ଭୁବନେଶ୍ୱର,୨୯।୨: କେନ୍ଦ୍ର ସରକାର ମାଇନ୍ସ ଆଣ୍ଡ ମିନେରାଲ ଡେଭଲପମେଣ୍ଟ ରେଗୁଲେଶନ ଆକ୍ଟ (ଏମ୍ଏମ୍ଡିଆର) ନିୟମରେ ପରିବର୍ତ୍ତନ କରିଥିବାରୁ ଓଡିଶା ବାର୍ଷିକ ପ୍ରାୟ ୨୦ ହଜାର କୋଟି ଟଙ୍କା ପାଇବ ବୋଲି କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶୁକ୍ରବାର ସୂଚନା ଦେଇଛନ୍ତି। ଇସ୍ପାତ ମନ୍ତ୍ରଣାଳୟ ଏବଂ ଜାପାନ ଏମ୍ଇଟିଆଇ ପକ୍ଷରୁ ସ୍ଥାନୀୟ ଏକ ହୋଟେଲରେ ଆୟୋଜିତ ଏକ କର୍ମଶାଳାରେ ପ୍ରଧାନ କହିଛନ୍ତି ଯେ, ପୂର୍ବରୁ ଓଡିଶା କେବଳ ରୟାଲଟି ଏବଂ ସେଲ୍ସ ଟାକ୍ସ ଲାଭ କରୁଥିଲା। ନିୟମରେ ପରିବର୍ତ୍ତନ ହେବା ଯୋଗୁ ଏହା ଦ୍ୱାରା ରାଜ୍ୟ ଅଧିକ ପରିମାଣର ରାଜସ୍ବ ଲାଭ କରିପାରିବ। ଦେଶର ୮୦% ଖଣି କେବଳ ପୂର୍ବାଞ୍ଚଳରେ ରହିଛି। ରାଜ୍ୟରେ ଇସ୍ପାତ ଶିଳ୍ପର ବିକାଶ ଲାଗି ବିଜୁଳି ବିଲ୍ ଟାରିଫରେ ରିହାତି ଦେବା ଲାଗି ପ୍ରଧାନ ରାଜ୍ୟ ସରକାରଙ୍କୁ ପରାମର୍ଶ ଦେଇଛନ୍ତି। ରାଜ୍ୟରେ ପ୍ରଚୁର ପରିମାଣର କୋଇଲା ରହିଥିବା ଯୋଗୁ ଇସ୍ପାତ ଉତ୍ପାଦନ କ୍ଷେତ୍ରରେ ଏକ ଇକୋସିଷ୍ଟମ ପ୍ରସ୍ତୁତ କରି ଏହି ଶିଳ୍ପକୁ ବଢାଇବା ସେ ଆହ୍ବାନ ଜଣାଇଛନ୍ତି।
ରାଜ୍ୟର ଇସ୍ପାତ ଶିଳ୍ପ ଉପରେ ରହିଥିବା ସମ୍ଭାବନା ଉପରେ ମତ ରଖି ପ୍ରଧାନ କହିଛନ୍ତି, ଓଡିଶା ଇସ୍ପାତ ଶିଳ୍ପ ମଧ୍ୟରେ ଦେଶର ଏକ ନମ୍ବର ରାଜ୍ୟ ହୋଇ ପାରିବ। ଅର୍ଥ ବ୍ୟବସ୍ଥାକୁ ଆଗକୁ ବଢାଇବା ଦିଗରେ ଏହି ଶିଳ୍ପର ଏକ ପ୍ରମୁଖ ଭୂମିକା ରହିଛି। ଇସ୍ପାତ ଉତ୍ପାଦନ କ୍ଷେତ୍ରରେ ଦେଶର ଏକ ପ୍ରମୁଖ ସ୍ଥଳ ହେବା ରାସ୍ତାରେ ଓଡିଶା ରହିଛି। ୨୦୩୦ ସୁଦ୍ଧା ଦେଶରେ ବାର୍ଷିକ ୩୦୦ ନିୟୁତ ଟନ୍ ଇସ୍ପାତ ଉତ୍ପାଦନ କରିବା ନେଇ ଯୋଜନା ରଖାଯାଇଛି। ଓଡିଶାରେ କେବଳ ୧୦୦ ନିୟୁତ ମେଟ୍ରିକ ଟନ୍ ଇସ୍ପାତ ଉତ୍ପାଦନର ସମ୍ଭାବନା ରହିଛି। ଏହି ଲକ୍ଷ୍ୟ ପୂରଣ ଲାଗି ଆନୁଷଙ୍ଗିକ ବ୍ୟବସ୍ଥା ବୃଦ୍ଧି ଦିଗରେ ପ୍ରଧାନ ଗୁରୁତ୍ୱାରୋପ କରିଛନ୍ତି।
ଦେଶର ଇସ୍ପାତ ବ୍ୟବହାର ଉପରେ ସୂଚନା ଦେଇ ପ୍ରଧାନ କହିଛନ୍ତି ଯେ, ଏବେ ବ୍ୟକ୍ତି ପିଛା ୭୦ କିଲୋଗ୍ରାମ ଇସ୍ପାତ ବ୍ୟବହାର ହେଉଛି। ଏହାକୁ ବଢାଇବା ଦିଗରେ ସରକାର ଯତ୍ନବାନ ଅଛନ୍ତି। ବିଶ୍ୱ ସ୍ତରରେ ମୁଣ୍ଡ ପିଛା ଇସ୍ପାତ ଉତ୍ପାଦନ ୨୨୫ କିଲୋ ଗ୍ରାମ ରହିଥିବା ବେଳେ ଜାପାନରେ ୫୦୦ କିଲୋ ଗ୍ରାମ ରହିଛି। ଓଡ଼ିଶାରେ ଏହାକୁ ଅନ୍ୟୁନ ୧୫୦ କିଲୋ ଗ୍ରାମରେ ପହଞ୍ଚାଇବା ନେଇ ସମ୍ଭାବନା ରହିଛି। ଇସ୍ପାତ ବ୍ୟବହାର ବଢିଲେ ସ୍ଥାନୀୟ ଅର୍ଥନୀତି ସୁଦୃଢ ହେବା ସହ ସାମାଜିକ ଭିତ୍ତିଭୂମି ଓ ବିଭିନ୍ନ କ୍ଷେତ୍ରର ବିକାଶ ସାଧନ ହୋଇ ପାରିବ ବୋଲି ସେ ମତ ବ୍ୟକ୍ତ କରିଛନ୍ତି। ସେହିଭଳି ରାଜ୍ୟରେ ଇସ୍ପାତ କ୍ଷେତ୍ରର ବିକାଶ ଲାଗି ଏ କ୍ଷେତ୍ରରେ ଏକ ବଡ ଋଣନୀତିର ଆବଶ୍ୟକତା ରହିଛି। ଏହି ଶିଳ୍ପର ବିକାଶ ଲାଗି ଜାପାନ ଏକ ଭଲ ସହଯୋଗୀ ରାଷ୍ଟ୍ର ହୋଇ ପାରିଛି। ଜାପାନ ସହ ମିଳିତ ହୋଇ ଓଡିଶାକୁ ଇସ୍ପାତ ଶିଳ୍ପର ପୂର୍ବୋଦୟରେ ପ୍ରମୁଖ କେନ୍ଦ୍ର କରିବାର ଆବଶ୍ୟକତା ରହିଥିବା ସେ ମତବ୍ୟକ୍ତ କରିଛନ୍ତି।