ଭୁବନେଶ୍ୱର, ୫।୨(କ୍ରୀଡ଼ା ପ୍ରତିନିଧି)- ଏଫଆଇଏଚ୍ ହକି ପ୍ରୋ ଲିଗ୍ରେ ଭାରତ ଏହାର ଦ୍ୱିତୀୟ ପର୍ଯ୍ୟାୟ ମ୍ୟାଚ ବିଶ୍ୱ ଚାମ୍ପିୟନ ବେଲଜିୟମ ସହିତ ଖେଳିବ। ଚଳିତ ମାସ ୮ ଓ ୯ ତାରିଖରେ ଏହା କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ହେବ। ୨୦୧୮ରେ ଏହି କଳିଙ୍ଗ ଷ୍ଟାଡିୟମରେ ବିଶ୍ୱକପ ଟାଇଟଲ ହାସଲ କରିଥିବା ବେଲଜିୟମ ନିଜ ସ୍ମରଣୀୟ ଭେନ୍ୟୁରେ ମ୍ୟାଚ ଖେଳିବା ପାଇଁ ବୁଧବାର ଭୁବନେଶ୍ୱରରେ ପହଞ୍ଚତ୍ବ। ଗତବର୍ଷ ପ୍ରୋ ଲିଗ୍ର ପ୍ରଥମ ସଂସ୍କରଣରେ ଭାରତ ଖେଳି ନ ଥିଲା। ଦ୍ୱିତୀୟ ସଂସ୍କରଣରେ ଦଳ ଉଚ୍ଚ ର଼୍ୟାଙ୍କ୍ପ୍ରାପ୍ତ ନେଦରଲାଣ୍ଡ୍ସକୁ ହରାଇ ଅଭିଯାନ ଆରମ୍ଭ କରିଛି। ଜାନୁୟାରୀ ୧୮ ତାରିଖରେ ପ୍ରଥମ ମ୍ୟାଚରେ ଭାରତ ୫-୨ ଗୋଲରେ ବିଜୟୀ ହୋଇଥିବାବେଳେ ୧୯ ତାରିଖ ଦ୍ୱିତୀୟ ମ୍ୟାଚ ନିର୍ଦ୍ଧାରିତ ସମୟରେ ୩-୩ ଗୋଲରେ ବରାବର ରହିବାପରେ ଶୁଟ୍ ଆଉଟରେ ଘରୋଇ ଦଳ ୩-୧ ଗୋଲରେ ବିଜୟୀ ହୋଇଥିଲା।
ପ୍ରକାଶ ଯୋଗ୍ୟ ଯେ, ବିଶ୍ୱର ବିଭିନ୍ନ ସ୍ଥାନରେ ହକି ପ୍ରୋ ଲିଗ୍ ମ୍ୟାଚ ଅନୁଷ୍ଠିତ ହେଉଛି। ଜାନୁୟାରୀ ୨୪ରେ ଭାଲେନ୍ସିଆରେ ସ୍ପେନ-ଜର୍ମାନୀ ମ୍ୟାଚ ୨-୨ ଗୋଲରେ ଶେଷ ହେବାପରେ ଶୁଟ୍ ଆଉଟରେ ଜର୍ମାନୀ ୪-୩ ଗୋଲରେ ବିଜୟୀ ହୋଇଥିଲା। ୨୫ରେ ଭାଲେନ୍ସିଆରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ ଜର୍ମାନୀ ୫-୧ ଗୋଲ ବ୍ୟବଧାନରେ ବିଜୟୀ ହୋଇ ଆଗକୁ ବଢ଼ିଛି। ୨୫ରେ ସିଡ୍ନୀରେ ଅନୁଷ୍ଠିତ ଅଷ୍ଟ୍ରେଲିଆ-ବେଲଜିୟମ ମ୍ୟାଚ ୨-୨ ଗୋଲରେ ବରାବର ରହିଥିଲା। ଶୁଟ୍ଆଉଟରେ ବେଲଜିୟମ ୪-୨ ଗୋଲରେ ବିଜୟୀ ହୋଇଥିଲା। ୨୬ରେ ଏଠାରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ ବେଲଜିୟମ ୪-୨ ଗୋଲରେ ଅଷ୍ଟ୍ରେଲିଆକୁ ପରାସ୍ତ କରିଥିଲା। ୩୧ ତାରିଖରେ ଭାଲେନ୍ସିଆରେ ଅନୁଷ୍ଠିତ ମ୍ୟାଚରେ ନେଦରଲାଣ୍ଡ୍ସ ୪-୩ ଗୋଲରେ ସ୍ପେନକୁ ପରାସ୍ତ କରିଥିଲା। ଫେବୃୟାରୀ ୧ରେ ଏଠାରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ ମଧ୍ୟ ନେଦରଲାଣ୍ଡ୍ସ ୪-୨ ଗୋଲରେ ବିଜୟୀ ହୋଇଥିଲା। ଫେବୃୟାରୀ ୧ରେ ସିଡ୍ନୀରେ ଅନୁଷ୍ଠିତ ଅଷ୍ଟ୍ରେଲିଆ-ଗ୍ରେଟ ବ୍ରିଟେନ ମ୍ୟାଚ ୪-୪ ଗୋଲରେ ଶେଷ ହୋଇଥିଲା। ଶୁଟ୍ ଆଉଟରେ ଅଷ୍ଟ୍ରେଲିଆ ୩-୧ ଗୋଲରେ ବିଜୟୀ ହୋଇଥିଲା। ୨ ତାରିଖରେ ଏଠାରେ ଅନୁଷ୍ଠିତ ଦ୍ୱିତୀୟ ମ୍ୟାଚରେ ଅଷ୍ଟ୍ରେଲିଆ ୫-୧ ଗୋଲରେ ବ୍ରିଟେନକୁ ମାତ୍ ଦେଇଥିଲା। ଫେବୃୟାରୀ ୧ରେ ଅକ୍ଲାଣ୍ଡରେ ଅନୁଷ୍ଠିତ ମ୍ୟାଚରେ ଘରୋଇ ନ୍ୟୁଜିଲାଣ୍ଡକୁ ବେଲ୍ଜିୟମ ୬-୨ ଗୋଲରେ ପରାସ୍ତ କରିଥିଲା। ୨ ତାରିଖରେ ଦ୍ୱିତୀୟ ମ୍ୟାଚରେ ବେଲଜିୟମ ୩-୧ ଗୋଲରେ ବିଜୟୀ ହୋଇଥିଲା। ଅର୍ଥାତ୍ ଭାରତକୁ ଭେଟିବା ପୂର୍ବରୁ ବେଲଜିୟମ ଶକ୍ତିଶାଳୀ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡକୁ ପରାସ୍ତ କରିଛି। କଳିଙ୍ଗ ଷ୍ଟାଡିୟମର ଘରୋଇ ପରିବେଶରେ କଡ଼ା ଟକ୍କର ଦେବାକୁ ଭାରତ ପ୍ରସ୍ତୁତ।