ବିଶ୍କେକ୍,୧୫ା୬(ପି.ଟି.):ଆତଙ୍କବାଦ ପ୍ରାୟୋଜକ ଦେଶ ସତର୍କ ରହିବା ଉଚିତ। ଆତଙ୍କବାଦକୁ ଆର୍ଥିକ ସହଯୋଗ କରୁଥିବା, ପ୍ରୋତ୍ସାହନ ଦେଉଥିବା ଦେଶ ଏଥିଲାଗି ଦାୟୀ ରହିବେ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ବିଶ୍କେକ୍ରେ ଅନୁଷ୍ଠିତ ସାଙ୍ଘାଇ ସହଯୋଗ ସଙ୍ଗଠନ(ଏସ୍ସିଓ) ସମ୍ମିଳନୀରେ ଉଦ୍ବୋଧନ ଦେଇ ସେ ପାକିସ୍ତାନର ନାମ ନ ନେଇ ଏଭଳି ଚେତାବନୀ ଶୁଣାଇଛନ୍ତି। ଆତଙ୍କବାଦ ଦମନ ଲାଗି ବିଶ୍ୱ ସମୁଦାୟକୁ ନେଇ ଏକ ସମ୍ମିଳନୀ କରାଯିବାର ଆବଶ୍ୟକତା ରହିଛି ବୋଲି ସେ ପ୍ରକାଶ କରିଛନ୍ତି। ଏସ୍ସିଓ ସମ୍ମିଳନୀରେ ସବୁ ଦେଶ ଏକହୋଇ ଆତଙ୍କବାଦ ବିରୋଧୀ ଲଢ଼େଇରେ ସାମିଲ୍ ହେବାକୁ ସେ ପରାମର୍ଶ ଦେଇଛନ୍ତି। ସଦସ୍ୟ ରାଷ୍ଟ୍ରଙ୍କ ମଧ୍ୟରେ ବିକାଶ, ଶାନ୍ତି ଲାଗି ଆତଙ୍କବାଦ ଦମନ ଏକାନ୍ତ ଜରୁରୀ ବୋଲି ମୋଦି ଜୋର୍ଦେଇ କହିଛନ୍ତି।
ଆତଙ୍କବାଦବିହୀନ ସମାଜ ଚାହେଁ। ଗତ ରବିବାର ଶ୍ରୀଲଙ୍କା ଗସ୍ତବେଳେ ସେଣ୍ଟ୍ ଆଣ୍ଟୋନୀ ଚର୍ଚ୍ଚରେ ଆତଙ୍କବାଦର ନଗ୍ନରୂପ ଦେଖିବାକୁ ପାଇଥିବା ମୋଦି ପ୍ରକାଶ କରିଛନ୍ତି। ବହୁ ନିରୀହ ଲୋକ ଏଥିରେ ପ୍ରାଣ ହରାଇଥିଲେ। ବିଶ୍ୱ ସମୁଦାୟ ଆତଙ୍କବାଦ ବିରୋଧୀ ଅଭିଯାନରେ ସାମିଲ ହୋଇ ଏହାର ମୂଳୋତ୍ପାଟନ କରିବାକୁ ଏକାଠି ହେବା ଦରକାର ବୋଲି ମୋଦି କହିଛନ୍ତି। ଏସ୍ସିଓ ସଦସ୍ୟମାନେ ବୃହତର ସ୍ବାର୍ଥ ଲାଗି ଆତଙ୍କବାଦ ବିରୋଧରେ ପଦକ୍ଷେପ ଗ୍ରହଣ କରନ୍ତୁ ବୋଲି ମୋଦି ପ୍ରକାଶ କରିଛନ୍ତି। ଏଥିଲାଗି ଏସ୍ସିଓ ପକ୍ଷରୁ ବିଶ୍ୱ ସମ୍ମିଳନୀ କରିବାକୁ ସେ ପ୍ରସ୍ତାବ ଦେଇଛନ୍ତି। ଆଫଗାନିସ୍ତାନରେ ଶାନ୍ତି ଓ ସୁରକ୍ଷା ଲାଗି ଏସ୍ସିଓ ରାଷ୍ଟ୍ର ପଦକ୍ଷେପ ନେବାକୁ ସେ ଆହ୍ବାନ ଦେଇଛନ୍ତି। ପ୍ରକାଶଥାଉ କି, ଆତଙ୍କବାଦକୁ ନେଇ ଗୁରୁବାର ପାକିସ୍ତାନ ଉପରେ ମୋଦି ବର୍ଷିଥିଲେ। ତୁରନ୍ତ ଏହି ଦେଶ ଆତଙ୍କବାଦକୁ ପ୍ରୋତ୍ସାହନ ଦେବା ବନ୍ଦକରୁ ବୋଲି କହିବା ସହ ସଦସ୍ୟ ରାଷ୍ଟ୍ରଙ୍କ ଦୃଷ୍ଟି ଆକର୍ଷଣ କରିଥିଲେ।
ଭାରତ ସହ ଏସ୍ସିଓ ସଦସ୍ୟ ଆତଙ୍କବାଦକୁ ଦୃଢ଼ ନିନ୍ଦା କରି ଅନ୍ତର୍ଜାତୀୟ ସମୁଦାୟର ସହଯୋଗ ଲୋଡ଼ିଛନ୍ତି। ସମୂହ ସହଯୋଗରେ ବିଶ୍ୱରୁ ଆତଙ୍କବାଦ ଦୂରକରିବା ଲାଗି ମିଳିତ ଆହ୍ବାନ ଦିଆଯାଇଛି। ଏସ୍ସିଓର ବିଶ୍କେକ୍ ଘୋଷଣାନାମାରେ ସଦସ୍ୟ ରାଷ୍ଟ୍ରମୁଖ୍ୟମାନେ ଆତଙ୍କବାଦକୁ କେବେହେଲେ ବରଦାସ୍ତ କରାଯିବ ନାହିଁ ଓ ଏହା ବିରୋଧରେ ମିଳିତଭାବେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସଂକଳ୍ପ ନେଇଛନ୍ତି। ବିଶ୍ୱ ସମୁଦାୟ ଏଥିଲାଗି ସହଯୋଗ କରିବାକୁ ଅନୁରୋଧ କରାଯାଇଛି। ସହମତି ଭିତ୍ତିରେ ଅନ୍ତର୍ଜାତୀୟ ଆତଙ୍କବାଦକୁ ନେଇ ଏକ ବିଶାଳ ସମ୍ମିଳନୀ କରାଯିବା ଲାଗି ସହମତି ପ୍ରକାଶ ପାଇଛି। ଆତଙ୍କବାଦ ଓ କଠୋରପନ୍ଥୀଙ୍କ ଲାଗି କୌଣସି ରାଜନୀତି କରା ନ ଯାଇ ଏକାଠି ହେବାଲାଗି ଆହ୍ବାନ ଦିଆଯାଇଛି। ପ୍ରକାଶଥାଉ କି, ପଠାନ୍କୋଟ୍ ଓ ପୁଲ୍ଓ୍ବାମା ଆକ୍ରମଣ ପରେ ଆତଙ୍କବାଦକୁ ନେଇ ଭାରତ ପ୍ରତିପକ୍ଷ ପାକିସ୍ତାନ ଉପରେ ଦୋଷ ଲଦିଆସୁଛି। ଆଲୋଚନା ଓ ଆତଙ୍କବାଦ ଏକସଙ୍ଗେ ଚାଲିପାରିବ ନାହିଁ ବୋଲି ଭାରତ କହୁଛି। ସୀମାପାର୍ ଆତଙ୍କବାଦ ଭାରତ ଲାଗି ଚିନ୍ତାର କାରଣ ସାଜିଥିବାବେଳେ ଏବେ ସାରା ବିଶ୍ୱ ଅତଙ୍କବାଦ ଜାଲରେ ଛନ୍ଦିହୋଇ ପଡ଼ିଛି। ଏହାକୁ ଦୃଢ଼ ହସ୍ତରେ ଦମନ କରିବାର ସମୟ ଆସିଛି ବୋଲି ମୋଦି କହିବା ପରେ ଏସ୍ସିଓ ସଦସ୍ୟ ରାଷ୍ଟ୍ରମୁଖ୍ୟମାନେ ଏନେଇ ପ୍ରତିବଦ୍ଧତା ଜାହିର କରିଛନ୍ତି।