ବ୍ରହ୍ମପୁର ଅଫିସ ,୨୯ା୩ – ବିଶ୍ୱବ୍ୟାପୀ ଆତଙ୍କର କାରଣ ପାଲଟିଥିବା କରୋନା ଭୂତାଣୁର ପ୍ରକୋପ ଏବେ ଭାରତ ଉପରେ ଧୀରେ ଧୀରେ ବଢ଼ିବାରେ ଲାଗିଛି। ବ୍ରହ୍ମପୁର ବଡ ମେଡିକାଲରେ ଦିନକୁ ଦିନ କରୋନା ସନ୍ଦିଗ୍ଧ ପୃଥକୀକରଣ କକ୍ଷରେ ଭର୍ତ୍ତି ହେଉଛନ୍ତି। ଶନିବାର ୫ ଜଣ କରୋନା ସନ୍ଦିଗ୍ଧ ଭର୍ତ୍ତି ହୋଇଥିବାବେଳେ ରବିବାର ପୁଣି ୨ ଜଣ ଭର୍ତ୍ତି ହୋଇଛନ୍ତି। ଶେରଗଡ ଅଞ୍ଚଳର ଜଣେ ଲୋକ ରାଜସ୍ଥାନରେ କାମ କରୁଥିବାବେଳେ ଗତ ୧୬ ତାରିଖରେ ଗଁାକୁ ଫେରିଥଲେ। ରବିବାର ସକାଳେ ତାଙ୍କର କାଶ ସହ ଭୀଷଣ ଜ୍ୱର ହେବାରୁ ସେ ବଡମେଡିକାଲ ସ୍ବତନ୍ତ୍ର କରୋନା କକ୍ଷରେ ଭର୍ତ୍ତି ହୋଇଛନ୍ତି। ସେହିପରି ପୁରୁଷୋତ୍ତମପୁର ଅଞ୍ଚଳର ଜଣେ ବ୍ୟକ୍ତି ଆବୁଧାବୀରେ କାମ କରୁଥିବାବେଳେ ସେ ଗତ ୧୭ରେ ଗଁାକୁ ଫେରିଥିଲେ। ଶନିବାର ଠାରୁ କାଶ ଓ ଜ୍ୱରରେ ଆକ୍ରାନ୍ତ ହୋଇଥିଲେ। ରବିବାର ସକାଳେ ତାଙ୍କୁ ବଡ ମେଡିକାଲରେ ଭର୍ତ୍ତି କରାଯାଇଥିଲା। ୨ ଜଣ ସନ୍ଦିଗ୍ଧଙ୍କ ସ୍ବାବ୍ ରବିବାର ପରୀକ୍ଷା ପାଇଁ ଭୁବନେଶ୍ୱର ଆର୍ଏମ୍ଆର୍ସିକୁ ପଠାଯାଇଛି ବୋଲି ମେଡିକାଲ ଅଧିକ୍ଷକ ପ୍ରଫେସର ଡାକ୍ତର ସନ୍ତୋଷ କୁମାର ମିଶ୍ର ସୂଚନା ଦେଇଛନ୍ତି। ସେହିପରି ଶନିବାର କରୋନା ୱାର୍ଡରେ ଭର୍ତ୍ତି ହୋଇଥିବା ୫ ଜଣ ସନ୍ଦିଗ୍ଧଙ୍କ ରିପୋର୍ଟ ରବିବାର ରାତିସୁଦ୍ଧା ଏମ୍କେସିଜି ମେଡିକାଲକୁ ଆସିଯିବ ବୋଲି ସେ କହିଛନ୍ତି। ଅନ୍ୟପଟେ ଗତ ୨୬ ତାରିଖରେ ମାଲଦୀପରୁ ଫେରିଥିବା କବିସୂର୍ଯ୍ୟନଗର ଅଞ୍ଚଳର ଜଣେ ବ୍ୟକ୍ତି ଏମ୍କେସିଜି ମେଡିକାଲ କରୋନା ୱାର୍ଡରେ ଭର୍ତ୍ତି ହୋଇଥିବାବେଳେ ତାଙ୍କ ସ୍ବାବ୍ ରିପୋର୍ଟ ନେଗେଟିଭ ଆସିଛି। ରବିବାର ତାଙ୍କୁ ମେଡିକାଲରୁ ଡିସଚାର୍ଜ କରାଯିବ ବୋଲି ଅଧିକ୍ଷକ ମିଶ୍ର କହିଛନ୍ତି।