କଟକ ଅଫିସ,୧୭।୯: ଏସ୍ସିବିରେ ଟେଲି ମାନସ ସେଲ ପ୍ରତିଷ୍ଠା କରାଯିବ। ଜଣେ ଡାକ୍ତର, ନର୍ସ, ମାନସିକ ସ୍ବାସ୍ଥ୍ୟ କ୍ଷେତ୍ରରେ କାର୍ଯ୍ୟ କରୁଥିବା ସାମାଜିକ କର୍ମୀଙ୍କୁ ମିଶାଇ ୨୦ଜଣ କର୍ମଚାରୀ ଏହି ସେଲ୍ରେ କାର୍ଯ୍ୟ କରିବେ । ୩ ସିଫ୍ଟରେ କାମ ହେବ । ଜାତୀୟ ସ୍ବାସ୍ଥ୍ୟ ମିଶନ (ଏନ୍ଏଚ୍ଏମ୍) ଅର୍ଥରୁ ୩ବର୍ଷ ପାଇଁ ଏହାର ଭରଣା କରାଯିବ । ଏହାପରେ ରାଜ୍ୟ ସରକାରଙ୍କ ଅଧୀନକୁ ଏହି କାର୍ଯ୍ୟକ୍ରମକୁ ହସ୍ତାନ୍ତର କରାଯିବ । ରାଜ୍ୟ ସରକାରଙ୍କ ପକ୍ଷରୁ ଏ ନେଇ ଏକ ଚିଠି ଏସ୍ସିବି ମାନସିକ ସ୍ବାସ୍ଥ୍ୟ ପ୍ରତିଷ୍ଠାନର ନିର୍ଦ୍ଦେଶକଙ୍କ ନିକଟକୁ ଆସିଛି।
ରାଜ୍ୟର ଦୁଇଟି ସ୍ଥାନ, ଏସ୍ସିବି ଓ ବ୍ରହ୍ମପୁର ମେଡିକାଲ କଲେଜର ମାନସିକ ରୋଗ ଚିକିତ୍ସା ପ୍ରତିଷ୍ଠାନ ପରିସରରେ ଟେଲି ମାନସ ସେଲ ପ୍ରତିଷ୍ଠା କରାଯିବ । ଏସ୍ସିବିକୁ ନୋଡାଲ ସେଣ୍ଟର ଭାବେ ଚୟନ କରାଯାଇଛି । ଆସନ୍ତା ଅକ୍ଟୋବର ୧୦ ତାରିଖରେ ବିଶ୍ୱ ମାନସିକ ସ୍ବାସ୍ଥ୍ୟ ଦିବସ ଅବସରରେ ଏହି କାର୍ଯ୍ୟକ୍ରମର ଶୁଭାରମ୍ଭ କରାଯିବ । ସେପ୍ଟେମ୍ବର ୨୦ ସୁଦ୍ଧା ଏହି ସେଲ ଦାୟିତ୍ୱରେ ରହିବାକୁ ଥିବା କର୍ମଚାରୀମାନେ ତାଲିମ ନେବେ । ଏହି ସେଲ୍ରେ ଟେକ୍ନିକାଲ କୋ-ଅର୍ଡିନେଟର, ଡାଟା ଏଣ୍ଟ୍ରି ଅପରେଟର, କମ୍ୟୁନିଟି ନର୍ସ ଆଦି ନିଯୁକ୍ତ ହେବେ। କେନ୍ଦ୍ର ସରକାରଙ୍କ ପକ୍ଷରୁ ଅଗଷ୍ଟ ୧୮ ତାରିଖରେ ଏହି କାର୍ଯ୍ୟକ୍ରମକୁ ନେଇ ଏକ ମାର୍ଗଦର୍ଶିକା ଜାରି କରାଯାଇଛି । ଏହି ସେଲ ଜରିଆରେ ମାନସିକ ରୋଗୀମାନଙ୍କୁ ଟେଲିଫୋନ୍ ମାଧ୍ୟମରେ କାଉନ୍ସିଲିଂ କରାଯିବ । ଯଦି ଜଣଙ୍କ ଭିତରେ ଆତ୍ମହତ୍ୟା ପ୍ରବଣତା ବୃଦ୍ଧି ପାଉଛି, ସମ୍ପୃକ୍ତ ବ୍ୟକ୍ତି କିମ୍ବା ତାଙ୍କ ପରିବାର ଲୋକେ ଏହି ସେଲ ସହ ଯୋଗାଯୋଗ କଲେ କର୍ମଚାରୀମାନେ ସମ୍ପୃକ୍ତ ବ୍ୟକ୍ତିଙ୍କୁ ଫୋନ ଯୋଗେ କାଉନ୍ସିଲିଂ କରିବେ ।