ନାଇଜେରିଆରେ ଏମିତି ଏକ ସ୍କୁଲ ରହିଛି ଯେଉଁଠି ଛାତ୍ରୀଛାତ୍ରଙ୍କୁ ସ୍କୁଲ ଫି’ବଦଳରେ ପ୍ଲାଷ୍ଟିକ ବୋତଲ ନେଇ ଯିବାକୁ ପଡ଼ିଥାଏ। ନାଇଜେରିଆର ଲୋଗସ ସହରରେ ରହିଛି ଏହି ସ୍କୁଲ। ଛାତ୍ରୀଛାତ୍ର ଫି’ ବଦଳରେ ସ୍କୁଲକୁ ପ୍ଲାଷ୍ଟିକ ବୋତଲ ନେଇ ଯାଇଥାନ୍ତି। ଏହା ସହିତ ଏକ ବ୍ୟାଗ୍ରେ ଅନ୍ୟ ପ୍ଲାଷ୍ଟିକ ସାମଗ୍ରୀ ମଧ୍ୟ ନେଇଥାନ୍ତି। ଏହାକୁ ଓଜନ କରିବା ପରେ ଯେତିକି ଦାମ୍ ହୁଏ ସେଥିରେ ପିଲାଙ୍କର ସ୍କୁଲ ଫି’ ଭରଣା କରାଯାଏ। ଏଥିରେ ଦୁଇଟି ଫାଇଦା ହୋଇଥାଏ। ଗୋଟିଏ ହେଲା ଗରିବ ପିଲାମାନେ ଆର୍ଥିକ ସଂକଟରୁ ମୁକ୍ତି ପାଇବେ ଆଉ ଗୋଟିଏ ହେଲା ସହର ପ୍ଲାଷ୍ଟିକ ମୁକ୍ତ ରହିବ।
ଅନ୍ୟ ସ୍କୁଲରେ ମଧ୍ୟ ଏହି ପ୍ରୋଜେକ୍ଟ କାର୍ଯ୍ୟକାରୀ ହେବାକୁ ଯାଉଛି :
ଖୁବ୍ଶୀଘ୍ର ସହରର ଅନ୍ୟ ସ୍କୁଲଗୁଡ଼ିକରେ ଏହି ଯୋଜନା କାର୍ଯ୍ୟକାରୀ ହେବାକୁ ଯାଉଛି। ଏହି ଯୋଜନା ଆରମ୍ଭ ହେବାରୁ ଅଭିଭାବକମାନେ ଖୁସି ଅଛନ୍ତି। କାରଣ ଫି’ ପାଇଁ ପିଲାଙ୍କୁ ସ୍କୁଲ ଛାଡ଼ିବାକୁ ପଡ଼ିବ ନାହିଁ। ଅଜେନ୍ଗୁଲେରେ ରହୁଥିବା ଜଣେ ଅଭିଭାବକ କୁହନ୍ତି, ପିଲାଙ୍କୁ ଫି’ ଦେବା ପାଇଁ ବହୁ ସଂଘର୍ଷ କରିବାକୁ ପଡୁଥିଲା। ଏମିତି ବି କେତେଥର ଫି’ ଦେଇ ହୋଇନାହିଁ। ଅଳ୍ପ ଅଳ୍ପ ଦେବାକୁ ପଡ଼ିଛି। ସ୍କୁଲର ପ୍ରିନ୍ସପାଲ କୁହନ୍ତି, ଏମିତି ପଦକ୍ଷେପ ନେବା ଦ୍ୱାରା ଅଭିଭାବକମାନେ ଆର୍ଥିକ ଚାପମୁକ୍ତ ହେବା ସହ ପରିବେଶ ସୁରକ୍ଷା ହୋଇପାରୁଛି। ଅଜେନ୍ଗୁଲେ ହେଉଛି ସବୁଠୁ ଅଧିକ ଜନସଂଖ୍ୟା ବିଶିଷ୍ଟ ବସ୍ତି। ଏଠାରେ ପ୍ରାୟ ୩୦ ଲକ୍ଷ ଲୋକ ବସବାସ କରୁଛନ୍ତି।