ପଣଜୀ, ୯ା୬ (ପି.ଟି.)-ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଫ୍ରାଞ୍ଚାଇଜ୍ ଏଫ୍ସି ଗୋଆ ଏଡୁ ବେଡିଆଙ୍କ ସହ ଚୁକ୍ତି ନବୀକରଣ କରିଛି। ଫଳରେ ଏହି ସ୍ପେନ୍ ଫୁଟ୍ବଲର ଦଳ ସହିତ ୨୦୨୨ ପର୍ଯ୍ୟନ୍ତ ରହିବେ। ଆଇଏସ୍ଏଲ ସିଜନ ଆରମ୍ଭରେ ୨୦୧୭/୧୮ରେ ରିଅଲ ଜାରାଗୋଜା ଟିମ୍ରୁ ବେଡିଆଙ୍କୁ ଆଣିବା ପରଠାରୁ ସେ ଦଳର ଜଣେ ପ୍ରମୁଖ ଖେଳାଳି ରହି ଆସିଛନ୍ତି। ଆଇଏସ୍ଏଲ୍ର ତିନୋଟି ସିଜନରେ ବେଡିଆ ଏଫ୍ସି ଗୋଆ ତରଫରୁ ୫୧ ମ୍ୟାଚ ଖେଳିଛନ୍ତି। ସେ ୯ଟି ଗୋଲ ସ୍କୋର କରିଥିବାବେଳେ ୯ଟି ଗୋଲ୍ରେ ସହାୟକ ହୋଇଛନ୍ତି। ଏଫ୍ସି ଗୋଆର ଫୁଟ୍ବଲ ନିର୍ଦ୍ଦେଶକ ରବି ପୁଷ୍କର କହିଛନ୍ତି ମିଡ୍ଫିଲ୍ଡର ବେଡିଆ ଆମ ଦଳର ଜଣେ ପ୍ରମୁଖ ଖେଳାଳି ରହି ଆସିଛନ୍ତି। ଭବିଷ୍ୟତରେ ମଧ୍ୟ ସେ ଦଳର ପ୍ରଦର୍ଶନରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବେ ବୋଲି ଆମର ଦୃଢବିଶ୍ୱାସ ରହିଛି।