ବ୍ରହ୍ମପୁର ଅଫିସ,୭ା୫-ଗଞ୍ଜାମ ଜିଲାରେ ଏବେ ସୁରଟ ଫେରନ୍ତାଙ୍କୁ ନେଇ ଚିନ୍ତା ବଢ଼ିବାରେ ଲାଗିଛି। ଗୋଟିଏ ପଟେ ଲଗାତର ଜିଲାର ସନ୍ଦିଗ୍ଧ କରୋନା ଲକ୍ଷଣ ଥିବା ଲୋକମାନେ ଏମ୍କେସିଜିରେ ଭର୍ତ୍ତି ହେଉଥିବା ବେଳେ ନିକଟରେ ଗଞ୍ଜାମକୁ ସୁରଟରୁ ଫେରିଥିବା ପ୍ରବାସୀ ଓଡ଼ିଆଙ୍କୁ ବିଭିନ୍ନ ସଂଗରୋଧ କକ୍ଷରେ ରଖାଯାଇଛି। ସେମାନଙ୍କ ସ୍ବାବ୍ ରିପୋର୍ଟରେ ଲକ୍ଡାଉନ କୋହଳ ହେବା ପରଠାରୁ ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। ଦିନକୁ ଦିନ ଜିଲାର ସ୍ଥିତି ଅସମ୍ଭାଳ ହେବାରେ ଲାଗିଛି। ଗୁରୁବାର ଜିଲାର ବିଭିନ୍ନ ସଂଗରୋଧ କକ୍ଷରେ ଥିବା ୧୭ ସୁରଟ ଫେରନ୍ତାଙ୍କୁ ଏମ୍କେସିଜିର ସ୍ବତନ୍ତ୍ର କରୋନା ୱାର୍ଡରେ ଭର୍ତ୍ତି କରାଯାଇଛି। ଏନେଇ ମେଡିକାଲ ଅଧୀକ୍ଷକ ଡାକ୍ତର ସନ୍ତୋଷ କୁମାର ମିଶ୍ର ଗୁରୁବାର ସୂଚନା ଦେଇଛନ୍ତି। ସମସ୍ତ ସନ୍ଦିିଗ୍ଧଙ୍କ ସ୍ବାବ୍ ନମୁନା ସଂଗ୍ରହ କରାଯିବ। ପରେ ସେଗୁଡିକ ଏମ୍କେସିଜି ମେଡିକଲ ଅଣୁଜୀବ ବିଭାଗରେ ଥିବା ପରୀକ୍ଷା କେନ୍ଦ୍ରକୁ ପଠାଯିବା ସହ ଭୁବନେଶ୍ୱର ଆରଏମ୍ଆରସିକୁ ଯିବ ବୋଲି ସେ କହିଛନ୍ତି। ସେହିପରି ପୂର୍ବରୁ ଏମ୍କେସିଜିର କରୋନା ୱାର୍ଡରେ ଚିକିତ୍ସିତ ଥିବା ୫ ସନ୍ଧିଗ୍ଧଙ୍କ ସ୍ବାବ୍ ରିପୋର୍ଟ ଗୁରୁବାର ପହଞ୍ଚିବ ବୋଲି ସେ କହିଛନ୍ତି। ଅନ୍ୟପଟେ ଏପ୍ରିଲରେ ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲରେ ୨୨ ଲକ୍ଷ ଟଙ୍କା ବ୍ୟୟରେ ଗୋଟିଏ ପିସିଆର ମେଶିନ କାର୍ଯ୍ୟକ୍ଷମ କରାଯାଇଥିଲା। ସେହିପରି ଏମ୍କେସିଜି ମେଡ଼ିକାଲକୁ ଦ୍ୱିତୀୟ କରୋନା ପରୀକ୍ଷା ମେଶିନ ଆସିଛି। ଯାହା ଖୁବ୍ଶୀଘ୍ର କାର୍ଯ୍ୟକ୍ଷମ ହେବ ବୋଲି ସେ କହିଛନ୍ତି। ସେଥିରେ ମଧ୍ୟ ଦିନକୁ ସର୍ବାଧିକ ୧୨୮ ନମୁନା ପରୀକ୍ଷା କରାଯାଇପାରିବ ବୋଲି ସେ କହିଛନ୍ତି। ଦ୍ୱିିତୀୟ ପିସିଆର ମେଶିନ କର୍ଯ୍ୟକ୍ଷମ ହେବା ପରେ ମେଡିକାଲରେ ଗୋଟିଏ ଦିନରେ ପ୍ରାୟ ୨୫୬ ସ୍ବାବ୍ ନମୁନା ପରୀକ୍ଷା କରାଯାଇପାରିବ। ଏଥି ପାଇଁ ଆବଶ୍ୟକ କିଟ୍ ମଧ୍ୟ ଏମ୍କେସିଜି ମେଡ଼ିକାଲରେ ମହଜୁଦ ରହିଥିବା ଅଧୀକ୍ଷକ ମିଶ୍ର ସୂଚନା ଦେଇଛନ୍ତି।