ନୂଆଦିଲ୍ଲୀ,୧୪।୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ପୂର୍ବତନ ବହିର୍ବ୍ୟାପାର ମନ୍ତ୍ରୀ ତଥା ବରିଷ୍ଠ ଭାଜପା ନେତ୍ରୀ ସୁଷମା ସ୍ବରାଜ ଓ ତାଙ୍କ କାର୍ଯ୍ୟଶୈଳୀକୁ ମନେପକାଇଛନ୍ତି। ଦିଲ୍ଲୀର ଜବାହାରଲାଲ ନେହେରୁ ଷ୍ଟାଡିୟମ୍ରେ ସ୍ବର୍ଗତା ସୁଷମାଙ୍କ ଉପଲକ୍ଷେ ଆୟୋଜିତ ଶ୍ରଦ୍ଧାଞ୍ଜଳି ସଭାରେ ମୋଦି ସୁଷମାଙ୍କ ସ୍ମୃତିଚାରଣ କରି କହିଛନ୍ତି ଯେ, ସେ ତାଙ୍କଠାରୁ ବହୁତ କିଛି ଶିକ୍ଷାଲାଭ କରିଛନ୍ତି। ସୁଷମାଙ୍କ କାର୍ଯ୍ୟଶୈଳୀ ଯୋଗୁ ବହିିର୍ବ୍ୟାପାର ମନ୍ତ୍ରଣାଳୟର ଚିତ୍ର କିଛି ଅନନ୍ୟ ରହିଛି। ଏହା କହି ସେ ୫ବର୍ଷ ପୂର୍ବକୁ ଫେରିଯାଇଥିଲେ। ବହିର୍ବ୍ୟାପାର ମନ୍ତ୍ରଣାଳୟରେ କିଛି ପରମ୍ପରା ରହିଛି, ଯେଉଁଗୁଡ଼ିକ ଭାରି ଉତ୍ତମ ବୋଲି ମୋଦି କହିଥିଲେ। ୨୦୧୪ରେ ଯେବେ ମୋଦି ନୂଆ ପ୍ରଧାନମନ୍ତ୍ରୀ ହୋଇଥିଲେ ଓ ଜାତିସଂଘରେ ତାଙ୍କର ଭାଷଣ ଦେବାର ଥିଲା, ପ୍ରଥମ ଥର ପାଇଁ ସେ ସେଠାକୁ ଯାଇଥିଲେ। ତେବେ ପୂର୍ବରୁ ସୁଷମାଜୀ ସେଠାରେ ପହଞ୍ଚି ତାଙ୍କୁ ସ୍ବାଗତ କରିଥିଲେ। ପରଦିନ ଜାତିସଂଘରେ ମୋଦିଙ୍କ ଭାଷଣ ରହିଥିବା ବେଳେ ସେ ସୁଷମାଙ୍କୁ ଏନେଇ ଆଲୋଚନା କରିବାକୁ କହିଥିଲେ। ଏହାପରେ ସୁଷମା ତାଙ୍କୁ ଆପଣଙ୍କ ଭାଷଣ କାହିଁ ବୋଲି ପଚାରିଥିଲେ। ଏହାର ଉତ୍ତରରେ ସେ କହିଥିଲେ, ସେମିତି କହି ଦେବେ। ସେହି ସମୟରେ ସୁଷମା କହିଥିଲେ, ଭାଇ ଏମିତି ହୁଏନି। ବିଶ୍ୱ ଆଗରେ ଭାରତର କଥା ରଖିବାକୁ ହେଲେ ସେମିତି ମନଇଚ୍ଛା କୁହାଯାଏନି। ତାଙ୍କର ଏହି କଥା ମୋତେ ବହୁତ କିଛି ଶିଖାଇଛି ବୋଲି ମୋଦି କହିଛନ୍ତି।