ଭୁବନେଶ୍ୱର,୧୯।୧୦(ବ୍ୟୁରୋ): ଜଣେ ଯୁବତୀଙ୍କୁ ବିବାହ ପ୍ରତିଶ୍ରୁତି ଦେଇ ପ୍ରତାରଣା କରିବା ଅଭିଯୋଗରେ ଭୁବନେଶ୍ୱର ଏମ୍ସ ହୃଦ୍ରୋଗ ବିଭାଗ (କାର୍ଡିଓଲୋଜି)ର ଡାକ୍ତର ଜୟଦୀପ ଦାସଗୁପ୍ତାଙ୍କୁ ମଙ୍ଗଳବାର ମହିଳା ଥାନା ପୋଲିସ ଗିରଫ କରିଛି। ଜୟଦୀପଙ୍କ ଘର ପଶ୍ଚିମବଙ୍ଗ ସାଉଥଚବିଶ ପ୍ରଗଣା ଜିଲା ହରିଦେବପୁର ଥାନା ଅଞ୍ଚଳରେ ହୋଇଥିବା ବେଳେ ସେ ଭୁବନେଶ୍ୱର ଏମ୍ସ ହାଉସିଂ କମ୍ପ୍ଲେକ୍ସ ପିଜି-୨ ହଷ୍ଟେଲର ରୁମ୍ ନଂ. ୧୨୦ରେ ରହୁଛନ୍ତି। କୋର୍ଟଚାଲାଣ ପରେ ଜାମିନ ନାମଞ୍ଜୁର ହେବାରୁ ଜୟଦୀପଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ଅନୁଯାୟୀ, ରାଜଧାନୀରେ ରହି ରୁପାଲି ଛକସ୍ଥିତ ଏକ ବ୍ୟାଙ୍କରେ କାମ କରୁଥିବା ପୀଡ଼ିତା ଯୁବତୀ ତାଙ୍କ ବାପାଙ୍କୁ ୨୦୨୦ ଡିସେମ୍ବର ୧୭ରେ ହୃଦରୋଗ ଚିକିତ୍ସା ପାଇଁ ଏମ୍ସ ନେଇଥିଲେ। ସେଠାରେ ପୀଡ଼ିତାଙ୍କୁ ଡାକ୍ତର ଜୟଦୀପ ମୋବାଇଲ ଫୋନ୍ ନମ୍ବର ମାଗିଥିଲେ। ହେଲେ ସେ ରାଜି ନ ହେବାରୁ ତାଙ୍କ ବାପାଙ୍କୁ ଡିସ୍ଚାର୍ଜ କରିବାକୁ ଦେବେ ନାହିଁ ବୋଲି ଜୟଦୀପ କହିଥିଲେ। ତେଣୁ ଯୁବତୀ ତାଙ୍କ ମୋବାଇଲ ନମ୍ବର ଦେବା ପରେ ଉଭୟଙ୍କ ମଧ୍ୟରେ ନିୟମିତ କଥାବାର୍ତ୍ତା ହେବାରୁ ପ୍ରେମ ସମ୍ପର୍କ ଗଢ଼ି ଉଠିଥିଲା। ଯୁବତୀଙ୍କୁ ବିବାହ କରିବାର ପ୍ରତିଶ୍ରୁତି ଦେଇ ଜୟଦୀପ ବିଶ୍ୱାସଭାଜନ ହୋଇଥିଲେ। ପରେ ଅନେକ ସମୟରେ ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ ଜୟଦୀପ। ଇତିମଧ୍ୟରେ ଯୁବତୀ ଜଣକ ୨ମାସର ଗର୍ଭବତୀ ହୋଇଥିବା କଥା ଜଣାପଡ଼ିବା ପରେ ଜୟଦୀପ ତାଙ୍କୁ ଗର୍ଭପାତ କରାଇଥିଲେ। ନିକଟରେ ଜୟଦୀପଙ୍କ ସହ ଜଣେ ଯୁବତୀଙ୍କ ନିର୍ବନ୍ଧ ହୋଇଥିବା ଖବର ମିଳିବା ପରେ ପୀଡ଼ିତା ଏନେଇ ପଚାରିବାକୁ ଏମ୍ସ ହଷ୍ଟେଲ ଯାଇଥିଲେ। ବିବାହକୁ ନେଇ ସେଠାରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ସେହି ସମୟରେ ଯୁବତୀଙ୍କୁ ଜୟଦୀପ ମାଡ଼ ମାରିବା ସହ ହତ୍ୟା ଧମକ ଦେଇଥିଲେ। ଏନେଇ ଯୁବତୀ ଜଣକ ଉପାୟହୀନ ହୋଇ ଶେଷରେ ସୋମବାର ଭୁବନେଶ୍ୱର ମହିଳା ଥାନାରେ ଅଭିଯୋଗ କରିଥିଲେ। ପୋଲିସ ଆଇପିସି ଦଫା ୪୯୩, ୪୧୭, ୩୨୩, ୪୨୦ ଏବଂ ୫୦୬ରେ ଏକ ମାମଲା (ନଂ. ୧୩୬/୨୨) ରୁଜୁ କରି ତଦନ୍ତ ଆରମ୍ଭ କରିଥିଲା।