ବେଙ୍ଗାଲୁରୁ,୪।୮(ପି.ଟି.)- ଟୋକିଓ ୨୦୨୦ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବାରେ ଆମେ ସକ୍ଷମ ହେବୁ ବୋଲି ଭାରତୀୟ ମହିଳା ହକି ଦଳ ଫରଓ୍ବାର୍ଡ ଲାଲରେମସିଆମି ବିଶ୍ୱାସର ସହିତ କହିଛନ୍ତି। ଗତବର୍ଷ ଏସିଆନ୍ ଗେମ୍ସରେ ଭାରତ ଫାଇନାଲରେ ଜାପାନଠାରୁ ୧-୨ ଗୋଲରେ ପରାସ୍ତ ହୋଇ ଦ୍ୱିତୀୟ ସ୍ଥାନରେ ରହିଥିଲା। ଏହି ପରାଜୟ କାରଣରୁ ଭାରତ ଅଳ୍ପକେ ଅଲିମ୍ପିକ୍ସ ଯୋଗ୍ୟତା ହାସଲରୁ ବଞ୍ଚିତ ହୋଇଥିଲା। ଏହି ନିର୍ଣ୍ଣାୟକ ମ୍ୟାଚ୍ରେ ବିଜୟୀ ହୋଇଥିଲେ ଆମେ ଅଲିମ୍ପିକ୍ସ ଖେଳିବାକୁ ଯୋଗ୍ୟତା ହାସଲ କରିଥାନ୍ତୁ। କଠିନ ପରିଶ୍ରମ କରିଥିଲେ ମଧ୍ୟ କୋତୋଟି ତ୍ରୁଟି ଆମ ପାଇଁ ମହଙ୍ଗା ପଡିଥିଲା। ତେବେ ଆଗକୁ ଆମେ ଏହି ତ୍ରୁଟି ଦୋହରାଇବୁ ନାହିଁ ବୋଲି ସେ କହିଛନ୍ତି। ରାନୀ ରାମପାଲଙ୍କ ନେତୃତ୍ୱରେ ଭାରତ ଗତ ଜୁନ୍ରେ ଅନୁଷ୍ଠିତ ଏଫ୍ଆଇଏଚ୍ ମହିଳା ସିରିଜ୍ ଫାଇନାଲ୍ସରେ ଜାପାନକୁ ଫାଇନାଲରେ ୩-୧ ଗୋଲରେ ହରାଇ ଏହି ପରାଜୟର ପ୍ରତିଶୋଧ ନେଇଥିଲା। ଏହା ପରେ ଆମେ ପୂର୍ବ ତ୍ରୁଟି ନ ଦୋହରାଇବାକୁ ନିଷ୍ପତ୍ତି ନେଇଥିଲୁ। ଜାପାନକୁ ହରାଇବାରେ ଆମେ ସଫଳ ହୋଇଥିଲୁ। କିନ୍ତୁ ଏସିଆନ ଗେମ୍ସରେ ଆମର ତ୍ରୁଟି ଯୋଗୁ ଜାପାନ ଆମଠାରୁ ମ୍ୟାଚ୍ ଛଡାଇ ନେଇଥିଲା।
ବିଶ୍ୱ ର଼୍ୟାଙ୍କିଙ୍ଗ୍ରେ ଭାରତ ଦଶମ ସ୍ଥାନରେ ରହିଛି। ଆସନ୍ତା ୧୭ ତାରିଖରୁ ଟୋକିଓରେ ଆରମ୍ଭ ହେବାକୁ ଥିବା ଅଲିମ୍ପିକ ଟେଷ୍ଟ ଇଭେଣ୍ଟରେ ଭାରତ ଅଂଶଗ୍ରହଣ କରିବ। ତେବେ ଅଷ୍ଟ୍ରେଲିଆ, ୧୧ ନମ୍ବର ଦଳ ଚାଇନା ଓ ଆୟୋଜକ ତଥା ୧୪ ନମ୍ବର ଦଳ ଜାପାନ ଏହି ଟୁର୍ନାମେଣ୍ଟରେ ଭାରତକୁ କଡ଼ା ଚ୍ୟାଲେଞ୍ଜ୍ ଦେବେ। ଏହି ଇଭେଣ୍ଟ ପୂର୍ବରୁ ଭାରତୀୟ ଦଳର ଆତ୍ମ ବିଶ୍ୱାସ ବେଶ୍ ଉଚ୍ଚରେ ରହିଛି। ଅଭ୍ୟାସ ଶିବିରରେ ଆମେ କଠିନ ପରିଶ୍ରମ କରିଛୁ। ଆମ ଦଳ ବେଶ୍ ସନ୍ତୁଳିତ ଓ ପୁଣି ଥରେ ଆମେ ଅଲିମ୍ପିକ ଯୋଗ୍ୟତା ହାସଲ କରିବୁ। ହକି ଇଣ୍ଡିଆ ଦ୍ୱାରା ଆୟୋଜିତ ବିଭିନ୍ନ ଅଭ୍ୟାସ ଶିବିରରେ ଅଂଶଗ୍ରହଣ କରି ଖେଳାଳିମାନେ ସେମାନଙ୍କ ଦକ୍ଷତା ବଢାଇବାରେ ସକ୍ଷମ ହୋଇଛନ୍ତି। ଦିନକୁ ଦିନ ଉନ୍ନତି କରୁଛୁ ବୋଲି ମିଜୋରାମର ଏହି ୧୯ ବର୍ଷୀୟା ଫରଓ୍ବାର୍ଡ କହିଛନ୍ତି। ଅଷ୍ଟ୍ରେଲିଆ ଏବେ ବିଶ୍ୱ ହକିରେ ଶ୍ରେଷ୍ଠ ଦଳ ବିବେଚିତ ହେଉଛି। ଆମ ଦଳ ମଧ୍ୟ ଅନୁରୂପ ଭାବେ ଏକ ଶ୍ରେଷ୍ଠ ଦଳ। ତେଣୁ ଅଲିମ୍ପିକ ଟେଷ୍ଟ ଇଭେଣ୍ଟରେ ଆମେ ଭଲ ପ୍ରଦର୍ଶନ କରିବୁ ଓ ଅଲିମ୍ପିକ କ୍ୱାଲିଫାୟର ପାଇଁ ପ୍ରସ୍ତୁତି ଜୋରଦାର କରିବୁ ବୋଲି ଲାଲରେମସିଆମି କହିଛନ୍ତି।