ଢେଙ୍କାନାଳ ଅଫିସ, ୩୦ା୫
କରୋନା ସଙ୍କଟ ସମୟରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)କୁ ସଫଳତାର ସହ କାର୍ଯ୍ୟକାରୀ କରି ନୂଆ ରେକର୍ଡ ସୃଷ୍ଟି କରିଛି ଢେଙ୍କାନାଳ ଜିଲା। କେବଳ ମେ’ ମାସରେ ଏହି ଯୋଜନାରେ ୪ଲକ୍ଷ ୫୬ହଜାର ୩୩୦ ଶ୍ରମ ଦିବସ ସୃଷ୍ଟି ହୋଇଛି, ଯାହା ସର୍ବକାଳୀନ ରେକର୍ଡ। ଏମ୍ଜିଏନ୍ଆରଇଜିଏସ୍ କାର୍ଯ୍ୟକାରିତାରେ ରାଜ୍ୟର ଅନ୍ୟ ସମସ୍ତ ଜିଲାକୁ ପଛରେ ପକାଇ ଢେଙ୍କାନାଳ ଶୀର୍ଷସ୍ଥାନ ହାସଲ କରିଥିବା ଗ୍ରାମ୍ୟ ଉନ୍ନୟନ ସଂସ୍ଥା ପକ୍ଷରୁ ସୂଚନା ଦିଆଯାଇଛି।
କରୋନା ସମସ୍ୟା ଭିତରେ ଜିଲାର ଶ୍ରମଜୀବୀଙ୍କୁ ରୋଜଗାରକ୍ଷମ କରିବାକୁ ଏପ୍ରିଲ୍ ୫ରୁ ଏମ୍ଜିଏନ୍ଆରଇଜିଏସ୍ରେ କାମ ଆରମ୍ଭ ହୋଇଥିଲା। ଲକ୍ଡାଉନ୍ ପ୍ରତିବନ୍ଧକ ଯୋଗୁ ପାଖାପାଖି ମାସେ କାମ ବନ୍ଦ ରହିଥିଲା। ରାଜ୍ୟ ସରକାରଙ୍କଠାରୁ ଅନୁମତି ମିଳିବା ପରେ ଗ୍ରାମାଞ୍ଚଳରେ ପ୍ରକଳ୍ପ କାର୍ଯ୍ୟ ତ୍ୱରାନ୍ବିତ ହୋଇଥିଲା। ଏହାର ମଙ୍ଗ ସମ୍ଭାଳିଥିଲେ ଜିଲାପାଳ ଭୂମେଶ ଚନ୍ଦ୍ର ବେହେରା। ଯୋଜନାରେ ଜଳଅମଳ ପ୍ରକଳ୍ପ, ପୋଖରୀ ଖନନ, ପୋଖରୀ ପୁନରୁଦ୍ଧାର, କୂପଖନନ, ଜମି ଉନ୍ନତୀକରଣ, ଗଁା ରାସ୍ତା ସଂଯୋଗୀକରଣ, ଜଳ ସଂରକ୍ଷଣ ଉପରେ ଗୁରୁତ୍ୱ ଦିଆଯାଉଛି। ୨୦୧୯-୨୦ ଆର୍ଥତ୍କ ବର୍ଷରେ ଯୋଜନାରେ ୯୪୬୦.୨୩ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ମୋଟ ୩୫ଲକ୍ଷ ୩୦ହଜାର ୪୯୭ ଶ୍ରମ ଦିବସ ସୃଷ୍ଟି କରାଯାଇଥିଲା। ଚଳିତ ଆର୍ଥତ୍କ ବର୍ଷରେ ବର୍ତ୍ତମାନ ସୁଦ୍ଧା ୪,୩୪୧ ପ୍ରକଳ୍ପ ଅନୁମୋଦିତ ହୋଇଛି। ମେ ୨୮ ସୁଦ୍ଧା ଜିଲାରେ ୧୪କୋଟି ୮୭ଲକ୍ଷ ଟଙ୍କା ଖର୍ଚ୍ଚ କରାଯାଇ ମୋଟ ୫ଲକ୍ଷ ୧୩ହଜାର ଶ୍ରମ ଦିବସ ସୃଷ୍ଟି କରାଯାଇଛି। ୩୪,୮୯୦ ପରିବାରର ୬୨,୩୬୩ ଲୋକଙ୍କୁ କାମ ଯୋଗାଇ ଦିଆଯାଇଛି ା ୧ଲକ୍ଷ ୯୪ହଜାର ୭୫୭ ପରିବାରକୁ ଜବକାର୍ଡ ମିଳିଛି। ଲକ୍ଡାଉନ ସମୟରେ ଜିଲାକୁ ଆସିଥିବା ୫୦୦ ପ୍ରବାସୀ ଓଡ଼ିଆ ପରିବାରକୁ ଜବକାର୍ଡ ଦିଆଯାଇଛି। ସପ୍ତଶଯ୍ୟା ପଞ୍ଚାୟତ ପଦ୍ମନାଭପୁର ଗ୍ରାମ ପଧାନି ନାଳ ପୁନରୁଦ୍ଧାର କାର୍ଯ୍ୟରେ ନିୟୋଜିତ ଶ୍ରମିକ ଅରକ୍ଷିତ ପ୍ରଧାନ (୨୫), ଲମ୍ବୋଦର ପ୍ରଧାନ (୨୪) କୁହନ୍ତି, ବାହାର ରାଜ୍ୟରେ କାମ କରୁଥିଲୁ। ଲକ୍ଡାଉନ୍ ସମୟରେ କାମ ନ ମିଳିବାରୁ ପେଟ ପୋଷିବା କଷ୍ଟକର ହୋଇପଡ଼ିଥିଲା। ସରକାର ଭିଟାମାଟିକୁ ଫେରାଇ ଆଣିବା ପରେ କାମ କରୁଛୁ। ନିଜ ଅଞ୍ଚଳରେ କାମ ମିଳିଲେ କାହିଁକି ବାହାରକୁ ଯିବୁ ବୋଲି ଉଭୟେ କହିଛନ୍ତି।