେବ।
ପେନ୍ସନ ନିୟମରେ ପରିବର୍ତ୍ତନ
ପହିଲାରୁ କର୍ମଚାରୀ ପେନ୍ସନ ସ୍କିମ(ଇପିଏସ୍)ରେ ପରିବର୍ତ୍ତନ ହେବ। ଅବସର ନେବାର ୧୫ ବର୍ଷ ପରେ ସମ୍ପୂର୍ଣ୍ଣ ପେନଶନ ବ୍ୟବସ୍ଥା କାର୍ଯ୍ୟକାରୀ ହେବ। ୨୦୦୫ ଏପ୍ରିଲ ପୂର୍ବରୁ ଅବସର ନେଇଥିବା ପ୍ରାୟ ୬ ଲୋକ ଲୋକ ଅଧିକ ପେନଶନ ପାଇବାକୁ ସକ୍ଷମ ହେବେ।
ସ୍ବଚ୍ଛ ଇନ୍ଧନ ଯୋଗାଣ
ଏପ୍ରିଲ ପହିଲାରୁ ସାରା ଦେଶରେ ବିଏସ୍-୬ ପେଟ୍ରୋଲ ଡିଜେଲ ଯୋଗାଣ କରାଯିବ। ଏହା ଦ୍ୱାରା ପେଟ୍ରୋଲ ପରିଚାଳିତ କାରଗୁଡିକରେ ନାଇଟ୍ରୋଜେନ ଅକ୍ସାଇଡ ନିର୍ଗମନ ୨୫% କମିବାକୁ ଥିବା ବେଳେ ଡିଜେଲ କାରରେ ୭୦% କମିଯିବ।
ଆୟକରର ବିକଳ୍ପ ସିଷ୍ଟମ
ପହିଲାଠାରୁ ଆୟକରର ୨ ସିଷ୍ଟମ ରହିବ। ପୁରୁଣା ସ୍ଲାବ ସହ ବିକଳ୍ପ ସ୍ଲାବ ମଧ୍ୟ ରହିବ। ଲୋକଙ୍କୁ କୌଣସି ଗୋଟିଏ ସିଷ୍ଟକୁ ବାଛିବାକୁ ହେବ। ବିକଳ୍ପ ସିଷ୍ଟମରେ ଲୋକମାନେ ରିହାତି ନେଇ ପାରିବେ ନାହିଁ।