ଜୁନାଗଡ,୧୬।୪(ଡି.ଏନ୍.ଏ.)-କଳାହାଣ୍ଡି ଜିଲା ଜୁନାଗଡ ବ୍ଲକ ତଳମଲା ପଞ୍ଚାୟତ ମସିଗଁା ଗ୍ରାମରେ ଥିବା ବାଗଡିସର ନାଳର ପାଣିକୁ କେତେକ ମୁଷ୍ଟିମେୟ ଲୋକ ଏଲ୍ଆଇ ପଏଣ୍ଟ ସାହାଯ୍ୟରେ ପାଣି ଉଠାଇ ଧାନ ଚାଷ ପାଇଁ ବିକ୍ରି କରୁଥିବା ଅଭିଯୋଗ ହୋଇଛି। ଏ ନେଇ ଗ୍ରାମବାସୀ ଗୁରୁବାର ଜୁନାଗଡ ବିଡିଓ ଓ ଭାରପ୍ରାପ୍ତ ଥାନାଧିକାରୀଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ମସିଗଁା ଗ୍ରାମରେ ପ୍ରବାହିତ ହେଉଥିବା ବାଗଡିସରର(ନାଳ) ପାଣିକୁ ବର୍ଷତମାମ ସ୍ଥାନୀୟ ଗ୍ରାମବାସୀଙ୍କ ସମେତ ଅଞ୍ଚଳର ଆଖପାଖ ଗ୍ରାମର ଲୋକେ ପାନୀୟ ଓ ଶୌଚ ପାଇଁ ବ୍ୟବହାର କରିଥାନ୍ତି। ବର୍ତ୍ତମାନ ଖରାଟିଆ ଧାନ ଚାଷ କରି ବାଗଡିସର ପାଣିକୁ କେତେକ ଲୋକ ଶୁଖାଇ ଦେଇଛନ୍ତି। ଏଥିପାଇଁ ଏକର ପିଛା ୧୨ଶହଟଙ୍କା ଆଦାୟ କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଘଟଣାର ତଦନ୍ତ କରି ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଗ୍ରାମବାସୀ ଦାବି କରିଛନ୍ତି।