କ୍ୟାଫେ କଫି ଡେ ପ୍ରତିଷ୍ଠାତା ଭି.ଜି.ସିଦ୍ଧାର୍ଥଙ୍କ ମୃତ୍ୟୁ ହୋଇଯାଇଥିବା ପୋଲିସ ଘୋଷଣା କରିବା ପରେ କମ୍ପାନୀ ବୋର୍ଡ ବୁଧବାର ଜରୁରିକାଳୀନ ବୈଠକ ଡାକି ଏସ.ଭି.ରଙ୍ଗନାଥଙ୍କୁ ଅନ୍ତରୀଣ ଅଧ୍ୟକ୍ଷ ଭାବେ ନିଯୁକ୍ତ କରିଛି। ସେହିପରି ନୀତିନ ବାଗମାନେ ଅନ୍ତରୀଣ ସିଓଓ ଭାବେ ଦାୟିତ୍ୱ ତୁଲାଇବେ। ରଙ୍ଗନାଥ ବର୍ତ୍ତମାନ ଅଣ କାର୍ଯ୍ୟନିର୍ବାହୀ ସ୍ବାଧୀନ ନିର୍ଦ୍ଦେଶକ ଭାବେ ଦାୟିତ୍ୱ ତୁଲାଉଛନ୍ତି। କମ୍ପାନୀ ପକ୍ଷରୁ ଏକ ବିଜ୍ଞପ୍ତି ପ୍ରକାଶ କରି କୁହାଯାଇଛି ଯେ, ଆର୍.ରାମମୋହନଙ୍କ ନେତୃତ୍ୱରେ ଏକ କାର୍ଯ୍ୟନିର୍ବାହୀ କମିଟି ନିକଟରେ ସମସ୍ତ ଅଧିକାର ରହିବ ଯାହା ପୂର୍ବରୁ ସିଇଓ ଭାବେ ସିଦ୍ଧାର୍ଥ ତୁଲାଉଥିଲେ।
ମନେପକାଉଛି ମାଲନାଡ
କଫି କିଙ୍ଗ୍ ମାଲିକ ଭି.ଜି.ସିଦ୍ଧାର୍ଥଙ୍କ ପରଲୋକ ହୋଇଥିବା ମଙ୍ଗଲୁରୁ ପୋଲିସ ବୁଧବାର ଘୋଷଣା କରିବା ପରେ କର୍ନାଟକରେ ଶୋକର ଛାୟା ଖେଳିଯାଇଛି। ୫୮ ବର୍ଷୀୟ ଏହି ବ୍ୟବସାୟୀ ମାଲନାଡ ଅଞ୍ଚଳରେ ବେଶ୍ ଲୋକପ୍ରିୟ ଥିଲେ। ନିଜ ଜିଲା ସମେତ ବିଭିନ୍ନ ଅଞ୍ଚଳରେ ସେ ପ୍ରାୟ ୫୦ ହଜାର ବ୍ୟକ୍ତିଙ୍କୁ ନିଯୁକ୍ତି ଦେଇଥିଲେ। ସିଦ୍ଧାର୍ଥଙ୍କ ନିଜ ଜିଲା ଚିକ୍ମାଗାଲୁରୁ ପାହାଡପର୍ବତ ଘେରା, ବନାନୀ ଓ ଝରଣା ଏବଂ କଫି ପ୍ଳାଣ୍ଟେଶନ ପାଇଁ ପ୍ରସିଦ୍ଧ। କର୍ନାଟକର କେନ୍ଦ୍ରୀୟ ଅଞ୍ଚଳରେ ଥିବା ଏହି ଜିଲା ମାଲନାଡ ଭାବେ ବେଶ ଜଣାଶୁଣା। କଫି ଇଷ୍ଟେଟ ମାଲିକଙ୍କ ପୁତ୍ର ସିଦ୍ଧାର୍ଥଙ୍କ ପରିବାର ୧୩୦ ବର୍ଷ ହେବ କଫି ପ୍ଲାଣ୍ଟେଶନ ବ୍ୟବସାୟ ସହ ଜଡ଼ିତ। କଫି କିଙ୍ଗ୍ ଭାବେ ପରିଚିତ ସିଦ୍ଧାର୍ଥ ୧୯୯୬ରେ ପ୍ରଥମ କ୍ୟାଫେ କଫି ଡେ ଆଉଟଲେଟ୍ ପ୍ରତିଷ୍ଠା କରିଥିଲେ। ତାଙ୍କର ଦୂର ସମ୍ପର୍କୀୟ ଜୟରାମ ଜି. କିମାନେ କହନ୍ତି ଯେ, ସେ ତାଙ୍କୁ ୧୯୮୫ରୁ ଜାଣିଥିଲେ। ନିଜକୁ ସେ ବଡ଼ ଭାବେ ପ୍ରତିଷ୍ଠିତ କରିପାରିଥିଲେ। ଜଣେ ସମ୍ମାନିତ ଏବଂ ଉତ୍ତରଦାୟୀ ବ୍ୟକ୍ତି ଭାବେ ସେ ବେଶ ଜଣାଶୁଣା। ଆମ ଅଞ୍ଚଳର ବହୁ ବ୍ୟକ୍ତିଙ୍କୁ ସେ ରୋଜଗାର ଦେଇଛନ୍ତି। ନିଜର ବ୍ରାଣ୍ଡ ସମେତ ବିଶାଳ ପ୍ଲାଣ୍ଟେଶନର ପରିଚାଳନାରେ ତାଙ୍କର ଦକ୍ଷତା ଥିଲା। ତାଙ୍କ ଗ୍ରାମନିବାସୀ ତାଙ୍କର ଦୀର୍ଘଦିନର ସହଯୋଗୀ ହଲପ୍ପା ଗୌଡାଙ୍କ କହିବାନୁଯାୟୀ,ହାସନ, ଚିକମାଗାଲୁରୁ, ଶିବାମୋଗା, କୁର୍ଗ(ଏହି ଜିଲାଗୁଡ଼ିକୁ ନେଇ ମାଲନାଡ ଗଠିତ)ରେ ହଜାର ହଜାର ଲୋକଙ୍କୁ ସେ ନିଯୁକ୍ତି ଦେଇଥିଲେ। ଶିବାମୋଗା ଜିଲା ଚାମ୍ବର ଅଫ୍ କମର୍ସର ପୂର୍ବତନ ପ୍ରେସିଡେଣ୍ଟ ବି.ଏସ୍.ଅରୁଣ କହିଥିଲେ ଯେ, ତାଙ୍କ ଭଳି ଦୂରଦୃଷ୍ଟିସମ୍ପନ୍ନ ବ୍ୟବସାୟୀ ବହୁ ବର୍ଷ ଧରି ମିଳିନାହାନ୍ତି। ତାଙ୍କ ଭଳି କେହି ସ୍ବପ୍ନ ଦେଖିନାହାନ୍ତି। ଅନେକ ରିଏଲ ଇଷ୍ଟେଟରେ ନିବେଶ କରୁଥିବାବେଳେ ସେ କଫି ଓ ସଫ୍ଟଓ୍ବେରରେ ନିବେଶ କରିଥିଲେ। ଦି ଥିକସେକ୍ ଫ୍ୟାକ୍ଟ୍ରିର ପ୍ରତିଷ୍ଠାତା ୟଶବନ୍ତ ନାଗ ମୋଚେରଲା କହିଥିଲେ ଯେ, ସେ ଓ ତାଙ୍କ ଭଳି ପ୍ରତିଷ୍ଠିତ ସମସ୍ତ ଉଦ୍ୟୋଗୀ ଏବଂ ଭବିଷ୍ୟତର ଉଦ୍ୟୋଗୀଙ୍କ ପାଇଁ ସିଦ୍ଧାର୍ଥ ଥିଲେ ଆଦର୍ଶ।