ନୂଆଦିଲ୍ଲୀ,୨୭।୫: ଭାରତୀୟ ଜୀବନ ବୀମା ନିଗମ(ଏଲ୍ଆଇସି) ପକ୍ଷରୁ ସଂଶୋଧିତ ପ୍ରଧାନମନ୍ତ୍ରୀ ବୟ ବନ୍ଧନ ଯୋଜନା(ପିଏମ୍ଭିଭିଓ୍ବାଇ)କୁ ଶୁଭାରମ୍ଭ କରାଯାଇଛି। ଏହି ଯୋଜନା ୨୬ ମେ ୨୦୨୦ ଠାରୁ ୩ ଆର୍ଥତ୍କ ବର୍ଷ ଅର୍ଥାତ୍ ୩୧ ମାର୍ଚ୍ଚ ୨୦୨୩ ଯାଏ ବିକ୍ରି ପାଇଁ ଉପଲବ୍ଧ ହେବ ବୋଲି ଏଲ୍ଆଇସି ପକ୍ଷରୁ ଏକ ବିବୃତିରେ କୁହାଯାଇଛି। ଏହି ସ୍କିମ୍କୁ ଏଲ୍ଆଇସି ଇଣ୍ଡିଆର ଅନ୍ଲାଇନ ବା ଅଫ୍ଲାଇନ ମାଧ୍ୟମ ଦ୍ୱାରା କ୍ରୟ କରାଯାଇ ପାରିବ। କେନ୍ଦ୍ର କ୍ୟାବିନେଟ ପକ୍ଷରୁ ଚଳିତ ମାସ ପ୍ରଥମାର୍ଦ୍ଧରେ ଉକ୍ତ ଯୋଜନାର ବିସ୍ତାର କରାଯାଇଛି। ଆଗାମୀ ୩ ବର୍ଷ ପର୍ଯ୍ୟନ୍ତ ଏହାକୁ ଆଗକୁ ବଢାଇବା ଲାଗି ଘୋଷଣା କରାଯାଇଛି। ଏହା ବରିଷ୍ଠ ନାଗରିକଙ୍କ ଲାଗି ଏକ ସାମାଜିକ ସୁରକ୍ଷା ଯୋଜନା। ସରକାରଙ୍କ ଯୋଜନାକୁ ପରିଚାଳନା କରିବା ଲାଗି ଏଲ୍ଆଇସିକୁ ଦାୟିତ୍ୱଭାର ପ୍ରଦାନ କରାଯାଇଛି। ଏହା ଏକ ନନ୍ ଲିଙ୍କ୍ଡ ଏବଂ ନନ୍ ପାର୍ଟିସିଂପେଟିଂ ପେନ୍ସନ ସ୍କିମ୍। ଯୋଜନା ଅଧୀନରେ କେନ୍ଦ୍ର ସରକାର ସବ୍ସିଡି ପ୍ରଦାନ କରିଥାନ୍ତି। ଏଥିରେ ପଲିସି ଅବଧି ୧୦ ବର୍ଷ ରହିବ। ବାର୍ଷିକ ୭.୪୦ ହାରରେ ଲୋକଙ୍କୁ ସୁନିଶ୍ଚିତ ରିଟର୍ନ ମିଳିବ।