ଭୁବନେଶ୍ୱର,୧୩।୫(ବ୍ୟୁରୋ)- ମଦର୍ସ ଡେ’ ତଥା ମାତୃ ଦିବସ ଉପଲକ୍ଷେ ଏସ୍ପ୍ଲାନେଡ୍ ଓ୍ବାନ୍ ମଲ୍ ଏବଂ ଦୈନିକ ଇଂଲିଶ ଖବରକାଗଜ ‘ଓଡ଼ିଶା ପୋଷ୍ଟ୍’ର ମିଳିତ ସହଯୋଗରେ ରବିବାର ରସୁଲଗଡ଼ସ୍ଥିତ ମଲ୍ ପରିସରରେ ଏକ ସ୍ବତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ମା’ମାନଙ୍କୁ ସ୍ବତନ୍ତ୍ର ଅନୁଭୂତି ଦେବା ଲାଗି ଆୟୋଜିତ ଏହି କାର୍ଯ୍ୟକ୍ରମରେ ବିଭିନ୍ନ ପ୍ରକାର ମନୋରଞ୍ଜନଧର୍ମୀ ପ୍ରତିଯୋଗିତା କରାଯାଇଥିଲା। ଏହାସହ ଉଭୟ ମା’ ଓ ପିଲାମାନଙ୍କ ପାଇଁ ଆକର୍ଷଣୀୟ ଉପହାର ଏବଂ ଗିଫ୍ଟ ଭାଉଚର୍ର ବ୍ୟବସ୍ଥା କରାଯାଇଥିଲା। ସେହିପରି ସେଲ୍ଫି କଣ୍ଟେଷ୍ଟ୍, ନୃତ୍ୟ ଓ ଗୀତ ପ୍ରତିଯୋଗିତା କାର୍ଯ୍ୟକ୍ରମର ମୁଖ୍ୟ ଆକର୍ଷଣ ସାଜିଥିଲା। ମଲ୍ ମଧ୍ୟଭାଗରେ ତିଆରି ହୋଇଥିବା ଷ୍ଟେଜ୍ରେ ସ୍ବତନ୍ତ୍ର ସେଲ୍ଫି କର୍ନର ପ୍ରସ୍ତୁତ ହୋଇଥିବା ବେଳେ ସେଠାରେ ମା’ ଓ ପିଲାମାନେ ଛିଡ଼ାହୋଇ ମଦର୍ସ ଡେ’ ସେଲ୍ଫି ଉଠାଇଥିଲେ। ଶ୍ରେଷ୍ଠ ବିବେଚିତ ସେଲ୍ଫିକୁ ପରେ ଅନ୍ଲାଇନ୍ କଣ୍ଟେଷ୍ଟ୍ କରାଯାଇ ପୁରସ୍କୃତ କରାଯିବ।
ଏସ୍ପ୍ଲାନେଡ୍ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ମା’ମାନଙ୍କ ପାଇଁ ଶପିଂ କରି ଗ୍ରାହକମାନେ ଆକର୍ଷଣୀୟ ଉପହାର ପାଇଥିଲେ। ୨୫୦୦ ଟଙ୍କାର ଶପିଂରେ ସ୍ବତନ୍ତ୍ର ଗିଫ୍ଟ ଭାଉଚର୍ ମିଳିଥିଲା। ସେହିଭଳି ‘ଟିକେଟ୍ ଟୁ ହାପିନେସ୍’ ପ୍ରତିଯୋଗିତାର ଭାଗ୍ୟଶାଳୀ ଗ୍ରାହକମାନଙ୍କୁ ଏକ ଲକି କୁପନ୍ ସହ ପ୍ରତି ସପ୍ତାହରେ ଦୁଇଟି ଏଲ୍ଇଡି ଟିଭି ଉପହାର ଦେବା ବ୍ୟବସ୍ଥା କରାଯାଇଥିଲା। ଏହାବ୍ୟତୀତ ୫ ହଜାର ଟଙ୍କାର ଶପିଂରେ ମାଗଣା ସାଲୁନ୍ ଟ୍ରିଟ୍ମେଣ୍ଟ ସହ ମୁଭି ଟିକେଟ୍ ଭଳି ଉପହାର ମିଳିଥିଲା। ଆରମ୍ଭରେ ‘ଡ୍ୟାନ୍ସ ଓ୍ବିଥ୍ ମଦର୍ସ’ କାର୍ଯ୍ୟକ୍ରମରେ ପିଲାମାନେ ସେମାନଙ୍କ ମା’ଙ୍କ ସହ ମଞ୍ଚରେ ଡ୍ୟାନ୍ସ କରିଥିଲେ। ସେହିପରି ମା’ମାନଙ୍କ ପାଇଁ ଗୀତ ମଧ୍ୟ ଗାଇଥିଲେ।
ମା’ଙ୍କୁ ସର୍ପ୍ରାଇଜ୍ ଦେଲେ ପିଲା
ମଦର୍ସ ଡେ’ ସେଲିବ୍ରେଶନ ଏବେ ଏକ ନୂଆ ଟ୍ରେଣ୍ଡ୍ ହୋଇଥିବା ବେଳେ ରବିବାର ଏଥିପାଇଁ ଭୁବନେଶ୍ୱରର ବିଭିନ୍ନ ମଲ୍ରେ ଭିଡ଼ ଦେଖିବାକୁ ମିଳିଥିଲା। ଏହି ଦିନରେ ମା’ମାନଙ୍କୁ ସ୍ବତନ୍ତ୍ର ଅନୁଭୂତି ଦେବାକୁ ପିଲାମାନେ ବିଭିନ୍ନ ପ୍ରକାର ସର୍ପ୍ରାଇଜ୍ ଗିଫ୍ଟ ଓ ସ୍ପେଶାଲ ଡେଟ୍ର ଆୟୋଜନ କରିଥିଲେ। ବିଶେଷକରି ଫିଲ୍ମ ଦେଖା, ସର୍ପ୍ରାଇଜ୍ ଲଞ୍ଚ୍ ଓ ଡିନର୍, ସାଲୁନ୍ ଟ୍ରିଟ୍ମେଣ୍ଟ ଦ୍ୱାରା ମା’ମାନଙ୍କୁ ଖୁସି କରିବାର ବାଟ ଖୋଜିଥିଲେ ପିଲା। ଏହାସହ ଅଧିକାଂଶ ମଲ୍ ଯାଇ ମା’ଙ୍କ ପାଇଁ ମନ ପସନ୍ଦର ଡ୍ରେସ୍ କିଣିଥିଲେ। କେବଳ ବଡ଼ ନୁହନ୍ତି, ଛୋଟ ଛୋଟ ପିଲାମାନେ ବି ନିଜ ସେଭିଙ୍ଗ୍ସ ଓ ପକେଟ୍ ମନିରେ ମା’ଙ୍କୁ ସର୍ପ୍ରାଇଜ୍ ଗିଫ୍ଟ ଦେଇଥିଲେ। ବାତ୍ୟା ପରେ ଭୁବନେଶ୍ୱରରେ ସମସ୍ତ ଦୋକାନ ବଜାର ଖୋଲି ନ ଥିବାରୁ ଯାହା ବି ଖୋଲା ରହିଥିଲା, ସେଠାରେ ପ୍ରବଳ ଭିଡ଼ ଲାଗିଥିଲା। ସେହିଭଳି ରେଷ୍ଟୁରାଣ୍ଟଗୁଡ଼ିକରେ ମଧ୍ୟ ଭିଡ଼ ଦେଖିବାକୁ ମିଳିଥିଲା।