ତାଳଚେର,୧୬ା୬(ନି.ପ୍ର.)- ଆଗାମୀ ୫ ବର୍ଷରେ ଏମ୍ସିଏଲ୍ ୩ଶହ ମିଲିୟନ ଟନ୍ କୋଇଲା ଉତ୍ପାଦନ କରିବ ବୋଲି ସିଏମ୍ଡି ଭୋଳାନାଥ ଶୁକ୍ଳା ପ୍ରକାଶ କରିଛନ୍ତି। ଡେରା ସିଏମ୍ଡି ବଙ୍ଗଳା ଠାରେ ଆୟୋଜିତ ଏକ ଖବରଦାତା ସମ୍ମିଳନୀରେ ସିଏମ୍ଡି କହିଥିଲେ ଯେ, ଏହି ସମୟ ମଧ୍ୟରେ କେବଳ ତାଳଚେର କୋଲ୍ ଫିଲଡ୍ସରୁ ୨ଶହ ମିଲିୟନ ଟନ କୋଇଲା ଉତ୍ତୋଳନ କରାଯିବ। ଏଥିପାଇଁ ୨ଶହ ଗ୍ରାମ ବିସ୍ଥାପିତ ହେବ। ୨୦୩୦ରେ ତାଳଚେରରୁ ୩ଶହ ମିଲିୟନ ଟନ୍ କୋଇଲା ଉତ୍ତୋଳନ ହେବ। ଏହା ସହିତ ପ୍ରାଇଭେଟ କମ୍ପାନୀ ଦ୍ୱାରା ଆଉ ୩ଶହ ମିଲିୟନ ଟନ୍ ଉତ୍ପାଦନର ଯୋଜନା ରହିଛି। ଏହି କୋଇଲା ପରିବହନ ନିମନ୍ତେ ତାଳଚେରରୁ-ରାଜ ଆଠଗଡ ପର୍ଯ୍ୟନ୍ତ ଆଉ ଦୁଇଟି (୩ ଓ ୪ ନମ୍ବର) ରେଳପଥ ନିର୍ମାଣ କରାଯିବ। ରେଲ୍ୱେ, ୱାସରୀ, ସାଇଲୋ, ଏଚ୍ଇଏମ୍ର ଉନ୍ନତୀକରଣ କରାଯିବ।
ଏମ୍ସିଏଲ୍ର ନୂତନ ଯୋଜନା ସମ୍ପର୍କରେ ସିଏମ୍ଡି କହିଥିଲେ, ଆଗାମୀ ୧୦ ବର୍ଷ ଭିତରେ ଏମ୍ସିଏଲ୍ର କୌଣସି ସମସ୍ୟା ରହିବ ନାହିଁ। ତାଳଚେର ଓ ଏମ୍ସିଏଲ୍ର ଭବିଷ୍ୟତ ଉଜ୍ଜ୍ୱଳ ଏବଂ ସୁରକ୍ଷିତ। ସବୁ କ୍ଷେତ୍ରରେ ସ୍ବଚ୍ଛତାକୁ ପ୍ରାଥମିକତା ଦିଆଯିବ। କୋଇଲା ଉତ୍ତୋଳନ ବୃଦ୍ଧି ଦ୍ୱାରା ଡିଏମ୍ଏଫ୍ ଫଣ୍ଡକୁ ଅଧିକ ଟଙ୍କା ମିଳିବ। ଏହାଦ୍ୱାରା ଅଞ୍ଚଳର ବିକାଶ ସମ୍ଭବ ହୋଇପାରିବ। ତାଳଚେରର ଉନ୍ନତି ପାଇଁ ଏକ ମାଷ୍ଟରପ୍ଲାନ ସହ ବିଭିନ୍ନ ଉନ୍ନତିମୂଳକ କାମ କରାଯିବାକୁ ଲକ୍ଷ୍ୟ ରଖାଯାଇଛି। ମେଡିକାଲ କଲେଜ ନିର୍ମାଣ କାମ ବାକି ରହିଛି। ଏ ଦିଗରେ ଅନୁଧ୍ୟାନ କରାଯାଇ ଠିକ୍ ପଦକ୍ଷେପ ନିଆଯିବ। ଲୋକଙ୍କ ସହ ପ୍ରଶାସନର ସହଯୋଗ ଓ ଏମ୍ସିଏଲ୍ ଟିମ୍ ଠିକ୍ କାମ କଲେ ଚଳିତ ବର୍ଷ ଲକ୍ଷ୍ୟଧାର୍ଯ୍ୟରେ କୌଣସି ଅସୁବିଧା ରହିବ ନାହିଁ। ଏଥିପାଇଁ ସେ ସମସ୍ତଙ୍କ ସହଯୋଗ କାମନା କରିଥିଲେ। ଅନ୍ୟମାନଙ୍କ ମଧ୍ୟରେ ଡାଇରେକ୍ଟର ଫାଇନାନ୍ସ କେ.ଆର. ବାସୁଦେବନ, ଜଗନ୍ନାଥ କ୍ଷେତ୍ର ମହାପ୍ରବନ୍ଧକ ଏମ୍.ଜି. ବ୍ରହ୍ମପୁରକରଙ୍କ ସମେତ ଅନ୍ୟ ବରିଷ୍ଠ ପଦାଧିକାରୀ ଉପସ୍ଥିତ ଥିଲେ। ଶନିବାର ସନ୍ଧ୍ୟାରେ ସିଏମ୍ଡି ଏଠାରେ ପହଞ୍ଚିଥିଲେ। ରବିବାର ବିଭିନ୍ନ କୋଇଲା ଖଣି ପରିଦର୍ଶନ କରିବା ସହ ଉଚ୍ଚପଦାଧିକାରୀଙ୍କ ସହିତ ଏକ ସମୀକ୍ଷା ବୈଠକରେ ଯୋଗ ଦେଇଥିଲେ। ସୋମବାର ହିଙ୍ଗୁଳା ମନ୍ଦିର ଦର୍ଶନ ପରେ ଅନ୍ୟ କେତେକ ଖଣି ପରିଦର୍ଶନ କରିବାର କାର୍ଯ୍ୟକ୍ରମ ରହିଛି।