ରାଜୌରି,୨୬।୮: ଜମ୍ମୁ-କଶ୍ମୀରର ରାଜୌରି ଜିଲାରେ ଇରମିମ ଶମିମ ନାମକ ଜଣେ ଛାତ୍ରୀ ପ୍ରଥମ କରି ଅଲ୍ ଇଣ୍ଡିଆ ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନସେସ୍ (ଏମ୍ସ)ରେ ଏମ୍ବିବିଏସ୍ ପଢିବାର ସୁଯୋଗ ପାଇଛନ୍ତି। ଇରମିମ ଜଣେ ଗୁଜ୍ଜର ସମ୍ପ୍ରଦାୟର ମହିଳା। ଗତ ଜୁନ୍ ମାସରେ ଅନୁଷ୍ଠିତ ହୋଇଥିବା ମେଡିକାଲ ଏଣ୍ଟ୍ରାନ୍ସ ପରୀକ୍ଷାରେ ସେ କୃତକାର୍ଯ୍ୟ ହୋଇଛନ୍ତି। ଏବେ ସେ ଏମ୍ସରେ ଏମ୍ବିବିଏସ୍ର ଛାତ୍ରୀ ଭାବେ ନାମ ଲେଖାଇବେ। ଇରମିମ ଖୁବ୍ ପରିଶ୍ରମି ହୋଇଥିବା ବେଳେ ତାଙ୍କ ଗାଁ ଧନୋରରେ ଭଲ ସ୍କୁଲ ନ ଥିବାରୁ ସେ ପ୍ରତିଦିନ ପ୍ରାୟ ୧୦ କିଲୋମିଟର ଚାଲି ଚାଲି ସ୍କୁଲ ଯାଇଥାଆନ୍ତି ବୋଲି ପ୍ରକାଶ କରିଛନ୍ତି। ଇରମିମ ପଛୁଆ ବର୍ଗର ହୋଇଥିବା ବେଳେ ତାଙ୍କ ପରିବାରର ଆର୍ଥିକ ପରିସ୍ଥିତି ମଧ୍ୟ ସେତେ ଭଲ ନୁହେଁ। ହେଲେ ନିଜର ଦୃଢ ମନୋବଳ ପାଇଁ ସେ ଆଜି ଏମ୍ସରେ ପଢିବାର ସୁଯୋଗ ପାଇଥିବା କହିଛନ୍ତି।