ଭୁବନେଶ୍ୱର,୩।୫(କ୍ରୀଡ଼ା ପ୍ରତିନିଧି)-ଶହୀଦ ନଗରସ୍ଥିତ ଏସ୍ଆର ଚେସ୍ ସେଣ୍ଟରର ୧୪ତମ ପ୍ରତିଷ୍ଠା ଦିବସ ଅବସରରେ ପ୍ରଥମଥରପାଇଁ ଏକ ଅନ୍ଲାଇନ୍ ଚେସ୍ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏଥିରେ ରାଜ୍ୟଗୋଷ୍ଠୀ ଚେସ୍ ବ୍ରୋଞ୍ଜ ପଦକ ବିଜେତା ମନୀଷ କୁମାର (୫ପଏଣ୍ଟ)ଚାମ୍ପିୟନ ଏବଂ ତେଜାସ ଲୋହାନୀ ରନର୍ସଅପ୍ ଏବଂ ଆନ୍ଧ୍ରପ୍ରଦେଶର ଶିବାଂଶ ମିଶ୍ର(ଉଭୟେ ୪ ପଏଣ୍ଟ ଲେଖାଏ) ୩ୟ ସ୍ଥାନ ଅଧିକାର କରିଛନ୍ତି। ସୁଇସ୍ ପ୍ରଣାଳୀ(ପ୍ରତ୍ୟେକଙ୍କୁ ୧୦ ମିନିଟ ସମୟ)ରେ ଅନୁଷ୍ଠିତ ୫ ରାଉଣ୍ଡ ବିଶିଷ୍ଟ ପ୍ରତିଯୋଗିତା(ଚେସ୍ ଡଟ୍ କମ୍ରେ ଅଟୋମେଟିକ୍ ପେୟାରିଂ)ରେ ମୋଟ ୪୩ ପ୍ରତିଯୋଗୀ ଭାଗ ନେଇଥିଲେ। ଏଥିରେ ରାଜ୍ୟ ଓ ଦେଶ ସମେତ ଆଫ୍ରିକା ଓ ସ୍କଟଲାଣ୍ଡର ପ୍ରତିଯୋଗୀ ମଧ୍ୟ ଅଂଶଗ୍ରହଣ କରିଥିଲେ। ଡ. ମାନସ ରଞ୍ଜନ ମିଶ୍ର(କିମ୍ସ) ଓ ସତ୍ୟଜିତ ପଟ୍ଟନାୟକ ଟୁର୍ନାମେଣ୍ଟ ପରିଚାଳନା କରିଥିଲେ। ପ୍ରକାଶ ଯୋଗ୍ୟ ଯେ, ୨୦୦୬ ଏପ୍ରିଲ ୩୦ ପବିତ୍ର ଅକ୍ଷୟ ତୃତୀୟାରେ ଏସ୍ଆର୍ ଚେସ୍ ସେଣ୍ଟରର ସଭାପତି ଶୁଭାଶିଷ ପଟ୍ଟନାୟକ ଓ ସମ୍ପାଦକ ସତ୍ୟରଞ୍ଜନ ପଟ୍ଟନାୟକଙ୍କ ଉପସ୍ଥିତିରେ ତତ୍କାଳୀନ କ୍ରୀଡ଼ାମନ୍ତ୍ରୀ ଦେବାଶିଷ ନାୟକ ଶହୀଦ ନଗର ଶାଖାକୁ ଉଦ୍ଘାଟନ କରିଥିଲେ।