କେନ୍ଦ୍ରାପଡା ଅଫିସ,୩୧।୧: ବିବାଦ କେନ୍ଦ୍ରାପଡା ଏମପି ଅନୁଭବ ମହାନ୍ତିଙ୍କ ପିଛା ଛାଡୁନାହିଁ। ପୂର୍ବରୁ ତାଙ୍କ ନାମରେ କଟକର ପୁରୀଘାଟ ଥାନା ଓ କେନ୍ଦ୍ରାପଡ଼ା ଟାଉନ ଥାନାରେ ଦୁଇଟି ମାମଲା ରୁଜୁ ହୋଇଥିବା ବେଳେ ଗୁରୁବାର ସନ୍ଧ୍ୟାରେ ପ୍ରଚାରପତ୍ର ବାବଦରେ ବାକି ଟଙ୍କା ସୁଝୁ ନ ଥିବା ଦର୍ଶାଯାଇ ସଦର ଥାନାରେ ଅଭିଯୋଗ ପତ୍ର ଦାଖଲ ହୋଇଛି। ଏହା ପୂର୍ବରୁ ଏହି ଅଭିଯୋଗ ପତ୍ର ଅନ୍ଲାଇନରେ କେନ୍ଦ୍ରାପଡା ଏସପି, ପ୍ରଧାନମନ୍ତ୍ରୀ କାର୍ଯ୍ୟାଳୟ ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଅଭିଯୋଗକାରୀ ଗରାପୁରସ୍ଥ ବଳଦେବଜୀଉ ଆଡ ମିଡିଆ ମାଲିକ ସ୍ମୃତିରଞ୍ଜନ ସ୍ବାଇଁ ପ୍ରଦାନ କରିଛନ୍ତି। ଏ ସମ୍ପର୍କରେ ସେ କୁହନ୍ତି ଯେ, ଗତ ସାଧାରଣ ନିର୍ବାଚନ ସମୟରେ ପ୍ରଚାର ସଂକ୍ରାନ୍ତୀୟ କାର୍ଯ୍ୟ କରିଥିଲେ। ଏହି ସମୟରେ ଆଡମିଡିଆ ହାଉସର ବ୍ୟାନର, ପୋଷ୍ଟର, ଷ୍ଟିକର, ହୋର୍ଡିଂ ଓ ଭ୍ୟାନ ଡେକୋରେଶନ ବାବଦ ମୋଟ ୩୨,୫୬,୪୦୦ ଟଙ୍କା ବିଲ୍ ହୋଇଥିଲା। ଇତିମଧ୍ୟରେ ୨୧,୧୦,୯୯୧ ଟଙ୍କା ସେ ପଇଠ କରିଥିଲେ ମଧ୍ୟ ଅବଶିଷ୍ଟ ୧୧,୪୫,୪୩୯ ଟଙ୍କା ମିଳିନାହିଁ। ଏ ସମ୍ପର୍କରେ ବହୁବାର ଏମପି ମହାନ୍ତିଙ୍କୁ ଜଣାଇ ଥିଲେ ମଧ୍ୟ ବକେୟା ଟଙ୍କା ମିଳି ନ ଥିବାରୁ ଏନେଇ ଥାନାର ଆଶ୍ରୟ ନେଇଥିବା ଆଡମିଡିଆ ମାଲିକ ସ୍ବାଇଁ ପ୍ରକାଶ କରିଛନ୍ତି। ଏ ନେଇ ସଦର ଥାନା ଅଧିକାରୀ ପ୍ରମୋଦ ମଲ୍ଲିକ କହିଛନ୍ତି ଯେ, ଅଭିଯୋଗ ପତ୍ର ଥାନାରେ ପହଞ୍ଚିଛି। ଏନେଇ କାର୍ଯ୍ୟାନୁଷ୍ଠାନ ହେବ। ଅଭିଯୋଗ ସମ୍ପର୍କରେ ଏମପି ମହାନ୍ତିଙ୍କୁ ପଚାରିବାରେ ସେ କହିଛନ୍ତି ଯେ, ପ୍ରଚାର କାର୍ଯ୍ୟ ବାବଦରେ ଖର୍ଚ୍ଚ ହୋଇଥିବା ସବୁ ଟଙ୍କା ପ୍ରଦାନ କରାଯାଇଛି। ତେବେ ଗତ ଦୁଇ ଦିନ ତଳେ କେନ୍ଦ୍ରାପଡା ସ୍ବୟଂଶାସିତ କଲେଜରେ ଏକ ୟୁଥ କନ୍କ୍ଲେଭର ଆୟୋଜନ ହୋଇଥିଲା। ଏହି କନ୍କ୍ଲେଭକୁ କେନ୍ଦ୍ରାପଡାବାସୀ ସହଯୋଗ କରିଥିବା ବେଳେ କେତେକ ଖଳପ୍ରକୃତିର ବ୍ୟକ୍ତି ମତେ ବଦନାମ କରିବା ପାଇଁ ଏହି ପ୍ରଚାର ଚଳାଇଛନ୍ତି।