ଭୁବନେଶ୍ୱର,୨।୬(ବ୍ୟୁରୋ): କରୋନା ଲାଗି ପୁରୀରେ ଏଥର ଭକ୍ତଙ୍କ ବିନା ରଥଯାତ୍ରା ହେବ। ଶ୍ରୀଜୀଉଙ୍କ ପହଣ୍ଡିରୁ ଆରମ୍ଭକରି ରଥଟଣା ପର୍ଯ୍ୟନ୍ତ ସବୁକିଛି ସେବାୟତ ଓ ପୋଲିସ ଦ୍ୱାରା କରାଯିବାକୁ ନିଷ୍ପତ୍ତି ନିଆଯାଇଛି। ହେଲେ ପ୍ରତିବର୍ଷ ଦେଶ ବିଦେଶରେ ଅନୁଷ୍ଠିତ ହେଉଥିବା ରଥଯାତ୍ରା ହେବା ନେଇ ଅନିଶ୍ଚିତତା ଲାଗିରହିଛି। ଶ୍ରୀଜଗନ୍ନାଥ ସଂସ୍କୃତିର ଉପସ୍ଥିତି ସମଗ୍ର ବିଶ୍ୱରେ ରହିଛି। ସବୁଠି ଶ୍ରୀଜଗନ୍ନାଥ ମନ୍ଦିର ଓ ଇସ୍କନ ମନ୍ଦିର ରହିଛି, ଯେଉଁଠାରେ ପ୍ରତିବର୍ଷ ମହାସମାରୋହରେ ତିନି ଠାକୁରଙ୍କ ରଥଯାତ୍ରା ଅନୁଷ୍ଠିତ ହୋଇଥାଏ। ହେଲେ ଚଳିତବର୍ଷ ବିଦେଶର ବହୁ ସ୍ଥାନରେ ରଥଯାତ୍ରା ହେବା ସମ୍ଭାବନା କ୍ଷୀଣ ରହିଥିବା ସୂଚନା ମିଳିଛି।
ୟୁରୋପୀୟ ରାଷ୍ଟ୍ରଗୁଡ଼ିକରେ କରୋନା ସଂକ୍ରମଣ ମାରାତ୍ମକ ରୂପ ନେଇଥିବାରୁ ସେସବୁ ସ୍ଥାନରେ ଏଥର ରଥଯାତ୍ରା ନ ହେବା ଏକପ୍ରକାର ନିଶ୍ଚିତ ହୋଇଛି। କରୋନା ଲାଗି ସମସ୍ତ ଉତ୍ସବ, ମହୋତ୍ସବ ଏବଂ କାର୍ଯ୍ୟକ୍ରମକୁ ବାତିଲ କରାଯାଇଥିବାରୁ ୩୦ରୁ ଅଧିକ ଦେଶରେ ରଥଯାତ୍ରା ହେବନି ବୋଲି କୁହାଯାଉଛି। ଆମେରିକାରେ ସର୍ବାଧିକ ଓଡ଼ିଆ ରହୁଥିବା ବେଳେ ଏଠାରେ ସବୁଠାରୁ ଅଧିକ ଜଗନ୍ନାଥ ମନ୍ଦିର ରହିଛି। ନ୍ୟୁୟର୍କ ସିଟି ସହ କାଲିଫର୍ନିଆ, ସିକାଗୋ, ଡଲାସ, ମିଚିଗାନ ଆଦି ସହରରେ ଥିବା ଜଗନ୍ନାଥ ମନ୍ଦିରରେ ପ୍ରତିବର୍ଷ ଧୁମ୍ଧାମରେ ରଥଯାତ୍ରା ପାଳନ କରାଯାଇଥାଏ। କେବଳ ଓଡ଼ିଆ କିମ୍ବା ଭାରତୀୟ ନୁହନ୍ତି, ବହୁସଂଖ୍ୟାରେ ସ୍ଥାନୀୟ ଲୋକେ ମଧ୍ୟ ଏଥିରେ ଭାଗନେଇଥାନ୍ତି। ସେହିଭଳି ଏଠାରେ ଥିବା ଇସ୍କନ ମନ୍ଦିରଗୁଡ଼ିକ ପକ୍ଷରୁ ମଧ୍ୟ ରଥଯାତ୍ରା ଆୟୋଜନ କରାଯାଇଥାଏ। ଏହାବ୍ୟତୀତ ଇଂଲଣ୍ଡ, ଜର୍ମାନୀ, ଅଷ୍ଟ୍ରେଲିଆ, କାନାଡା, ବ୍ରାଜିଲ ଆଦି ରାଷ୍ଟ୍ରରେ ମଧ୍ୟ ଓଡ଼ିଆଙ୍କ ଦ୍ୱାରା ରଥଯାତ୍ରା କରାଯାଇଥାଏ। କିନ୍ତୁ ଚଳିତବର୍ଷର କୋଭିଡ୍-୧୯ ମହାମାରୀ ଯୋଗୁ ଏହିସବୁ ଦେଶରେ ରଥଯାତ୍ରା ଉତ୍ସବ ପାଳନ ନ କରିବାକୁ ସ୍ଥିର ହୋଇଛି। ସାମାଜିକ ଦୂରତ୍ୱ ନିୟମକୁ ପାଳନ କରି ମନ୍ଦିରଗୁଡିକରେ କେବଳ ପୂଜାବିଧି କରାଯିବ। ଇସ୍କନ ଦ୍ୱାରା ହେଉଥିବା ରଥଯାତ୍ରାକୁ ଯଦି କର୍ତ୍ତୃପକ୍ଷ ଅନୁମତି ପ୍ରଦାନ କରନ୍ତି ତା’ହେଲେ ଏହା ଅନୁଷ୍ଠିତ ହେବ ବୋଲି ଇସ୍କନ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ ରାଜଧାନୀ ଦିଲ୍ଲୀର ହଉଜଖାସ୍ ଓ ତ୍ୟାଗରାଜ ନଗରରେ ଥିବା ଶ୍ରୀଜଗନ୍ନାଥ ମନ୍ଦିରରେ ଦୀର୍ଘବର୍ଷ ଧରି ରଥଯାତ୍ରା ଆୟୋଜିତ ହୋଇଆସୁଛି। ହେଲେ କରୋନା ଭୂତାଣୁର ଏକ ହଟ୍ସ୍ପଟ୍ ହୋଇଥିବା ଯୋଗୁ ଏ ବର୍ଷ ଦିଲ୍ଲୀରେ ଜନସମାଗମକୁ ଏଡାଇବା ପାଇଁ ରାସ୍ତାରେ ରଥ ଗଡାଇବା ସମ୍ଭବ ନୁହେଁ ବୋଲି କୁହାଯାଇଛି। ସେହିଭଳି ଗୁଜରାଟ ଅହମଦାବାଦସ୍ଥିତ ଜଗନ୍ନାଥ ମନ୍ଦିରରେ କାହିଁ କେତେ ବର୍ଷରୁ ରଥଯାତ୍ରା ଧୁମ୍ଧାମରେ ପାଳନ କରାଯାଉଛି। ଏଥର ଅହମଦାବାଦ ସମେତ ସାରା ଗୁଜରାଟରେ କରୋନା ସ୍ଥିତି ଭୟଙ୍କର ଥିବାରୁ ରଥଯାତ୍ରା ଉତ୍ସବ ନ ହେବା ନେଇ ମନ୍ଦିର କର୍ତ୍ତୃପକ୍ଷ ଆଶଙ୍କା ପ୍ରକାଶ କରିଛନ୍ତି। ସେହିଭଳି କରୋନା ଭୂତାଣୁର ଆଉଏକ ହଟ୍ସ୍ପଟ୍ ସୁରଟ ସମେତ ଗୁଜରାଟର ଅନ୍ୟ ସ୍ଥାନରେ ମଧ୍ୟ ରଥଯାତ୍ରା ହେବ ନାହିଁ ବୋଲି ଜଣାପଡିଛି। ଏହା ବ୍ୟତୀତ ପଡ଼ୋଶୀ ପଶ୍ଚିମବଙ୍ଗରେ ଏକାଧିକ ସ୍ଥାନରେ ରଥଯାତ୍ରା କରାଯାଉଥିବା ବେଳେ ଏଥର ଆୟୋଜନକୁ ନେଇ ଅନିଶ୍ଚିତତା ଲାଗିରହିଛି। ସେହିଭଳି ବେଙ୍ଗାଲୁରୁ, ଚେନ୍ନାଇ, କାନପୁର, ହାଇଦ୍ରାବାଦ, ମୁମ୍ବାଇ ଆଦି ସ୍ଥାନରେ ରଥ ନ ଗଡ଼ିବାର ଅଧିକ ସମ୍ଭାବନା ରହିଛି।