ଭୁବନେଶ୍ୱର, ୪।୬(ସ୍ପୋଟର୍ସ ବ୍ୟୁରୋ)- ସ୍ଥାନୀୟ ସି.ଭି. ରମଣ ଇଞ୍ଜିନିୟରିଂ କ୍ରିକେଟ ଗ୍ରାଉଣ୍ଡରେ ସୋମବାରଠାରୁ ମହେନ୍ଦ୍ର ସିଂ ଧୋନୀ କ୍ରିକେଟ ଏକାଡେମୀ ଆରମ୍ଭ ହୋଇଛି। ସକାଳ ୯.୩୦ରୁ ଆରମ୍ଭ ହୋଇଥିବା ଏହି କ୍ରିକେଟ କ୍ଲିନିକ୍ରେ ରାଜ୍ୟର ବିଭିନ୍ନ ଜିଲାରୁ ୮୦ ପ୍ରତିଯୋଗୀ ଅଂଶଗ୍ରହଣ କରିଥିଲେ। ୩ ତାରିଖରୁ ଆରମ୍ଭ ହୋଇଥିବା ଏହି କ୍ଲିନିକ ୯ ତାରିଖ ପର୍ଯ୍ୟନ୍ତ ଚାଲୁ ରହିବ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ ନ୍ୟାଶନାଲ କ୍ରିକେଟ ଏକାଡେମୀ (ଏନ୍ସିଏ)ର ମାନ୍ୟତା ପ୍ରାପ୍ତ କୋଚ୍ମାନେ ପ୍ରତିଯୋଗୀମାନଙ୍କୁ ସ୍ବତନ୍ତ୍ର ପ୍ରଶିକ୍ଷଣ ଦେବେ। ବିସିସିଆଇ ଓ ଏନ୍ସିଏ ଲେଭଲ ୩ କୋଚ୍ ସତ୍ରଜିତ୍ ଲହରୀ ଓ ମନ୍ଦାର ଦଲିଭି ମହେନ୍ଦ୍ର ସିଂ ଏକାଡେମୀ କୋଚ୍ମାନେ ଏହି କ୍ଲିନିକ୍ରେ ଅତ୍ୟାଧୁନିକ ଶୈଳୀରେ ପ୍ରଶିକ୍ଷଣ ଦେବେ। କ୍ୱାଲିଟି କ୍ରିକେଟର ସୃଷ୍ଟି କରିବା ସହ ନେତୃତ୍ୱର ଓ ଦଳଗତ କାର୍ଯ୍ୟକ୍ଷମତାର ବିକାଶ ଦିଗରେ ଏହି କ୍ଲିନିକ୍ ବେଶ୍ ସହାୟକ ହେବ। ଏହି ସ୍ବତନ୍ତ୍ର କ୍ରିକେଟ ଏକାଡେମୀ ବା କ୍ଳିନିକ୍ର ଉଦ୍ଘାଟନୀ ଉତ୍ସବରେ ସି.ଭି. ରମଣ ଗ୍ରୁପ୍ ଅଫ୍ ଇନ୍ଷ୍ଟିଚ୍ୟୁଟ ଅଧ୍ୟକ୍ଷ ସଞ୍ଜୀବ ରାଜପୁତ, ହାଇ-ଟେକ ଗ୍ରୁପ୍ ଇନ୍ଷ୍ଟିଚ୍ୟୁଟ୍ କ୍ରୀଡ଼ା ନିର୍ଦ୍ଦେଶକ ପ୍ରେମ ରଞ୍ଜନ ଓଝା, ପୂର୍ବତନ ନ୍ୟାଶନାଲ ବିସିସିଆଇ ମ୍ୟାଚ୍ ରେଫରି ବିଭୁ ଶତପଥୀ, ଅର୍କା ସ୍ପୋଟର୍ସ ମ୍ୟାନେଜର ଶେଖର ଚୌହାନ, ଫିଜିକାଲ ଟ୍ରେନିଂ ଇନ୍ଷ୍ଟ୍ରକ୍ଟର ନେହା ଆରୋରା ଓ ଓଡ଼ିଶା ହାଇକୋର୍ଟ ଆଡ୍ଭୋକେଟ ସତ୍ୟବ୍ରତ ମହାପାତ୍ର ପ୍ରମୁଖ ଉପସ୍ଥିତ ଥିଲେ। ଉଲ୍ଲେଖଥାଉ କି, ଏହି ଏକାଡେମୀ କେବଳ ଭାରତ ନୁହଁ, ବିଦେଶରେ ମଧ୍ୟ କ୍ରିକେଟର ଉନ୍ନତି ପାଇଁ କାର୍ଯ୍ୟକରୁଛି। ଅତ୍ୟାଧୁନିକ ଟେକ୍ନୋଲୋଜି, ଉନ୍ନତ କୋଚିଂ ସୁବିଧାସୁଯୋଗ ସହ ମାନ୍ୟତାପ୍ରାପ୍ତ କୋଚ୍ମାନେ ଏହି ଏକାଡେମୀ ମାଧ୍ୟମରେ ପ୍ରଶିକ୍ଷଣ ପ୍ରଦାନ କରୁଛନ୍ତି।