ମୁମ୍ବାଇ,୨୩ା୭(ଆଇଏଏନ୍ଏସ୍): ମୁମ୍ବାଇର ବାନ୍ଦ୍ରାଠାରେ ଥିବା ଏମ୍ଟିଏନ୍ଏଲ୍ ବିଲ୍ଡିଂରେ ସୋମବାର ଅପରାହ୍ନରେ ନିଆଁ ଲାଗିଯାଇଥିଲା। ଉକ୍ତ ବିଲ୍ଡିଂରେ ଫସିଥିବା ୮୪ ଜଣଙ୍କୁ ଉଦ୍ଧାର କରାଯାଇଛି। ଅପରାହ୍ନ ୩ଟା ୧୦ରେ ଏହି ୯ ମହଲା ବିଲ୍ଡିଂର ଚତୁର୍ଥ ମହଲାରେ ନିଆଁ ଲାଗିଯାଇଥିଲା। କ୍ରମେ ଏହା ଉପର ମହଲାଗୁଡ଼ିକୁ ବ୍ୟାପିବାରେ ଲାଗିଥିଲା। ସେଠାରେ କାମ କରୁଥିବା ଲୋକମାନେ ବାହାରି ନ ପାରିବାରୁ ଆତଙ୍କ ଖେଳିଯାଇଥିଲା। ୩୧ଟି ଦମକଳ ଗାଡ଼ି ସହ ଅଗ୍ନିଶମ କର୍ମଚାରୀ ପହଞ୍ଚି ଲୋକମାନଙ୍କୁ ଉଦ୍ଧାର କରିଛନ୍ତି। ନିଆଁ କିପରି ଲାଗିଲା ତାହା ଏପର୍ଯନ୍ତ ସ୍ପଷ୍ଟ ହୋଇ ନ ଥିବାବେଳେ ତାର ପୋଡିଯିବାର ଗନ୍ଧ ପ୍ରଥମେ ଆସିଥିଲା ବୋଲି ପ୍ରତ୍ୟକ୍ଷଦର୍ଶୀ କହିଛନ୍ତି। ପୋଲିସ ଘଟଣାର ତଦନ୍ତ କରୁଛି।
