ଝାରସୁଗୁଡା ଅଫିସ/ଲଖନପୁର, ୧୧।୧୦(ଡି.ଏନ୍.ଏ.)-ଝାରସୁଗୁଡା ଜିଲା ବ୍ରଜରାଜନଗର ଥାନା ଅଧିନ ଏମ୍ସିଏଲ୍ ଲଜକୁରା କୋଇଲା ସାଇଡିଙ୍ଗ୍ ରେଳଧାରଣାରୁ ଶୁକ୍ରବାର ପୋଲିସ ଜଣେ ଯୁବକଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର କରିଛି । ମୃତ ଯୁବକ ଜଣଙ୍କ ହେଲେ ସ୍ଥାନୀୟ ଗଙ୍ଗାନଗର ତେଲିପଡାର ଛୋଟୁ ସିଂହ(୨୬)। ରାମପୁର ଫାଣ୍ଡି ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଏନେଇ ପୋଲିସ ବ୍ରଜରାଜନଗର ଥାନା ଅପମୃତ୍ୟୁ କେଶ ନଂ ୨୮/୧୯ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି।
ସୂଚନାନୁଯାୟୀ, ଯୁବକଜଣଙ୍କ ଗତ ୨ମାସ ତଳେ ଦୁଘର୍ଟଣାରେ ଆହତ ହୋଇଥିଲେ। ଏଥିରେ ସେ ଶାରିରିକ ଓ ମାନସିକ ଭାବେ ପ୍ରଭାବିତ ହୋଇଥିଲେ। ଏଭଳି ସ୍ଥିତିରେ ସେ ରହିଥିବା ବେଳେ ସକାଳେ ଗଙ୍ଗାନଗରରେ ବୁଲାବୁଲି କରୁଥିବା ଲୋକେ ଦେଖିଥିଲେ। ତାପରେ ତାଙ୍କୁ ଆଉ ଦେଖିବାକୁ ମିଳି ନ ଥିଲା । ଏହାର କିଛି ସମୟ ପରେ ତାଙ୍କ ଖଣ୍ଡ ବିଖଣ୍ଡିତ ମୃତଦେହ ରେଳଧାରଣାରେ ପଡିଥିବା ଦେଖିବାକୁ ମିଳିଥିଲା। ଏଣୁ ଆତ୍ମହତ୍ୟା କରିଥାଇପାରନ୍ତି ପୋଲିସ ସନ୍ଦେହ କରୁଛି।