ଦେବଗଡ,୧୦ା୪(ଡି.ଏନ.ଏ): ଦେବଗଡ଼ ଜିଲା ବାରକୋଟ ବ୍ଲକ ଅଧୀନ କଣ୍ଢଳ ଓ ବଳମ ପଞ୍ଚାୟତର ମା’ ମହାଲକ୍ଷ୍ମୀ, ମା’ ଶୁଭଲକ୍ଷ୍ମୀ, ମା’ ତାରିଣୀ ସ୍ବୟଂ ସହାୟିକା ଗୋଷ୍ଠି ଓ ମହିଳା କିକାଶ ସମିତି ପକ୍ଷରୁ ଶୁକ୍ରବାର କଣ୍ଢଳ ପଞ୍ଚାୟତ ଅଧୀନ ବାଘମୁଣ୍ଡା ଓ ବଳମ ପଞ୍ଚାୟତର ଗୌଡନାଳୀ ଗ୍ରାମରେ ମାସ୍କ ବିତରଣ କରାଯାଇଛି। ଏହି ଅଞ୍ଚଳର ଗରିବ ଓ ଅସହାୟମାନେ ପର୍ଯ୍ୟାପ୍ତ ପରିମାଣର ମାସ୍କ ମିଳୁ ନ ଥିବାରୁ ମାସ୍କ ବ୍ୟବହାରରୁ ବଞ୍ଚିତ ରହୁଥିଲେ। ଏହି ଅଭାବ ପୂରଣ ପାଇଁ ବାଘମୁଣ୍ଡାସ୍ଥିତ ସ୍ବେଚ୍ଛାସେବୀ ଅନୁଷ୍ଠାନ ‘ସହଯୋଗ’ ପକ୍ଷରୁ ଆବଶ୍ୟକ ପରିମାଣର ମାସ୍କ ପ୍ରସ୍ତୁତ କରିବା ପାଇଁ ସମ୍ପୃକ୍ତ ଅଞ୍ଚଳର ସ୍ବୟଂ ସହାୟିକା ଗୋଷ୍ଠୀ ଓ ମହିଳା କିକାଶ ସମିତିକୁ ଆର୍ଥିକ ସହାୟତା ପ୍ରଦାନ କରାଯାଇଥିଲା। ଏହି ଅର୍ଥରେ ଉପରୋକ୍ତ ସ୍ବୟଂ ସହାୟିକା ଗୋଷ୍ଠୀର ସଦସ୍ୟାମାନେ ଦିନକୁ ପ୍ରାୟ ୧୫୦ରୁ ୨୦୦ଟି ଲେଖାଏଁ ମାସ୍କ ସିଲେଇ କରି ବ୍ୟବହାର ଉପେଯାଗୀ କରିଥିଲେ। ଏହି ମାସ୍କ ଗୁଡିକ ଉକ୍ତ ସ୍ବୟଂ ସହାୟିକା ଗୋଷ୍ଠୀର ସଦସ୍ୟାମାନେ କଣ୍ଢଳ ପଞ୍ଚାୟତ ଅଧୀନ ବାଘମୁଣ୍ଡା ଓ ବଳମ ପଞ୍ଚାୟତର ଗୌଡନାଳୀ ଗ୍ରାମର ଗରିବ ଓ ଅସହାୟ ଲୋକଙ୍କୁ ମାଗଣାରେ ବିତରଣ କରିଛନ୍ତି। ଅବଶିଷ୍ଟ ମାସ୍କଗୁଡିକୁ ଲୋକଙ୍କୁ ମାତ୍ର ୧୦ ଟଙ୍କା ଦରରେ ଯୋଗାଇ ଦିଆଯାଉଛି ବୋଲି ସରସ୍ବତୀ କିଷାନ ପ୍ରକାଶ କରିଛନ୍ତି।