ଭୁବନେଶ୍ୱର, ୧୧।୬(କ୍ରୀଡ଼ା ପ୍ରତିନିଧି)-କଳିଙ୍ଗ ଷ୍ଟାଡିୟମରେ ଚାଲିଥିବା ଏଫଆଇଏଚ୍୍ ସିରିଜ ଫାଇନାଲ୍ସ ହକି ଟୁର୍ନାମେଣ୍ଟର ସୋମବାର ଅନୁଷ୍ଠିତ ପୁଲ ‘ବି’ ଶେଷ ଲିଗ୍ ମ୍ୟାଚରେ ଦକ୍ଷିଣ ଆଫ୍ରିକା ୬-୦ ଗୋଲରେ ଦୁର୍ବଳ ମେକ୍ସିକୋକୁ ପରାସ୍ତ କରିଛି। ଫଳରେ ୩ ମ୍ୟାଚରୁ ୧ ବିଜୟ ସହ ଏହି ଦଳ କ୍ରସ୍ ଓଭର ଖେଳିବାକୁ ଯୋଗ୍ୟ ବିବେଚିତ ହୋଇଛି। ଦକ୍ଷିଣ ଆଫ୍ରିକା ୬ ଗୋଲ ଦେଇଥିବାବେଳେ ୪ ବରଣ କରିଛି। ଅନ୍ୟପକ୍ଷରେ ୩ ପରାଜୟ ସହ ମେକ୍ସିକୋର ଅଭିଯାନ ଶେଷ ହୋଇଛି। ଏହି ଦଳ ଏବେ ୭-୮ ସ୍ଥାନ ପାଇଁ ପ୍ଲେସିଂ ମ୍ୟାଚ ଖେଳିବ। ମେକ୍ସିକୋ ଲିଗ୍ ପର୍ଯ୍ୟାୟରେ ମାତ୍ର ୧ ଗୋଲ ଦେଇଥିବାବେଳେ ୧୮ ଗୋଲ ବରଣ କରିଛି।
ନିଜର ପ୍ରଥମ ୨ ମ୍ୟାଚରେ ଆମେରିକାଠାରୁ ୦-୨ ଓ ଜାପାନଠାରୁ ୦-୨ ଗୋଲରେ ହାରିଥିବା ଦକ୍ଷିଣ ଆଫ୍ରିକା ଏହି ମ୍ୟାଚରେ ପ୍ରଭାବ ବିସ୍ତାର କରି ଖେଳିଥିଲା। ଆରମ୍ଭରୁ ଆକ୍ରମଣାତ୍ମକ ରଣନୀତି ଅବଲମ୍ବନ କରିଥିବା ଏହି ଦଳ ମ୍ୟାଚର ୧ମ ମିନିଟରେ ହିଁ ପେନାଲ୍ଟି କର୍ନର ସୁଯୋଗ ସୃଷ୍ଟିି କରିଥିଲା। ମାଥ୍ୟୁ ବ୍ରାଉନ୍ ଏହାକୁଗୋଲରେ ପରିଣତ କରି ଦକ୍ଷିଣ ଆଫ୍ରିକାକୁ ଅଗ୍ରଣୀ କରାଇଥିଲେ। ଦ୍ୱିତୀୟ କ୍ବାର୍ଟରର ଅଧିକାଂଶ ସମୟରେ ମଧ୍ୟ ବଲ୍କୁ ମେକ୍ସିକୋ ହାଫ୍ରେ ରଖିଥିଲା ଦକ୍ଷିଣ ଆଫ୍ରିକା। ୧୭ତମ ମିନିଟରେ ନିକୋଲାସ ସ୍ପୁନରଙ୍କ ପେନାଲ୍ଟି କର୍ନର ଗୋଲ ସହାୟତାରେ ଏହି ଦଳ ପ୍ରଥମାର୍ଦ୍ଧ ଶେଷସୁଦ୍ଧା ୨-୦ ଗୋଲରେ ଅଗ୍ରଣୀ ରହିଥିଲା। ଦ୍ୱିତୀୟାର୍ଦ୍ଧରେ ମଧ୍ୟ ମେକ୍ସିକୋ ପ୍ରତିପକ୍ଷ ଦଳର ସମକକ୍ଷ ପ୍ରଦର୍ଶନ କରିପାରିି ନ ଥିଲା। ତୃତୀୟ କ୍ବାର୍ଟର ଆରମ୍ଭର ୨ୟ ମିନିଟରେ ଅର୍ଥାତ୍ ୩୨ତମ ମିନିଟରେ ଏନ୍କୋବିଲ ଏନ୍ଟୁଲି ଫିଲ୍ଡ ଗୋଲ ଦେଇ ଦକ୍ଷିଣ ଆଫ୍ରିକା ଅଗ୍ରଣୀ ବ୍ୟବଧାନକୁ ବଢ଼ାଇଥିଲେ। ଅନ୍ତିମ କ୍ବାର୍ଟରରେ ଅସହାୟ ମେକ୍ସିକୋ ବିପକ୍ଷରେ ୩ ଗୋଲ ଦେଇଥିଲା ଆଫ୍ରିକୀୟ ଦଳ। ୫୦ତମ ମିନିଟରେ ଅଷ୍ଟିନ ସ୍ମିଥ୍ ପେନାଲ୍ଟି କର୍ନରକୁ ଗୋଲରେ ପରିଣତ କରିଥିବାବେଳେ ୫୩ତମ ମିନିଟରେ ରିଚାର୍ଡ ପଜ୍ ଏକ ଫିଲ୍ଡ ଗୋଲ ଦେଇଥିଲେ। ୫୮ତମ ମିନିଟରେ ଅଧିନାୟକ କିନାନ୍ ହର୍ନ ଆଉ ଏକ ଗୋଲ ଦେଇ ଦକ୍ଷିଣ ଆଫ୍ରିକାର ଅଗ୍ରଣୀ ବ୍ୟବଧାନକୁ ୬-୦ରେ ପହଞ୍ଚାଇ ଦେଇଥିଲେ। ମହିଳା ଓ ଶିଶୁକଲ୍ୟାଣ ବିଭାଗ ମନ୍ତ୍ରୀ ଟୁକୁନୀ ସାହୁ ଅତିଥିଭାବେ ଯୋଗଦେଇ ଦକ୍ଷିଣ ଆଫ୍ରିକାର ଏନକୋବିଲ ଏନ୍ଟୁଲିଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ପ୍ରଦାନ କରିଥିଲେ।