??
ଧର୍ମଶାଳା,୧୩ା୮(ଡି.ଏନ୍.ଏ.)- ଯାଜପୁର ଏମ୍ପି ଶର୍ମିଷ୍ଠା ସେଠୀ ସୋମବାର ଅଚାନକ୍ ଧର୍ମଶାଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରିଛନ୍ତି। ପ୍ରଥମେ ସେ ମେଡିକାଲରେ ଥିବା ରୋଗୀଙ୍କ ଚିକିତ୍ସା ସମ୍ପର୍କରେ ସ୍ବାସ୍ଥ୍ୟକେନ୍ଦ୍ର ଅଧିକାରୀଙ୍କୁ ପଚାରି ବୁଝିଥିଲେ। ଏଥିସହ ବିଭିନ୍ନ ବିଭାଗ ବୁଲିଦେଖିବା ସହ ନିରାମୟ ଯୋଜନାରେ ରୋଗୀ ଉପଯୁକ୍ତ ଔଷଧ ପାଉଛନ୍ତି ନା ନାହିଁ ସେ ସମ୍ପର୍କରେ ପଚାରିଥିଲେ। ପରେ ମେଡିକାଲ ପରିସରରେ ଥିବା ଏମ୍ସିଏଚ୍ ବିଲଡିଂ ପରିଦର୍ଶନ କରିଥିଲେ। କେଉଁ କାରଣରୁ ଏହା କାର୍ଯ୍ୟକ୍ଷମ ହେଉ ନାହିଁ ସେ ନେଇ ଅଧିକାରୀଙ୍କ ସହ ଆଲୋଚନା କରିଥିଲେ। ଡାକ୍ତରଖାନାରେ ଦୀର୍ଘଦିନ ହେବ ଖାଲି ପଡିଥିବା ଡାକ୍ତର ପଦବୀ ଓ ଅନ୍ୟାନ୍ୟ ଆନୁଷାଙ୍ଗିକ ସୁବିଧା ଉପଲବ୍ଧ ନ ଥିବାରୁ ଏମ୍ପି ଅସନ୍ତୋଷ ବ୍ୟକ୍ତ କରିଥିଲେ। ଡାକ୍ତରଖାନାରେ ଥିବା ବିଭିନ୍ନ ସମସ୍ୟା ସମ୍ପର୍କରେ ଅବଗତ ହେବା ସହ ଏହାର ସମାଧାନ ପାଇଁ ବିଭାଗୀୟ ମନ୍ତ୍ରୀଙ୍କ ସହିତ ଆଲୋଚନା କରି ପଦକ୍ଷେପ ନେବେ ବୋଲି ସେ କହିଛନ୍ତି। ଏହି ଗସ୍ତ ସମୟରେ ଯାଜପୁର ଏଡିଏମ୍ଓ କାହ୍ନୁଚରଣ ନାୟକ, ଧର୍ମଶାଳା ସିଏଚ୍ସିର ଅଧିକାରୀ ମାନସରଞ୍ଜନ ସ୍ବାଇଁ, ବିଏଚ୍ଇଓ ଏସ୍ ମହାନ୍ତି ପ୍ରମୁଖ ଉପସ୍ଥିତ ଥିଲେ । ପ୍ରକାଶ ଯେ, ଏହି ଡାକ୍ତରଖାନାରେ ୬ ଜଣ ଡାକ୍ତରଙ୍କ ଆବଶ୍ୟକତା ରହିଥିବା ବେଳେ ମାତ୍ର ୩ ଜଣ ଡାକ୍ତର ଥିବାରୁ ଅନେକ ସମୟରେ ରୋଗୀସେବା ବ୍ୟାହତ ହେଉଥିବା ଅଭିଯୋଗ ହୋଇଛି।