କୋଲକାତା,୭।୧୧:ପଶ୍ଚିମବଙ୍ଗର ହୁଗୁଳି ଜିଲାରେ ଏକ ଅଜବ ମାମଲା ସାମ୍ନାକୁ ଆସିଛି। ଭାଜପା ଏମ୍ପି ଦିଲୀପ ଘୋଷଙ୍କ ଏକ ମନ୍ତବ୍ୟ ପରେ ହୁଗୁଳିର ଜଣେ ବ୍ୟକ୍ତି ନିଜର ଦୁଇଟି ଗାଈ ଧରି ମନାପୁରମ୍ ଫାଇନାନ୍ସ ଲିମିଟେଡର ଏକ ଶାଖା କାର୍ଯ୍ୟଳୟରେ ସୁନା ଋଣ ନେବା ପାଇଁ ପହଞ୍ଚିଛନ୍ତି। ଗାଈ କ୍ଷୀରରେ ସୁନା ଅଛି, ଏଥିପାଇଁ ସୁନା ଋଣ ପାଇଁ ଏଠାକୁ ଆସିଛି ବୋଲି ଉକ୍ତ ବ୍ୟକ୍ତି ଜଣଙ୍କ କହିଛନ୍ତି। ଏହାଶୁଣି ମନାପୁରମ୍ ଫାଇନାନ୍ସ କମ୍ପାନୀର ଅଧିକାରୀମାନେ ଆଶ୍ଚର୍ଯ୍ୟ ହୋଇଯାଇଥିଲେ। ସୂଚନାଯୋଗ୍ୟ, ବର୍ଦ୍ଧମାନରେ ଗୋପାଳ ଅଷ୍ଟମୀ ଅବସରରେ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ଭାଜପା ଏମ୍ପି ଦିଲୀପ ଘୋଷ ଯୋଗଦେଇ କହିଥିଲେ, ଭାରତୀୟ ଦେସୀ ଗାଈମାନେ ଏକ ସ୍ବତନ୍ତ୍ରତା ରହିଛି। ଏମାନଙ୍କ କ୍ଷୀରରୁ ସୁନା ମିଳିଥାଏ। ଏଥିପାଇଁ ଦେସୀ ଗାଈ କ୍ଷୀର ସାମାନ୍ୟ ହଳଦିଆ ହୋଇଥାଏ। ଏହାଶୁଣି ହୁଗୁଳି ଜିଲାର ଦାନକୁନି ଅଞ୍ଚଳରେ ରହୁଥିବା ଉକ୍ତ ବ୍ୟକ୍ତି ଜଣଙ୍କ କହିଛନ୍ତି, ମୋ ପାଖରେ ୨୦ଟି ଗାଈ ଅଛି, ମୋ ପୂରା ପରିବାର ଗାଈ ଉପରେ ନିର୍ଭରଶୀଳ। ଯଦି ମୋତେ ସୁନା ଋଣ ମିଳିବ ସେ ମୁଁ ବ୍ୟବସାୟ ଆହୁରି ଆଗକୁ ବଢାଇପାରିବି। ମୁଁ ଶୁଣିଛି କି, ଗାଈ କ୍ଷୀରରେ ସୁନା ଅଛି ତେଣୁ ମୁଁ ଏଠାକୁ ଋଣ ନେବାକୁ ଆସିଛି ବୋଲି ସେ କହିଛନ୍ତି।