କଟକ ଅଫିସ,୧୬।୧୨: ଦକ୍ଷିଣ ଓଡ଼ିଶାରେ କାର୍ଯ୍ୟରତ ଜଣେ ଭାରପ୍ରାପ୍ତ ଏସ୍ପିଙ୍କ ନାଁରେ ତାଙ୍କ ବୋହୂ ଯୌନ ନିର୍ଯାତନା ଅଭିଯୋଗ ଆଣିଛନ୍ତି। ଏନେଇ କଟକ ଚାଉଳିଆଗଞ୍ଜ ଥାନାରେ ଅଭିଯୋଗ ହେବା ପରେ ଆଇପିସି ଦଫା ୩୪୨, ୩୨୩, ୩୫୪(ଏ), ୩୫୪(ଡି), ୫୦୬, ୫୦୯, ୪୯୮(ଏ) ଓ ୩୪ ଅନୁଯାୟୀ ଏକ ମାମଲା(ନଂ. ୩୭୧/୧୯) ରୁଜୁ ହୋଇ ତଦନ୍ତ କରାଯାଉଛି ବୋଲି ଥାନା ଅଧିକାରୀ ତାପସ ଚନ୍ଦ୍ର ପ୍ରଧାନ କହିଛନ୍ତି।
ଅଭିଯୋଗ ଅନୁଯାୟୀ, କିଛିମାସ ତଳେ ଉକ୍ତ ଏସ୍ପି ଓ ତାଙ୍କ ସ୍ତ୍ରୀ ଚାଉଳିଆଗଞ୍ଜସ୍ଥିତ ସମ୍ପର୍କୀୟଙ୍କ ଘରେ ରହୁଥିଲେ। ତାଙ୍କ ପୁଅ, ବୋହୂ ସିଡିଏ ଅଞ୍ଚଳରେ ରୁହନ୍ତି। ଅକ୍ଟୋବର ୧୬ରେ ବିବାହ ବାର୍ଷିକୀ ଅବସରରେ ପୁଅ, ବୋହୂ ଦୁହେଁ ବୁଲିବା ପାଇଁ ଚାଉଳିଆଗଞ୍ଜସ୍ଥିତ ତାଙ୍କ ସମ୍ପର୍କୀୟଙ୍କ ଘରକୁ ଯାଇଥିଲେ। ପୂର୍ବରୁ ସେଠାରେ ଶାଶୁଶ୍ୱଶୁର ରହୁଥିଲେ। କୌଣସି କାର୍ଯ୍ୟରେ ଏସ୍ପିଙ୍କ ପୁଅ କିଛିଦିନ ଲାଗି ବାହାରକୁ ଯାଇଥିଲେ। ତେବେ ବୋହୂ ଚାଉଳିଆଗଞ୍ଜରେ ତାଙ୍କ ଶାଶୁଶ୍ୱଶୁରଙ୍କ ନିକଟରେ ରହିଥିଲେ। ଏହି ସମୟରେ ଶାଶୁଶ୍ୱଶୁର ମିଶି ତାଙ୍କୁ ଶାରୀରିକ ନିର୍ଯାତନା ଦେଇଥିଲେ। ଏପରି କି ଶ୍ୱଶୁର(ଏସ୍ପି) ଯୌନ ନିର୍ଯାତନା ଦେଇଥିବା ନେଇ ସେ ଅଭିଯୋଗ ପତ୍ରରେ ଦର୍ଶାଇଛନ୍ତି। ବୋହୂଙ୍କ ଏପରି ଅଭିଯୋଗକୁ ଏସ୍ପି ଜଣକ ଖଣ୍ଡନ କରିବା ସହ ଏହା ସମ୍ପୂର୍ଣ୍ଣ ଭିତ୍ତିହୀନ ବୋଲି କହିଛନ୍ତି। ପୁଅବୋହୂ ଦିନଟିଏ ବି ଆମ ପାଖରେ ରହିନାହାନ୍ତି। ସେ ଯେଉଁ ଅଭିଯୋଗ ଆଣିଛନ୍ତି ତାହା ସମ୍ପୂର୍ଣ୍ଣ ମିଥ୍ୟା। ସେମାନେ ମୋତେ ଟଙ୍କା ମାଗିଥିଲେ, ମୁଁ ମନା କରିବାରୁ ମୋ ବିରୋଧରେ ଏପରି ମିଥ୍ୟା ଅଭିଯୋଗ ଆଣିଛନ୍ତି ବୋଲି ଏସ୍ପି ଜଣକ କହିଛନ୍ତି।
