ଜୟପୁର,୨୨ା୮(ଡି.ଏନ୍.ଏ./ନି.ପ୍ର.): ଜୟପୁର ବ୍ଲକ କଙ୍ଗା ଓ ଜାମୁଣ୍ଡା ପଞ୍ଚାୟତର ଚାଷୀଙ୍କ ଖରିଫ ଧାନ ଅମଳ ପରେ ମଣ୍ଡିରେ ଏହାକୁ ସ୍ବୟଂ ସହାୟକ ଗୋଷ୍ଠୀ କିଣିବେ। ଜିଲା ପ୍ରଶାସନ ନେଇଥିବା ଏଭଳି ନିଷ୍ପତ୍ତିକୁ ଏବେ ବିରୋଧ ଆରମ୍ଭ ହୋଇଛି। ଉଭୟ ପଞ୍ଚାୟତର କେତେକ ଚାଷୀ ଜିଲା ଯୋଗାଣ ଅଧିକାରୀ ତୁଳାରାମ ନାୟକଙ୍କୁ ଭେଟି ଆଲୋଚନା କରିଛନ୍ତି।
ରାଜ୍ୟ ସରକାର ମହିଳା ସଶକ୍ତୀକରଣ ତଥା ମିଶନ ଶକ୍ତି ଦ୍ୱାରା ପ୍ରଶିକ୍ଷିତ ସ୍ବୟଂ ସହାୟକ ଗୋଷ୍ଠୀ ଦ୍ୱାରା ଖରିଫ ଋତୁ ପାଇଁ ଧାନ କିଣିବାର ବ୍ୟବସ୍ଥା କରିଛନ୍ତି। ଜୟପୁର ଉପଖଣ୍ଡରେ ୧୩ଟି ସ୍ବୟଂ ସହାୟକ ଗୋଷ୍ଠୀ ଧାନ କିଣିବେ। ଏଥିରୁ ବୈପାରୀଗୁଡ଼ା ବ୍ଲକରେ ନିଯୁକ୍ତ ଏସ୍ଏଚ୍ଜିର ନାମ କୌଣସି କାରଣରୁ କଟିଯାଇଥିବା ବେଳେ ବର୍ତ୍ତମାନ ୧୨ଟି ଏସ୍ଏଚ୍ଜି ରହିଛନ୍ତି। ଜୟପୁର, କୁନ୍ଦୁରା, ବୋରିଗୁମ୍ମା ଓ କୋଟପାଡ଼ ବ୍ଲକରେ ଏମାନେ ଧାନ କିଣିବେ। କିନ୍ତୁ ଚାଷୀମାନେ ଅଭିଯୋଗ କରିଛନ୍ତି ଯେ କଙ୍ଗା ପଞ୍ଚାୟତରେ କାର୍ଯ୍ୟକ୍ଷମ ସ୍ବୟଂ ସହାୟକ ଗୋଷ୍ଠୀ ନାହିଁ ଓ ଯେଉଁ ସ୍ବୟଂ ସହାୟକ ଗୋଷ୍ଠୀକୁ ଏହି ଦାୟିତ୍ୱ ଦିଆଯାଇଛି, ତାହାର ସଦସ୍ୟମାନେ ହିସାବ ଜାଣନ୍ତି ନାହିଁ। ତେଣୁ ପୂର୍ବପରି ଲ୍ୟାମ୍ପସ ଦ୍ୱାରା ଧାନକିଣା ପାଇଁ ମୋହନ ଗଣ୍ଡା, ରାମନାଥ ଗୌଡ଼, ଲକ୍ଷ୍ମୀନାଥ ରଣା, ଦୀନବନ୍ଧୁ ଗୌଡ଼, ଡମ୍ବରୁ ହରିଜନ, ଲଷ୍ମଣ ଭତ୍ରା, ଏ. ଦିବାକର, ବଳରାମ ରନ୍ଧାରୀ, ସରୋଜ ପଣ୍ଡା, ଲକ୍ଷ୍ମୀ ଅମନାତ୍ୟ ଦାବି ଜଣାଇଛନ୍ତି। ଚାଷୀଙ୍କ ନାମ ପଞ୍ଜିକରଣ ଏସ୍ଏଚ୍ଜି ଓ ଲ୍ୟାମ୍ପସ କରିବ। ୩୧ ତାରିଖ ପଞ୍ଜିକରଣର ଅନ୍ତିମ ଦିବସ ଥିବାବେଳେ ଏବେ ପଞ୍ଜିକରଣ କରାଯାଉ ନଥିବା ଅଭିଯୋଗ ହୋଇଥିଲା। ଶତାଧିକ ଚାଷୀଙ୍କ ଦସ୍ତଖତ ଥାଇ ଦାବିପତ୍ର ଜୟପୁର ଉପଜିଲାପାଳ, ଜିଲା ଯୋଗାଣ ଅଧିକାରୀ, ଜୟପୁର ବିଧାୟକ, ଜୟପୁର ସମନ୍ବିତ ଶିଶୁ ବିକାଶ ଅଧିକାରୀଙ୍କୁ ଦିଆଯାଇଛି। ମିଶନ ଶକ୍ତିର ଏକ ଦଳ କଙ୍ଗା ଓ ଜାମୁଣ୍ଡା ଗସ୍ତ କରି ଚାଷୀଙ୍କ ସହ ଆଲୋଚନା କରିବେ ବୋଲି ସିଏସ୍ଓ କହିଛନ୍ତି।