କଟକ ଅଫିସ, ୬ା୮: ଶ୍ରୀରାମ ଚନ୍ଦ୍ର ଭଞ୍ଜ (ଏସ୍ସିବି) ମେଡିକାଲ କଲେଜ ଆଣ୍ଡ ହସ୍ପିଟାଲରେ ପ୍ରଥମ ପୋଷ୍ଟ ବ୍ଲାକ ଫଙ୍ଗ୍ସ ପ୍ଲାଷ୍ଟିକ ସର୍ଜରି ସଫଳ ହୋଇଛି। ମାରାତ୍ମକ ବ୍ଲାକ୍ ଫଙ୍ଗ୍ସ ସଂକ୍ରମଣରେ ମାଢ଼ି ଓ ଦାନ୍ତ ହରାଇ ଏକପ୍ରକାର ଭିନ୍ନକ୍ଷମ ହୋଇପଡ଼ିଥିବା ବ୍ରହ୍ମପୁରର ଏମ୍. ମେନେକା କୁମାରୀଙ୍କ ସଫଳ ମାଢ଼ି ପ୍ରତିରୋପଣ କରାଯାଇଛି। ଏହି ଅସ୍ତ୍ରୋପଚାର ଏସ୍ସିବି ମେଡିକାଲ ପ୍ଲାଷ୍ଟିକ ସର୍ଜରି ବିଭାଗ ପକ୍ଷରୁ କରାଯାଇଛି। ୩ମାସ ପରେ ମେନେକାଙ୍କ ଦ୍ୱିତୀୟ ପର୍ଯ୍ୟାୟ ସର୍ଜରି କରାଯାଇ ଦାନ୍ତ ଲଗାଯିବ ବୋଲି ଶୁକ୍ରବାର ବିଭାଗୀୟ ମୁଖ୍ୟ ଡାକ୍ତର ବିଭୂତି ଭୂଷଣ ନାୟକ ସୂଚନା ଦେଇଛନ୍ତି। ଅପରପକ୍ଷେ ନୂତନ ଜୀବନ ପାଇ ମେନେକା ଖୁସି ବ୍ୟକ୍ତ କରିଛନ୍ତି।
ସୂଚନା ଅନୁଯାୟୀ, ୨୦୨୧ରେ କୋଭିଡ୍ର ଦ୍ୱିତୀୟ ଲହରରେ ମେନେକା କରୋନାରେ ଆକ୍ରାନ୍ତ ହୋଇଥିଲେ। ତେବେ କରୋନାରୁ ସୁସ୍ଥ ହେବାପରେ ତାଙ୍କ ଉପର ମାଢ଼ି ମ୍ୟୁକର ମାଇକୋସିସ୍ (ବ୍ଲାକ ଫଙ୍ଗ୍ସ)ରେ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା। କଥା କହିବା ଓ ଖାଇବାରେ ତାଙ୍କୁ ଅସୁବିଧା ହେବା ସହ ଯନ୍ତ୍ରଣା ଭୋଗୁଥିଲେ। ଏହାପରେ ବ୍ରହ୍ମପୁରସ୍ଥିତ ଏମ୍କେସିଜି ମେଡିକାଲରେ ତାଙ୍କର ଅସ୍ତ୍ରୋପଚାର କରାଯାଇ ଉପର ମାଢ଼ିକୁ କଢ଼ାଯାଇଥିଲା। ହେଲେ ଏହାପରେ ତାଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା। ତରଳ ଖାଦ୍ୟ ପାଟି ବାଟେ ଯାଇ ନାକ ବାଟେ ବାହାରି ଆସୁଥିଲା। ଏହାପରେ ଗତ ଜୁଲାଇ ୫ରେ ତାଙ୍କୁ ଏସ୍ସିବିରେ ଭର୍ତ୍ତି କରାଯାଇଥିଲା। ଜୁଲାଇ ୧୮ରେ ଏସ୍ସିବିରେ ତାଙ୍କର ଉପର ମାଢ଼ି ପ୍ରତିରୋପଣ କରାଯାଇଛି। ବିଭାଗୀୟ ମୁଖ୍ୟ ଡାକ୍ତର ବିଭୂତି ଭୂଷଣ ନାୟକଙ୍କ ନେତୃତ୍ୱରେ ୪ଜଣିଆ ଡାକ୍ତରୀ ଟିମ୍ ୭ଘଣ୍ଟା ଧରି ଏହି ଜଟିଳ ଅପରେଶନ କରିଥିଲେ। ଏଭଳି ପ୍ରତିରୋପଣ ଏସ୍ସିବିରେ ପ୍ରଥମ ଥର ପାଇଁ କରାଯାଇଛି। ଏବେ ରୋଗୀଙ୍କ ସ୍ବାସ୍ଥ୍ୟାବସ୍ଥା ଭଲ ରହିଛି। ୩ମାସ ପରେ ତାଙ୍କର ଦାନ୍ତ ପ୍ରତିରୋପଣ କରାଯିବ ବୋଲି ଡାକ୍ତର କହିଛନ୍ତି। ବ୍ଲାକ ଫଙ୍ଗ୍ସ ଭୂତାଣୁ ଅତି ମାରାତ୍ମକ। ଶରୀରର ଯେଉଁ ଭାଗରେ ଏହି ସଂକ୍ରମଣ ହେଲା, ସେହି ଭାଗଟି ସମ୍ପୂର୍ଣ୍ଣ ନଷ୍ଟ ହୋଇଯାଇଥାଏ। ଓଡ଼ିଶାରେ ପ୍ରାୟ ୧୫ରୁ ଊର୍ଦ୍ଧ୍ୱ ଏଭଳି ରୋଗୀ ଚିହ୍ନଟ ହୋଇଥିବା ବେଳେ ଏକାଧିକଙ୍କ ମୃତ୍ୟୁ ଘଟିଛି।