ନୂଆଦିଲ୍ଲୀ,୧୨।୬ – ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକ ଦେଶର ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଙ୍କୁ ୧୨,୨୦୧ କୋଟି ଟଙ୍କାର ଋଣ ପ୍ରଦାନ କରିଛନ୍ତି। ୩ ଲକ୍ଷ କୋଟି ଟଙ୍କାର ଏମର୍ଜେନ୍ସି କ୍ରେଡିଟ ଲାଇନ ଗ୍ୟାରେଣ୍ଟି ସ୍କିମ୍(ଇସିଏଲ୍ଜିଏସ୍) ଯୋଜନା ଅନ୍ତର୍ଗତ ଏହି ଋଣ ଏମ୍ଏସ୍ଏମ୍ଇଗୁଡିକୁ ଯୋଗାଇ ଦିଆଯାଇଛି ବୋଲି କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। କରୋନା ଭାଇରସ୍ ପାଇଁ ହୋଇଥିବା ଲକ୍ଡାଉନ ଯୋଗୁ କ୍ଷୁଦ୍ର ଶିଳ୍ପଗୁଡିକ ସମସ୍ୟାରେ ରହିଛନ୍ତି। ଏହାକୁ ଧ୍ୟାନରେ ରଖି ସରକାର ଶିଳ୍ପଗୁଡିକ ଲାଗି ପୁଞ୍ଜି ବ୍ୟବସ୍ଥା କରିଥିବା ଜଣାପଡିଛି। ଜୁନ୍ ପହିଲାରୁ ଆରମ୍ଭ ହୋଇଥିବା ଏହି ଯୋଜନାରେ ବ୍ୟାଙ୍କଗୁଡିକ ୨୪,୨୬୦ କୋଟି ଟଙ୍କାର ଋଣ ଯୋଗାଣ ଲାଗି ବର୍ତ୍ତମାନ ସୁଦ୍ଧା ମଞ୍ଜୁରୀ ପ୍ରଦାନ କରିଛନ୍ତି। କେନ୍ଦ୍ର ସରକାରଙ୍କ ଆତ୍ମନିର୍ଭର ଭାରତ ଯୋଜନାରେ ଘୋଷଣା କରାଯାଇଥିବା ୨୦ ହଜାର କୋଟି ଟଙ୍କାର ପ୍ୟାକେଜ ଅଧୀନରେ ଋଣ ଯୋଗାଣ ବ୍ୟବସ୍ଥା ସାମିଲ ହୋଇଛି। ମଞ୍ଜୁର ହୋଇଥିବା ୨୪,୨୬୦ କୋଟି ମଧ୍ୟରୁ ବ୍ୟାଙ୍କଗୁଡିକ ୧୨,୨୦୧ କୋଟି ଟଙ୍କା ବର୍ତ୍ତମାନ ସୁଦ୍ଧା ପ୍ରଦାନ କରିଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ ଟୁଇଟ ଯୋଗେ ସୂଚନା ଦେଇଛନ୍ତି।