ଲଣ୍ଡନ, ୭ା୫ (ପି.ଟି.)-କୁମାର ସଙ୍ଗାକାରା ଦ୍ୱିତୀୟ ଥର ପାଇଁ ମେରିଲ୍ବୋନ କ୍ରିକେଟ କ୍ଲବ (ଏମ୍ସିସି)ର ସଭାପତି ହେବେ। ଏଥିପାଇଁ ତାଙ୍କ ନାମ ସୁପାରିସ କରାଯିବ ବୋଲି କ୍ଲବ ତରଫରୁ ବୁଧବାର ପ୍ରକାଶ କରାଯାଇଛି। ଶ୍ରୀଲଙ୍କାର ପୂର୍ବତନ ଉଇକେଟକିପର ବ୍ୟାଟ୍ସମ୍ୟାନ ଗତବର୍ଷ ଅକ୍ଟୋବର ୧ରେ କ୍ଲବର ପ୍ରଥମ ଅଣ-ବ୍ରିଟିଶ ସଭାପତି ଭାବେ ଦାୟିତ୍ୱ ଗ୍ରହଣ କରିଥିଲେ। କୋଭିଡ୍-୧୯ ଯୋଗୁ ସମଗ୍ର ବିଶ୍ୱରେ କ୍ରିକେଟ ଖେଳ ବାଧାପ୍ରାପ୍ତ ହୋଇଛି। ଏହିପରିପ୍ରେକ୍ଷୀରେ କମିଟି ସଙ୍ଗକାରାଙ୍କ କାର୍ଯ୍ୟକାଳ ବୃଦ୍ଧି କରିବା ବିଚାର କରିଛି। ୨୦୨୧ ସେପ୍ଟେମ୍ବର ୩୦ ପର୍ଯ୍ୟନ୍ତ ପୁନର୍ବାର କ୍ଲବର ସଭାପତି ଦାୟିତ୍ୱ ବହନ କରିବା ଲାଗି ପୂର୍ବତନ ଶ୍ରୀଲଙ୍କା ବ୍ୟାଟ୍ସମ୍ୟାନଙ୍କୁ ଆମନ୍ତ୍ରଣ କରିବ। ତେବେ ସଙ୍ଗକାରାଙ୍କ କାର୍ଯ୍ୟକାଳ ବୃଦ୍ଧି ସଂକ୍ରାନ୍ତ ସୁପାରିସ କ୍ଲବର ସଦସ୍ୟମାନଙ୍କ ବାର୍ଷିକ ସାଧାରଣ ବୈଠକରେ ଗୃହୀତ ହେବା ଆବଶ୍ୟକ। ଏହି ବୈଠକ ଜୁନ୍ ୨୪ରେ ବସିବାର କାର୍ଯ୍ୟକ୍ରମ ରହିଛି। ଏମ୍ସିସି ସଭାପତିଙ୍କ କାର୍ଯ୍ୟକାଳ ସାଧାରଣତଃ ୧୨ମାସ ହୋଇଥାଏ। ମାତ୍ର ଅତୀତରେ ବିଶେଷ କ୍ଷେତ୍ରରେ ଏହାର ମିଆଦ ବୃଦ୍ଧି କରାଯାଇଛି। ଅତୀତରେ ଦୁଇଟି ବିଶ୍ୱଯୁଦ୍ଧ ସମୟରେ ଲର୍ଡ ହକ୍ (୧୯୧୪-୧୮) ଓ ଷ୍ଟାନ୍ଲି ଖ୍ରିଷ୍ଟୋଫର୍ସନ (୧୯୩୯-୪୫) ଏକ ବର୍ଷରୁ ଅଧିକ ସମୟ ଧରି ସଭାପତି ଭାବେ କାର୍ଯ୍ୟ କରିଛନ୍ତି। ସୂଚନାଯୋଗ୍ୟ, ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଜୁଲାଇ ୧ ପର୍ଯ୍ୟନ୍ତ ସମସ୍ତ ପ୍ରକାର ପ୍ରଫେସନାଲ କ୍ରିକେଟକୁ ସସ୍ପେଣ୍ଡ କରିଛି।